9 oktyabrda keçiriləcək prezident seçkilərinin qalibi məhz cənab İlham Əliyev olacaq

Bakı:

28 °C

47 %

4 m/s

Əlaqə

AZ RU EN

Ana səhifə / YAP xəbərləri / 9 oktyabrda keçiriləcək prezident seçkilərinin qalibi məhz cənab İlham Əliyev olacaq

9 oktyabrda keçiriləcək prezident seçkilərinin qalibi məhz cənab İlham Əliyev olacaq

02.10.2013 [10:14]

Bərdə rayonunun Nazırlı və Mirzəcəfərli kəndlərində seçicilərlə görüş keçirilib
Yeni Azərbaycan Partiyası (YAP) tərəfindən prezidentliyə namizədliyi irəli sürülmüş cənab İlham Əliyevin Bərdə rayonu üzrə seçki qərargahının üzvləri seçicilərlə görüşləri davam etdirirlər. Növbəti görüş dünən rayonun Nazırlı və Mirzəcəfərli kəndlərində keçirilib.
Görüşləri giriş sözü ilə açan YAP Bərdə rayon təşkilatının sədri Fəqət Şadlinskaya cənab İlham Əliyevin rəhbərliyi ilə ötən 10 il ərzində həyata keçirilən siyasət barədə ətraflı məlumat verib. Rayon təşkilatının sədri 9 oktyabr prezident seçkilərinin Azərbaycanda demokratiyanın növbəti təntənəsi olacağını vurğulayıb.
Çıxış edən Ekologiya və Təbii Sərvətlər Nazirliyi Mineral Xammal Elmi-Tədqiqat İnstitutunun direktoru, texniki elmlər doktoru, professor Mürsəl Əliyev bildirib ki, Azərbaycan son 10 il ərzində yüksək templə inkişaf edib və bu inkişaf özünü hər bir sahədə göstərir: “9 oktyabrda keçiriləcək prezident seçkilərinin qalibi məhz cənab İlham Əliyev olacaq. Çünki, dövlət başçısının təsdiqlədiyi regionların sosial-iqtisadi inkişafına dair Dövlət proqramları çərçivəsində ölkədə genişmiqyaslı abadlıq-quruculuq işləri aparılıb. Həyata keçirilmiş məqsədyönlü siyasət nəticəsində Azərbaycanın iqtisadiyyatı dünyada analoqu olmayan templə inkişaf edir. Artıq bu faktı beynəlxalq qurumlarda bəyan edirlər. Düzdür istər ölkə daxilində, istərsə də xaricdə olan bəzi qərəzli dairələr Azərbaycanın əldə etdiyi bu uğurlara kölgə salmağa çalışırlar. Amma bu gün ölkədə yeni sosial obyektlərin, müəssisələrin açılması, insanların rifah halının yüksəlməsi, nəinki şəhərlərin, hətta kəndlərin belə inkişaf etməsi, ölkəmizin 155 dövlətin səs çoxluğu ilə BMT Təhlükəsizlik Şurasına qeyri-daimi üzv seçilməsi, eyni zamanda, Azərbaycanın nüfuzlu beynəlxalq tədbirlərin keçirildiyi məkana çevrilməsi ortaya atılan əsassız informasiyaları məhv edən tutarlı arqumentlər, əyani sübutlardır”.
Professor bildirib ki, Prezident İlham Əliyevin həyata keçirdiyi quruculuq siyasəti nəticəsində Azərbaycanın bütün bölgələri, o cümlədən, Bərdə rayonu keyfiyyətcə yeni inkişaf erasını yaşamaqdadır: “Məhz bütün bunlara görə də Azərbaycan vətəndaşları, o cümlədən, bərdəlilər cənab İlham Əliyevi alternativsiz lider kimi qəbul edir, Onun uğurla davam etdirdiyi siyasi və iqtisadi islahatlar kursunu tam dəstəkləyirlər”.
Mürsəl Əliyev sonda bərdəli seçiciləri Azərbaycanın gələcək inkişafı naminə cənab İlham Əliyevə səs verməyə çağırıb.
Çıxış edən akademik C.Abdullayev adına Elmi-Tədqiqat Kardiologiya İnstitutunun direktoru, Azərbaycan Tibb Universitetinin kliniki farmakologiya kafedrasının müdiri Adil Baxşəliyev ötən 10 il ərzində ölkəmizdə bütün sahələrdə uğurların əldə edildiyini deyib: “Ulu öndər Heydər Əliyevin müəyyənləşdirdiyi yol aydındır və xalqımız bu yolun ölkəni hansı gələcəyə apardığını yaxşı bilir. Bu səbəbdəndir ki, Azərbaycan xalqı Ümummilli liderin yolunu davam etdirməyi qarşısına məqsəd qoyan cənab İlham Əliyevi özünün Prezidenti kimi gördü və zaman göstərdi ki, xalqımız öz seçimində yanılmayıb. Məhz buna görə də, 9 oktyabrda xalqımız bir daha cənab İlham Əliyevə səs verəcək”.
Seçicilər qarşısında çıxış edən rayon Qadınlar Şurasının sədri Rahilə Babayeva, Anar Şahbazov, həmçinin, kənd sakinləri Prezident İlham Əliyevin həyata keçirdiyi siyasətin hər bir vətəndaşın həyatında müsbət iz buraxdığını deyiblər. Çıxışlarda qeyd olunub ki, bərdəlilər 9 oktyabr prezident seçkilərində Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə səs verəcəklər.
Nadir AZƏRİ

Paylaş:

Baxılıb: 1254 dəfə