Kopenhagen görüşləri Azərbaycanın qlobal siyasətdə artan rolunun göstəricisidir

Bakı:

10 °C

93 %

2 m/s

Əlaqə

AZ RU EN

Ana səhifə / YAP xəbərləri / Kopenhagen görüşləri Azərbaycanın qlobal siyasətdə artan rolunun göstəricisidir

Kopenhagen görüşləri Azərbaycanın qlobal siyasətdə artan rolunun göstəricisidir

07.10.2025 [13:05]

Elçin Quliyev

YAP Nərimanov Rayon Təşkilatının sədri

Avropa Siyasi Klubuna Azərbaycan prezidenti İlham Əliyevin də dəvət edilməsi olduqca mühüm hadisədir. Bu onu deməyə əsas verir ki, artıq Qərbin aparıcı liderləri İlham Əliyevsiz, Azərbaycansız hər hansısa ciddi bir məsələni müzakirə etmək istəmirlər.

Prezident İlham Əliyevin Kopenhagendə keçirdiyi görüşlər qarşı tərəfin müraciətləri əsasında baş tutub. İndi bir sıra Qərb liderləri, eləcə də dünyanın aparıcı enerji şirkətləri İlham Əliyevlə görüşmək üçün növbəyə dayanıblar. Hətta Serbiya prezidenti Vuçiç bir neçə dəfə bunu açıq şəkildə ifadə edib. Bütün bunlar onu deməyə əsas verir ki, cənab prezidentin Avropada yüksək nüfuzunun, ona göstərilən böyük hörmətin, eləcə də ölkəmizin müsbət imicinin, ona verilən xüsusi dəyərin və olduqca pozitiv münasibətin göstəricisidir.

Ölkəmizin başçısının Moldova Prezidenti Maya Sandu və Avropa Komissiyasının Prezidenti Ursula Fon der Lyayen ilə görüşlər xüsusilə diqqət çəkir. Görüşlərdə Avropa tərəfi Azərbaycanın Avropa üçün mühüm tərəfdaş olduğunu və Avropanın enerji təhlükəsizliyində rolunu vurğulayıb. Həmçinin Azərbaycanın regiondakı yeni reallıqları, 44 günlük müharibədən sonra formalaşan vəziyyət və Rusiya–Ukrayna müharibəsindən sonra Cənubi Qafqazdakı geosiyasi mövqeyi də Avropanın diqqət mərkəzindədir. Bu, Avropa Birliyinin Azərbaycanın regional əhəmiyyətini qəbul etməsi və ölkəmizə tərəfdaş kimi yanaşmasının aydın təzahürüdür.

Cənab Prezident İlham Əliyevin Nikol Paşinyanla görüşündə kommunikasiyaların açılması və sülh müqaviləsinə doğru gedən proseslər müzakirə olunub. Bütün bu görüşlər Azərbaycanın beynəlxalq aləmdə nüfuzunun artmasını, uğurlu diplomatik siyasətinin nəticələrini nümayiş etdirir. Azərbaycan artıq ikili standartlı və qərəzli münasibətlə deyil, strateji tərəfdaş kimi qəbul olunur ki, bu da ölkənin beynəlxalq platformalarda mövqeyinin möhkəmlənməsinə xidmət edir.

Aparıcı Avropa siyasətçiləri ilə görüşlər zamanı həm ikitərəfli münasibətlər, yəni Azərbaycanla həmin ölkələr arasındakı əlaqələr müzakirə olunub, həm də Avropa İttifaqı rəhbərliyi ilə Azərbaycan–Avropa münasibətləri ətrafında fikir mübadiləsi aparılıb. Hətta Fransa prezidenti Emmanuel Makron belə Azərbaycana qarşı yanlış addımlar atdığının fərqindədir və indi azərbaycanlı həmkarı ilə münasibətləri düzəltməyə çalışır.

Fransada artıq başa düşürlər ki, Azərbaycanla münasibətləri pisləşdirmək onlara heç nə verməyəcək. Əksinə, Azərbaycan Cənubi Qafqazın açar ölkəsidir və Bakı ilə münasibətləri daha da pisləşdirsə, o zaman fransızlar bütün Güney Qafqazdakı bütün siyasi-iqtisadi maraqlarının üzərindən xətt çəkmiş olacaqlar.

Son illərdə Azərbaycanın nüfuzu Vaşinqton sazişindən sonra daha da yüksəlib. Avropa ölkələrinin rəhbərləri Prezident İlham Əliyevi və Ermənistan Baş nazirini əldə olunmuş nailiyyət münasibətilə təbrik edirlər. Həmçinin Azərbaycanla əlaqələri daha da gücləndirmək niyyətlərini açıqlayıblar. Hətta Fransanın Prezidenti Emmanuel Makron belə münasibətləri möhkəmləndirmək üçün müəyyən addımlar atmağa cəhd göstərir. Yəni, Makron özünü prezident Əliyevə bağışlatmaq üçün dəridən-qabıqdan çıxır.

Görünən odur ki, hər zaman ermənipərəst və ikili standartlarla ölkəmizə qarşı çirkin kampaniyalar aparan Fransa və onun rəhbəri də Azərbaycanın nüfuzunu və aparıcı rolunu qəbul etməkdədir.

Səbəbi sadədir, Azərbaycan prezidentinin qurduğu düzgün strategiya nəticəsində Bakı hazırda regionun və Avrasiyanın aparıcı oyunçularından birinə çevrilib. Zəngəzur dəhlizinin açılması, eləcə də “Bir kəmər-bir yol” layihəsinin işə düşməsi Avropanı Rusiyanın caynağından xilas edəcək. Digər tərəfdən, Azərbaycan prezidenti həm də Orta Asiyadakı enerji resusrslarının Qərbə daşınmasında Türküstan coğrafiyasındakı türk liderlərini razı sala biləcək yeganə şəxsdir.

Ona görə də Avropa liderləri İlham Əliyevə sözün əsl mənasında xilaskar gözü ilə baxırlar. Bir sözlə, ölkə başçısının Danimarkada Avropa Siyasi Birliyinin sammitində iştirak ölkəmizin beynəlxalq aləmdə artan nüfuzunun bariz göstəricisidir. Ermənistanla sülhün əldə olunması ilə bağlı atılan ilkin addımlar, eləcə də Bakının Qərbin enerji təhlükəsizliyində önəmli rol oynaması Azərbaycanın qlobal miqyasda həlledici rola malik olduğunu nümayiş etdirir.

Danimarka paytaxtında Azərbaycan prezidentinin keçirdiyi görüşlər bir daha təsdiq etdi ki, Azərbaycan regional təhlükəsizlik, enerji və nəqliyyat məsələlərində Avropa üçün mühüm tərəfdaşdır. Eyni zamanda, rəsmi Bakı uğurlu beynəlxalq aktor kimi qəbul olunur. Bir sözlə, ölkə başçısının Danimarkaya səfəri Azərbaycanın qlobal gücə çevrilməsinin bariz nümunəsidir.

Paylaş:

Baxılıb: 520 dəfə