ƏBƏDİ QƏLƏBƏMİZ

Bakı:

27 °C

61 %

2 m/s

Əlaqə

AZ RU EN

Ana səhifə / YAP xəbərləri / ƏBƏDİ QƏLƏBƏMİZ

ƏBƏDİ QƏLƏBƏMİZ

05.11.2025 [12:16]

8 noyabr - Azərbaycanın tarixinə müdrik siyasi rəhbərliyin və uzaqgörən hərbi strategiyanın təntənəsi, xalqımızın yenilməz gücünün və qəhrəmanlığının rəmzi kimi daxil olub. Məhz bu gün Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin 44 günlük Vətən müharibəsində əldə etdiyi, beşinci ildönümü qeyd olunan şanlı qələbəmizin tarixi günüdür.

44 günlük Vətən müharibəsində gücləndirilmiş Azərbaycan Silahlı Qüvvələri erməni hərbi birləşmələrini darmadağın etdi və 30 ilə yaxın müddətdə işğal altında olan torpaqlarımızı geri qaytardı. Bu yolda yenilənmiş hərbi təchizatla yanaşı ordumuzun əsasını təşkil edən igid hərbiçilərimizin canla-başla göstərdiyi qəhrəmanlıq önəmli rol oynadı. Ordumuz düşmənə “Qarabağ Azərbaycandır!” həqiqətini sübut etdi və bunu bütün dünyaya çatdırdı. Beləliklə qazanılmış qələbə tarixi ədalətin bərpasını həyata keçirdi. Qısa müddət ərzində Qarabağ iqtisadi rayonunun böyük hissəsi əsarətdən xilas edildi.Düşmən kapitulyasiya aktına imza atmağa məcbur qaldı. Ermənistan istənilən halda faktiki olaraq 10 noyabr axşamı rüsvayçı şəkildə məğlub olduğunu bəyan etdi. Siyasi arenada İlham Əliyevin şəxsində qazanılan bu qələbə erməni separatizminə, terroruna ən ağır zərbəni vurdu. 10 noyabr üzərindən illər keçsə də, Azərbaycanın şanlı tarixində mühüm mərhələ hesab olunacaq. Bu tarix bizim haqq savaşımızın qalibiyyətlə başa çatdığı, düşmənin isə rüsvayçılıqla darmadağın olduğunu bütün dünya qarşısında etiraf etdiyi əlamətdar gün kimi yaddaşlarda həkk olunub.

2020-ci il dekabrın 10-da Bakıda keçirilmiş möhtəşəm Zəfər paradı ölkəmizin qüdrətini, dövlətimizin başçısı, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun tarixi Qələbəsini bütün dünyaya nümayiş etdirdi. Bu, eyni zamanda, ərazi bütövlüyümüzün bərpasının təqdimatı idi. Şuşa işğaldan azad edildikdən sonra Azərbaycan hərbçiləri tərəfindən şəhər üzərində qaldırılan Zəfər bayrağının da parada gətirilməsi xüsusilə qürurverici idi. Zəfər paradı həmçinin nümayiş etdirilən texnikalar baxımından da yadda qalan olmuşdur. Azadlıq meydanında keçirilən hərbi paradda 3000 nəfərdən artıq şəxsi heyət, 150-dək hərbi texnika, o cümlədən, silahlanmaya yeni qəbul edilmiş müasir hərbi texnika, raket və artilleriya qurğuları, hava hücumundan müdafiə sistemləri, eləcə də hərbi gəmi və katerlər nümayiş etdirildi. Ordumuzun maddi-texniki bazasının zənginliyini sübut edən texnika və silah-sursatın bir hissəsinin paradda əyani şəkildə nümayiş olunması ilə hər kəs Azərbaycan Ordusunun arsenalının müasir silahlarla təchiz edildiyinin əyani şahidi oldu. Zəfər paradı təkcə Azərbaycan xalqı üçün deyil, bütün türk dünyası, İslam aləmi üçün əvəzolunmaz hisslər yaşatdı. Bu gün 30 il həsrət qaldığımız Vətən torpaqlarında artıq üçrəngli Azərbaycan bayrağı dalğalanır ki, bu da bizim üçün çox qürurvericidir.

44 gün ərzində 30 illik təcavüz və etnik təmizləmə siyasətinin qanunsuz nəticələrini ləğv etmək Azərbaycan tarixinin həqiqətən şanlı səhifəsidir. Prezident İlham Əliyev haqqımızı dünyaya təlqin edə-edə bu böyük nəticələri əldə etdi. Azərbaycanın haqqına hörmət edən, etməyə məcbur edilən, ya da heç olmasa neytral qalan ölkələrin sayı və dairəsi genişləndi. Azərbaycan cənab Prezident İlham Əliyevin sayəsində müharibədən daha da güclənərək çıxdı.

Daim sülhün tərəfdarı olan Azərbaycan qarşı tərəfə bunu təklif etsə də verilən sözü tutmayan Ermənistan yenə də mənfur əməlindən geri qalmadı. 2020-ci il 10 noyabrda imzalanan üçtərəfli Bəyanatın bəndlərindən biri Qarabağdakı qeyri-qanuni erməni hərbi birləşmələrinin çıxarılması idi. Lakin uzun müddət keçməsinə baxmayaraq, bu bənd icra olunmurdu. İşğaldan azad edilmiş ərazilərdə sülhməramlıların yerləşdirilməsinə məhəl qoymayan ermənilərin mövqelərimizi davamlı silah atəşinə tutması daha bir münaqişəyə təkan verdi. 2023-cü ilin sentyabrın 19-da başlayan döyüş 24 saatdan qısa müddətdə davam etdi. Lokal xarakterli antiterror tədbirlərində Qarabağda yaşayan seperatçılar darmadağın edildi, qalan ərazilər də düşmənlərdən təmizləndi. Həmçinin qondarma Dağlıq Qarabağ altında “hakim”liyini elan etmiş şəxslər taxt-tacından düşərək qurduğu “dövlət”i sonlandırdı.

Əldə olunan Zəfər yalnız hərbi gücün deyil, həm də siyasi iradənin, xalqın birliyinin və beynəlxalq hüquqa əsaslanan mövqenin nəticəsi oldu. Prezident cənab İlham Əliyevin rəhbərliyi ilə Azərbaycan dövləti bir daha sübut etdi ki, müstəqilliyini, suverenliyini və vətəndaşlarının təhlükəsizliyini qorumağa qadir qüdrətli bir ölkədir.

Qeyd edək ki, hərbi qələbəmizin, həmçinin xalqımızın Vətən müharibəsində göstərdiyi misilsiz qəhrəmanlığın və qazandığı tarixi Zəfərin nümayiş etdirilməsi, şəhidlərimizin əziz xatirəsinin əbədiləşdirilməsi Prezident İlham Əliyevin daim diqqət mərkəzindədir: “Çünki Vətən uğrunda öz canlarını fəda etmiş qəhrəman övladlarımızın ailə üzvləri dövlət tərəfindən qayğı ilə əhatə olunmalıdır və biz bunu bu gün əyani şəkildə görürük. Öz sağlamlığını itirmiş, yaralanmış qazilər bütün dövlət orqanları tərəfindən daim qayğı ilə əhatə olunmalıdır və biz bunu təmin edirik.” Bakıda Vətən Müharibəsi Memorial Kompleksinin və Zəfər Muzeyinin yaradılması haqqında Sərəncam, həmçinin Hərbi Qənimətlər Parkının salınması Zəfərimizin gələcək nəsillərə çatdırılması, Qələbəmizin əbədiliyindən xəbər verir.

Gündüz Bayramov

YAP Samux rayon təşkilatının sədri

Paylaş:

Baxılıb: 626 dəfə