Tarixi zərurətdən doğan siyasi hadisə

Bakı:

30 °C

51 %

3 m/s

Əlaqə

AZ RU EN

Ana səhifə / YAP xəbərləri / Tarixi zərurətdən doğan siyasi hadisə

Tarixi zərurətdən doğan siyasi hadisə

21.11.2025 [20:36]

Yeni Azərbaycan Partiyasının yaranması müasir Azərbaycanın siyasi tarixində dönüş nöqtəsi hesab olunur. 1990-cı illərin əvvəllərində ölkə çətin, təhlükəli və mürəkkəb bir dövr yaşayırdı. Siyasi qarşıdurmalar, idarəetmədə qeyri-sabitlik, torpaqların işğala məruz qalması və ölkədə ümumi xaos cəmiyyətin narahatlığını artırırdı. Məhz belə bir şəraitdə xalqın tələbi ilə məsuliyyətli ziyalılar, ictimai-siyasi xadimlər ölkənin xilasını təmin edə biləcək güclü liderin ətrafında birləşməyin vacibliyini irəli sürdülər.

1992-ci il noyabrın 21-də Naxçıvan şəhərində keçirilən qurultay Yeni Azərbaycan Partiyasının rəsmi olaraq yaranmasını bəyan etdi. “91-lər”in müraciəti əsasında Ulu Öndər Heydər Əliyev partiyanın yaradılmasına razılıq verdi və YAP-ın Sədri seçildi. Bu qərar təkcə bir siyasi təşkilatın yaranması deyildi – Azərbaycanın gələcək inkişaf yolunun əsasını qoyan strateji addım idi.

Ulu öndər Heydər Əliyevin liderliyi ilə YAP çox qısa zamanda ölkə əhalisinin böyük etimadını qazandı və dövlətçilik ideyalarının daşıyıcısına çevrildi. Partiyanın proqramı, ideyaları və məqsədləri Azərbaycanın sabitliyini, təhlükəsizliyini və inkişafını prioritet kimi müəyyənləşdirdi.

1993-cü ildən sonra Heydər Əliyevin hakimiyyətə qayıdışı ilə YAP ölkənin siyasi həyatında aparıcı qüvvəyə çevrildi. Dövlətçilik ənənələrinin bərpası, iqtisadi islahatların başlanması, ordu quruculuğu, beynəlxalq əlaqələrin möhkəmləndirilməsi və milli birliyin təmin olunması YAP-ın fəaliyyətinin əsas istiqamətlərinə çevrildi.

Bu dövrdə atılan addımlar Azərbaycanın müstəqil, güclü və sabit dövlət kimi inkişafının təməlini qoydu.

2003-cü ildən etibarən Prezident İlham Əliyev YAP-ın ideoloji xəttini daha da gücləndirdi və partiyanı müasir çağırışlara uyğun şəkildə yenilədi. Onun rəhbərliyi ilə Azərbaycan regionun lider dövlətinə çevrildi, iqtisadiyyat sürətlə inkişaf etdi, sosial layihələr genişləndi və ordu gücləndi.

Prezident İlham Əliyevin 2020-ci ildə Azərbaycan xalqına bəxş etdiyi tarixi Zəfər YAP-ın siyasi xəttinin və dövlət siyasətinin nə qədər doğru olduğunu bir daha sübut etdi. Ali Baş Komandan kimi onun qətiyyəti, dəmir iradəsi və strateji düşüncəsi 30 illik işğala son qoydu və ölkəmizin ərazi bütövlüyü təmin edildi.

Bu gün YAP Azərbaycanın ən böyük siyasi təşkilatıdır. Partiya geniş ictimai dəstəyə, güclü kadr potensialına və yenilənən ideoloji xəttə malikdir. Müasir dövrün çağırışlarına uyğun olaraq siyasi islahatların aparılması, rəqəmsal idarəetmə, dövlət xidmətlərinin təkmilləşdirilməsi, cəmiyyətin inkişafı və gənclərin siyasi fəallığı YAP-ın əsas prioritetlərindəndir.

Yeni Azərbaycan Partiyasının yaranması təkcə siyasi birləşmə deyil, dövlətçilik baxımından həlledici hadisə oldu. Ümummilli liderimiz Heydər Əliyevin müdrikliyi, Prezident İlham Əliyevin qətiyyəti və tarixi Zəfərdəki əvəzsiz rolu YAP-ı Azərbaycanın inkişaf yolunun başlıca dayağına çevirdi.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 406 dəfə