Azərbaycan etibarlı dövlətdir

Bakı:

24 °C

74 %

10 m/s

Əlaqə

AZ RU EN

Ana səhifə / YAP xəbərləri / Azərbaycan etibarlı dövlətdir

Azərbaycan etibarlı dövlətdir

12.01.2026 [19:08]

Azər Ağayev

YAP Tərtər rayon təşkilatının sədr müavini

2026-cı il yanvarın 8-də Azərbaycan Respublikasının Prezidenti cənab İlham Əliyevin iştirakı ilə “Xızı–Abşeron” Külək Elektrik Stansiyasının rəsmi açılış mərasimi Azərbaycanın enerji siyasətində növbəti mühüm mərhələ kimi tarixə düşdü. Prezident cənab İlham Əliyev çıxışında vurğuladı ki, 240 meqavat gücündə olan bu stansiya artıq fəaliyyətə başlayaraq ölkəmizin enerji potensialını əhəmiyyətli dərəcədə gücləndirəcək. Dörd il əvvəl – 2022-ci ilin yanvarında təməli qoyulan bu layihənin bu gün uğurla istismara verilməsi Azərbaycanda strateji qərarların kağız üzərində qalmadığını, ardıcıl icra mexanizmi ilə reallaşdırıldığını sübut edir. Cənab Prezidentin vurğuladığı kimi, bu illər ərzində aparılan fəal işlər nəticə etibarilə konkret məhsula – enerji gücünə çevrilib. Burada xüsusilə diqqətçəkən məqam odur ki, “ACWA Power”in bu layihəsi Azərbaycanda ilk bərpaolunan enerji stansiyası olsa da, sonuncu deyil. Bu isə artıq sabit və uzunmüddətli tərəfdaşlığın formalaşdığını göstərir. İnvestor kimi Səudiyyə Ərəbistanının, baş podratçı kimi isə Çinin “Power China” şirkətinin iştirakı göstərir ki, Azərbaycan qlobal iqtisadi və texnoloji şəbəkələrə tam inteqrasiya olunmuş etibarlı platformadır.

Cənab Prezident çıxışında Azərbaycanın əlverişli investisiya mühitinə də toxundu. Bu günə qədər ölkəmizə 300 milyard dollardan artıq xarici sərmayənin cəlb edilməsi həyata keçirilən siyasətin düzgünlüyünü sübut edir. Xarici borcun ÜDM-in cəmi 6 faizindən bir qədər çox olması, valyuta ehtiyatlarının borcu 16–17 dəfə üstələməsi Azərbaycanın maliyyə sabitliyinin göstəricisidir. Beynəlxalq reytinq agentlikləri tərəfindən kredit reytinqinin yüksəldilməsi də ölkəmizə olan etimadın daha da artdığını təsdiqləyir. Bərpaolunan enerji potensialının artması yeni infrastrukturun yaradılmasını da zəruri edir. Azərbaycan Respublikasının Prezidenti cənab İlham Əliyevin dediyi kimi, növbəti illərdə bərpaolunan enerji güclərinin artması həm daxili tələbatı tam ödəməyə, həm də elektrik enerjisi ixracını genişləndirməyə imkan verəcək. Azərbaycanın bərpaolunan enerji potensialı təkcə quru ərazilərlə məhdudlaşmır. Prezident İlham Əliyevin Xəzər dənizinin 157 giqavatlıq külək potensialını xatırlatması göstərir ki, ölkə artıq enerji xəritəsini qlobal miqyasda düşünür. Bu gün ölkəmizin müxtəlif yerlərində bərpaolunan enerji növləri inkişaf edir. Növbəti böyük stansiyaların açılışı Biləsuvarda, Neftçalada, Naxçıvanda, işğaldan azad edilmiş ərazilərdə nəzərdə tutulur. Bu günə qədər Qaradağ rayonunda açılıb, bu gün Xızı, Abşeron rayonlarında. Yəni Azərbaycanın coğrafi vəziyyəti elədir ki, istənilən bölgədə bərpaolunan enerji növlərini istehsal etmək mümkündür. Mən hələ Xəzər dənizinin potensialını demirəm. Xəzər dənizinin Azərbaycan sektorundakı külək potensialı beynəlxalq qiymətləndirməyə görə, 157 giqavat səviyyəsindədir. Yəni növbəti illərdə artıq bu proses Azərbaycanda geniş vüsət alacaq. Tarixdə ilk dəfə 250 MVt-lıq bu sistemin qurulması Azərbaycanın artıq enerji istehsalından idarəetməyə keçdiyini göstərir. Eyni zamanda süni intellekt, data mərkəzləri və enerji tutumlu sahələrə ünvanlanan çağırış onu deməyə əsas verir ki, Azərbaycan enerjidən texnologiyaya, resursdan innovasiyaya keçid mərhələsinə daxil olub. Azərbaycanda bərpaolunan enerji növlərinin yaradılması xarici investorlar tərəfindən həyata keçirilən genişmiqyaslı layihələrdir. Bu layihələrə bu günə qədər 100 milyonlarla dollar vəsait qoyulub. Azərbaycan Respublikasının bərpaolunan enerji sahəsində atdığı addımlar gələcək nəsillərin rifahına hesablanmış uzaqgörən dövlət siyasətinin parlaq nümunəsidir.

Paylaş:

Baxılıb: 480 dəfə