20 Yanvar faciəsinə ilk siyasi-hüquqi qiymət: tarixi ədalətin bərpası

Bakı:

24 °C

68 %

3 m/s

Əlaqə

AZ RU EN

Ana səhifə / YAP xəbərləri / 20 Yanvar faciəsinə ilk siyasi-hüquqi qiymət: tarixi ədalətin bərpası

20 Yanvar faciəsinə ilk siyasi-hüquqi qiymət: tarixi ədalətin bərpası

19.01.2026 [13:59]

Mansur Quliyev

YAP Ağdam rayon təşkilatının sədri

20 Yanvar faciəsi Azərbaycan xalqının azadlıq və müstəqillik yolunda verdiyi ən ağır, eyni zamanda ən şərəfli qurbanların simvoludur. 1990-cı il yanvarın 20-də sovet imperiyasının hərbi birləşmələri tərəfindən dinc əhaliyə qarşı törədilən qanlı qırğın xalqımızın iradəsini sındıra bilmədi, əksinə, milli azadlıq ruhunu daha da gücləndirdi. Bu faciə təkcə insan itkiləri ilə deyil, həm də hüququn, ədalətin və insan haqlarının kobud şəkildə tapdanması ilə yadda qaldı.

Faciədən dərhal sonra sovet rəhbərliyinin cinayətkar əməlləri ört-basdır etməyə çalışdığı bir vaxtda, xalqın səsini ucaldan, həqiqəti açıq şəkildə bəyan edən böyük siyasi iradə məhz Ümummilli Lider Heydər Əliyev tərəfindən nümayiş etdirildi. 1990-cı il yanvarın 21-də onun Moskvada Azərbaycanın daimi nümayəndəliyində verdiyi tarixi bəyanat 20 Yanvar hadisələrinə verilən ilk cəsarətli siyasi qiymət oldu.

Ümummilli Liderin təşəbbüsü ilə 1990-cı il noyabrın 21-də Naxçıvan Muxtar Respublikasının Ali Məclisində 20 Yanvar faciəsinə siyasi-hüquqi qiymət verən qərarın qəbul edilməsi isə tarixi ədalətin bərpası yolunda mühüm dönüş nöqtəsi oldu. Həmin qərarla sovet ordusunun Bakıda törətdiyi qırğın açıq şəkildə hərbi təcavüz və cinayət aktı kimi qiymətləndirildi, faciəyə görə məsuliyyət daşıyan şəxslərin adları konkret şəkildə göstərildi. Bu addım, o dövrün mürəkkəb siyasi şəraitində misilsiz cəsarət nümunəsi idi.

Məhz Heydər Əliyevin qətiyyətli mövqeyi nəticəsində 20 Yanvar faciəsi illər sonra, 1994-cü ildə Azərbaycan Respublikasının Milli Məclisi tərəfindən də dövlət səviyyəsində siyasi-hüquqi qiymətini aldı. Bu qərar şəhidlərimizin xatirəsinə ehtiramın, xalqımızın tarixi yaddaşına sədaqətin bariz ifadəsi oldu.

Bu gün müstəqil, güclü və qalib Azərbaycan dövləti 20 Yanvar şəhidlərinin amalını layiqincə yaşadır. Onların qanı bahasına qazanılan müstəqillik Ümummilli Lider Heydər Əliyevin siyasi xətti və Prezident İlham Əliyevin uğurlu rəhbərliyi ilə daha da möhkəmləndirilmiş, ərazi bütövlüyümüz və suverenliyimiz tam təmin olunmuşdur.

20 Yanvar faciəsinin 36-cı ildönümündə xalqımız şəhidlərin əziz xatirəsini dərin ehtiramla anır, azadlıq və müstəqillik yolunda göstərilən qəhrəmanlığı milli qürur hissi ilə yad edir. Bu faciə bir daha sübut etdi ki, Azərbaycan xalqının iradəsi sarsılmazdır və tarixi ədalət gec-tez mütləq bərpa olunur.

Paylaş:

Baxılıb: 440 dəfə