Süni intellektin tətbiqi geniş vüsət alacaq

Bakı:

22 °C

68 %

6 m/s

Əlaqə

AZ RU EN

Ana səhifə / YAP xəbərləri / Süni intellektin tətbiqi geniş vüsət alacaq

Süni intellektin tətbiqi geniş vüsət alacaq

13.02.2026 [14:01]

Azərbaycanın neft-qaz, bağlantılar sahələrində böyük təcrübəsi var. Bu həm bilik, bacarıq, texniki keyfiyyətlər, eyni zamanda, geniş beynəlxalq əlaqələr tələb edən məsələlərdir. Azərbaycan öz qonşuları ilə müxtəlif vaxtlarda müxtəlif istiqamətlər üzrə bir çox önəmli infrastruktur layihələrini icra etmişdir. “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə Prezident İlham Əliyev bu haqda fikir bildirərkən qeyd etdi ki, nəqliyyat, energetika dəhlizləri gələcəkdə fiber-optik dəhlizlərinə də çevrilməlidir. Bu istiqamətdə müəyyən işlər görülüb. Neft-qaz kəmərləri tikilən zaman, o cümlədən bu məsələ də öz həllini tapıb. Ancaq bu, təbii ki, bugünkü tələblərə cavab vermir. Ona görə rəqəmsallaşma, süni intellekt, data mərkəzlərinin yaradılması istiqamətində də təşəbbüslər ölkəmizin uzunmüddətli, dayanıqlı inkişafını təmin etməlidir. Ölkəmizin bir çox üstünlükləri var. Onlardan biri Azərbaycanın coğrafi vəziyyətidir.

Ölkə başçısı bildirdi ki, bu, bizdən asılı olmayan üstünlükdür. Ancaq hər bir ölkənin coğrafi vəziyyəti onun xeyrinə, yaxud da ki, ziyanına işləyə bilər. Ölkəmizin Asiya ilə Avropa arasında, həmçinin Şimal-Cənub dəhlizi üzərində yerləşməsi və yaradılmış mövcud infrastruktur bu üstünlüyü təmin edir.

Ölkəmizin transmilli böyük şirkətlərlə iş təcrübəsi də böyük üstünlükdür. Müşavirədə Prezident İlham Əliyev diqqətə çatdırdı ki, Azərbaycan iqtisadiyyatına son 20 il ərzində 350 milyard dollardan çox sərmayə qoyulub. 30 ildən çox davam edən neft-qaz layihələri necə imzalanıbsa, bu gün elə də icra edilir. Bu təcrübə əlbəttə ki, rəqəmsal dünyada aparıcı rol oynayan şirkətlərlə münasibətlərdə də özünü göstərməlidir. “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə Prezident İlham Əliyev bir sıra vəzifələri müəyyənləşdirdi. Ölkə başçısı qeyd etdi ki, dövlət qurumları arasında sıx təmaslar olmalıdır, pərakəndəliyə yol verilməməlidir və qısa müddət ərzində Rəqəmsal İnkişaf və Nəqliyyat Nazirliyi dövlət qurumları ilə birlikdə tədbirlər planı hazırlamalıdır.

Ölkə başçısının tapşırığına əsasən dövlət xidmətləri vahid mərkəzdən yəni, “mygov” üzərindən həyata keçiriləcək. Bu sahədə kadr hazırlığı həyata keçiriləcək, kibertəhlükəsizlik məsələləri gücləndiriləcək, süni intellektin tətbiqi dövlət qurumlarında geniş vüsət alacaq. Süni intellektin özəl sektorda tətbiqi üçün də dəstək mexanizmləri işlənib hazırlanacaq. Bir sözlə, bu sahədə konkret fəaliyyət planı hazırlanacaq ki, ölkəmizin davamlı inkişafı təmin olunsun.

Əlişah Rəcəbov

YAP Ağdaş rayon təşkilatını sədri

Paylaş:

Baxılıb: 448 dəfə