Yeni Azərbaycan Partiyası dünənin, bu günün və gələcəyin partiyasıdır

Bakı:

23 °C

78 %

6 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası dünənin, bu günün və gələcəyin partiyasıdır

Yeni Azərbaycan Partiyası dünənin, bu günün və gələcəyin partiyasıdır

20.11.2013 [09:18]

YAP-ın yaranmasının 21-ci ildönümü Daşkəsən rayonunda təntənəli surətdə qeyd edilib
Daşkəsən rayonunda Yeni Azərbaycan Partiyasının (YAP) yaranmasının 21-ci ildönümü münasibətilə partiyanın rayon təşkilatının təşəbbüsü və təşkilatçılığı ilə keçirilən silsilə tədbirlərə yekun vurulub. Dünən bu məqsədlə şəhərin “Yeni həyat” şadlıq evində tədbir keçirilib.
Tədbirdə çıxış edən Daşkəsən rayon İcra Hakimiyyətinin başçısı Əhəd Abıyev deyib ki, Yeni Azərbaycan Partiyası tarixi zərurətdən yaranıb: “Belə ki, 1991-ci ildə dövlət müstəqilliyini qazandıqdan sonra ölkəmiz faciələrlə üzləşdi. Bacarıqsız rəhbərlərin hakimiyyət uğrunda çəkişmələri, şəxsi maraqların dövlət mənafelərindən üstün tutulması daxili ictimai-siyasi sabitliyin pozulmasına gətirib çıxarmışdı. Belə bir vəziyyətdə xalqı ağır durumdan çıxarmağa, onun sabaha inamını qaytarmağa qadir olan siyasi partiyanın yaradılması tarixin tələbi idi. 1992-ci ilin noyabr ayında Azərbaycanın mütərəqqi qüvvələrinin Ulu öndər Heydər Əliyevin ətrafında sıx birləşməsi və xalqımızın həyatını kökündən dəyişdirən Yeni Azərbaycan Partiyasının yaradılması Azərbaycanın müasir tarixində çox mühüm hadisəyə çevrildi. Ümummilli lider Heydər Əliyevin apardığı məqsədyönlü daxili və xarici siyasət nəticəsində atəşkəs əldə edildi, böhran aradan qaldırıldı, ölkəmiz müstəqil dövlət kimi demokratik prinsiplər əsasında formalaşmağa başladı. Ulu öndərin siyasi kursunun layiqli davamçısı möhtərəm Prezidentimiz cənab İlham Əliyev tərəfindən uğurla həyata keçirilən siyasət nəticəsində ölkə iqtisadiyyatında yeni inkişaf mərhələsinin əsası qoyuldu. Son 10 ildə ölkədə əfsanə kimi görünən işlər real həyatda əksini tapdı. Eyni zamanda, bölgələrimizlə yanaşı, rayonumuz da öz simasını dəyişərək Avropa şəhərlərini xatırladır”.
Daşkəsən rayonunun sosial-iqtisadi inkişafından da danışan Əhəd Abıyev deyib ki, təkcə 2013-cü ildə rayonun Quşçu, Mollahəsənli, Muşavaq, Əmirvar, Əmirvar-Əhmədli, Bayan kəndlərində və Daşkəsən qəsəbəsində yeni müasir tipli məktəb binaları tikilib, 5 nömrəli şəhər uşaq bağçasının əsaslı təmir işləri başa çatdırılaraq istifadəyə verilib: “Hazırda Daşkəsən rayon İcra Hakimiyyətinin yeni və müasir tipli inzibati binasının, şəhər avtovağzal kompleksinin tikintisi uğurla davam etdirilir. Çovdar qızıl zavodunda, Statistika idarəsinin inzibati binasında, Xoşbulaq kəndində Gənclərin Təlim və İstirahət mərkəzində, Daşkəsən şəhərində və Quşçu qəsəbəsində 16 mənzilli yaşayış binalarında son tamamlama işləri aparılır. Şəhərimizdə “Yeni həyat” şadlıq sarayının inşası, şəhərin küçələrinin asfaltlaşdırılması, su-kanalizasiya xətlərinin dəyişdirilməsi, 32-dən artıq çoxmərtəbəli yaşayış binalarının dam örtüklərinin müasir tipli yeni dəmir örtüklü şiferlərlə əvəz olunması, istinad divarlarının, bordurların təmir edilməsi, rayonun girəcəyində Bayraq meydanının və istirahət parkının istifadəyə verilməsi belə deməyə əsas verir ki, “Yeni Daşkəsən” layihəsi uğurla icra olunmaqdadır. Həmçinin, bu il ərzində Bayan kəndində müasir tipli yeni poçt binası tikilmiş, Quşçu kəndinə isə yeni içməli su xətti çəkilmişdir.
Rayonumuzda Zağalı-Kollu-Çıraqlı və Xoşbulaq-Astaf avtomobil yollarının əsaslı təmir işləri də uğurla davam etdirilir. Bütün bunlar isə aparılan düzgün siyasətin, Yeni Azərbaycan Partiyasının dünənin, bu günün və gələcəyin partiyası olmasının bir daha əyani sübutudur. Bütün bu işlərin uğurlu həllində, qələbələrin qazanılmasında bizi ruhlandıran, gələcəyə inamla aparan Yeni Azərbaycan Partiyasının Sədri, dünya şöhrətli siyasətçi möhtərəm Prezidentimiz İlham Əliyevdir. Biz həmişə Onun ətrafında sıx birləşərək bu siyasətə sadiq qalacağıq”.
Daha sonra Əhəd Abıyev vurğulayıb ki, Yeni Azərbaycan Partiyasının rayon təşkilatı partiyanın Nizamnaməsinə uyğun olaraq partiyanın formalaşması, onun təşkilat strukturunun möhkəmləndirilməsi istiqamətində xeyli işlər görüb: “Bu illər ərzində Gənclər Birliyinin, Qadınlar Şurasının, təşkilat və ideoloji şöbələrin işi daha da genişlənmiş, rayon təşkilatının ilk partiya təşkilatları ilə əlaqələri möhkəmlənmiş, partiyada maarifçilik işi güclənmişdir. Partiyaya daxil olan üzvlərin sayı kəmiyyət və keyfiyyətcə daha da yaxşılaşmışdır. Bu gün 4033 nəfər Yeni Azərbaycan Partiyasının üzvü Daşkəsən rayon təşkilatında birləşmişdir”.
Daha sonra çıxış edən YAP Daşkəsən rayon təşkilatının sədri Meydanəli Yolçuyev və digərləri partiyanın ötən 21 ildə keçdiyi şərəfli yoldan, Azərbaycan xalqının rifahı və dövlətimizin güclənməsi naminə gördüyü böyük işlərdən danışıblar.
Sonda bir qrup YAP fəalına 9 oktyabrda keçirilən prezident seçkilərində və YAP Daşkəsən rayon təşkilatının tədbirlərində fəal iştirakına görə Daşkəsən rayon İcra Hakimiyyəti başçısının Fəxri fərmanları və YAP sıralarına qəbul olunmuş bir qrup gəncə partiyanın üzvlük vəsiqələri təqdim olunub.

Paylaş:

Baxılıb: 1379 dəfə