1 Avqust – Azərbaycan əlifbası və Azərbaycan dili günü: Milli kimliyimizin və dövlətçiliyimizin möhkəm təməli

Bakı:

26 °C

65 %

3 m/s

AZ RU EN

Ana səhifə / YAP xəbərləri / 1 Avqust – Azərbaycan əlifbası və Azərbaycan dili günü: Milli kimliyimizin və dövlətçiliyimizin möhkəm təməli

1 Avqust – Azərbaycan əlifbası və Azərbaycan dili günü: Milli kimliyimizin və dövlətçiliyimizin möhkəm təməli

29.07.2026 [17:14]

Hər il avqustun 1-i ölkəmizdə Azərbaycan əlifbası və Azərbaycan dili günü kimi qeyd olunur. Bu əlamətdar tarix xalqımızın milli-mənəvi dəyərlərinə, dövlətçilik ənənələrinə və ana dilinə göstərilən yüksək ehtiramın ifadəsidir. Ümummilli Lider Heydər Əliyevin 2001-ci il 9 avqust tarixli Fərmanına əsasən təsis edilən bu əlamətdar gün latın qrafikalı Azərbaycan əlifbasına keçidin tam təmin olunması və dövlət dilimizin inkişafı istiqamətində həyata keçirilən məqsədyönlü siyasətin məntiqi nəticəsidir.

Azərbaycan dili xalqımızın milli kimliyini, tarixi yaddaşını, mədəniyyətini və mənəvi dəyərlərini yaşadan ən böyük sərvətlərimizdəndir. Ulu Öndər Heydər Əliyev ana dilimizin qorunmasını və inkişafını hər zaman dövlət siyasətinin prioritet istiqamətlərindən biri hesab etmiş, bu sahədə mühüm tarixi qərarlar qəbul etmişdir. Dahi rəhbər deyirdi: “Biz dilimizlə fəxr etməliyik. Dil hər bir millətin milliliyinin əsasıdır.” Bu dəyərli fikirlər bu gün də Azərbaycan dövlətinin dil siyasətinin əsas ideoloji xəttini təşkil edir.

Sovet dövründə milli dillərin sıxışdırıldığı mürəkkəb ictimai-siyasi şəraitdə Heydər Əliyev böyük siyasi iradə nümayiş etdirərək Azərbaycan dilinin hüquqlarını qətiyyətlə müdafiə etmişdir. Məhz onun təşəbbüsü ilə 1978-ci il Azərbaycan SSR Konstitusiyasında “Azərbaycan Sovet Sosialist Respublikasının dövlət dili Azərbaycan dilidir” müddəası öz əksini tapmış, bununla da ana dilimizin dövlət dili kimi hüquqi statusu qorunmuşdur.

Müstəqillik illərində Ümummilli Lider tərəfindən həyata keçirilən ardıcıl dövlət dili siyasəti nəticəsində 1995-ci il Konstitusiyasında Azərbaycan dili dövlət dili kimi təsbit edilmiş, 2001-ci ildə “Dövlət dilinin tətbiqi işinin təkmilləşdirilməsi haqqında” Fərman imzalanmış, Azərbaycan Prezidenti yanında Dövlət Dil Komissiyası yaradılmış, 2002-ci ildə isə “Azərbaycan Respublikasında dövlət dili haqqında” Qanun qəbul olunmuşdur. Bu mühüm hüquqi sənədlər dövlət dilimizin tətbiqi və inkişafı istiqamətində möhkəm hüquqi baza formalaşdırmışdır.

Ulu Öndərin müəyyən etdiyi siyasi kurs bu gün Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyev tərəfindən uğurla davam etdirilir. Dövlət başçısının rəhbərliyi ilə Azərbaycan dilinin saflığının qorunması, qloballaşma şəraitində inkişaf etdirilməsi, elektron məkanda istifadəsinin genişləndirilməsi, latın qrafikalı nəşrlərin artırılması və dil normalarının tətbiqi istiqamətində ardıcıl tədbirlər həyata keçirilmişdir.

Prezident İlham Əliyev ana dilimizin qorunmasının milli təhlükəsizlik və milli kimlik məsələsi olduğunu xüsusi vurğulayaraq bildirir: “Azərbaycan dilinin saflığının qorunması hər bir Azərbaycan vətəndaşının işi olmalıdır.” Dövlət başçısı dəfələrlə qeyd etmişdir ki, Azərbaycan dili zənginliyi və ifadə imkanları ilə seçilən dillərdən biridir və onun saflığının qorunması hər bir vətəndaşın mənəvi borcudur.

Bu gün Azərbaycan dili yalnız ölkə daxilində deyil, dünyanın müxtəlif ölkələrində yaşayan milyonlarla soydaşımızı birləşdirən mühüm milli-mənəvi amildir. Ana dilimizin qorunması və inkişaf etdirilməsi Azərbaycan dövlətinin milli siyasətinin əsas istiqamətlərindən biri olaraq qalır. Bu istiqamətdə qəbul olunan dövlət proqramları, fərman və sərəncamlar dilimizin nüfuzunun daha da yüksəldilməsinə, gənc nəslin milli-mənəvi dəyərlər ruhunda tərbiyəsinə və dövlət dilinin cəmiyyət həyatının bütün sahələrində tətbiqinə mühüm töhfələr verir.

Yeni Azərbaycan Partiyası da Ulu Öndər Heydər Əliyevin müəyyən etdiyi ideoloji xəttə sadiq qalaraq milli-mənəvi dəyərlərimizin, ana dilimizin və dövlətçilik ənənələrimizin qorunmasını daim diqqət mərkəzində saxlayır. Partiyanın həyata keçirdiyi maarifləndirici tədbirlər və təşəbbüslər gənc nəslin Azərbaycan dilinə hörmət ruhunda yetişməsinə, milli kimliyimizin möhkəmləndirilməsinə xidmət edir.

1 Avqust – Azərbaycan əlifbası və Azərbaycan dili günü münasibətilə xalqımızı təbrik edir, hər bir vətəndaşı ana dilimizin saflığını qorumağa, onu düzgün işlətməyə və gələcək nəsillərə zəngin milli irs kimi ötürməyə çağırırıq. Çünki Azərbaycan dili milli varlığımızın, dövlət müstəqilliyimizin və xalqımızın mənəvi birliyinin ən möhkəm dayaqlarından biridir.

Anar Alışov

Yeni Azərbaycan Partiyası Yardımlı rayon təşkilatının sədri

Paylaş:

Baxılıb: 384 dəfə