20 Sentyabr – Dövlət Suverenliyi Günü: Azərbaycanın ərazi bütövlüyünün və suverenliyinin təntənəsi

Bakı:

24 °C

69 %

10 m/s

AZ RU EN

Ana səhifə / YAP xəbərləri / 20 Sentyabr – Dövlət Suverenliyi Günü: Azərbaycanın ərazi bütövlüyünün və suverenliyinin təntənəsi

20 Sentyabr – Dövlət Suverenliyi Günü: Azərbaycanın ərazi bütövlüyünün və suverenliyinin təntənəsi

18.09.2026 [23:37]

20 Sentyabr Azərbaycan xalqının tarixində mühüm əhəmiyyət daşıyan günlərdən biridir. Azərbaycan Respublikası Prezidentinin Sərəncamı ilə təsis edilmiş Dövlət Suverenliyi Günü ölkəmizin bütün ərazisində dövlət suverenliyinin tam bərpa olunmasının tarixi əhəmiyyətini ifadə edir. Bu əlamətdar gün Azərbaycan dövlətçiliyinin möhkəmlənməsini, milli birliyin və xalq–dövlət həmrəyliyinin təntənəsini nümayiş etdirir.

Azərbaycanın dövlət müstəqilliyi və suverenliyi xalqımızın uzun illər ərzində apardığı mübarizənin ən mühüm nəticələrindəndir. Müstəqilliyin ilk illərində ölkəmiz ciddi siyasi, iqtisadi və hərbi sınaqlardan keçmiş, torpaqlarımızın bir hissəsi işğala məruz qalmışdı. Buna baxmayaraq, Azərbaycan xalqı öz dövlətçiliyinə, milli iradəsinə və ərazi bütövlüyünün bərpa olunacağına inamını heç vaxt itirmədi.

Ulu Öndər Heydər Əliyevin müəyyən etdiyi dövlətçilik strategiyası Azərbaycanın gələcək inkişafının möhkəm təməlini formalaşdırdı. Dövlət institutlarının gücləndirilməsi, ordu quruculuğuna xüsusi diqqət yetirilməsi, ölkənin iqtisadi potensialının artırılması və milli həmrəyliyin möhkəmləndirilməsi sonrakı mərhələdə Azərbaycanın qarşısında duran mühüm məqsədlərin həyata keçirilməsi üçün geniş imkanlar yaratdı.

Bu siyasi kurs Prezident İlham Əliyevin rəhbərliyi ilə ardıcıl şəkildə davam etdirildi. Azərbaycanın iqtisadi və hərbi qüdrətinin artırılması, müasir və peşəkar ordunun formalaşdırılması, beynəlxalq mövqelərin möhkəmləndirilməsi dövlət suverenliyinin təmin olunması istiqamətində mühüm amillərə çevrildi. 2020-ci ildə Vətən müharibəsində qazanılan tarixi Zəfər nəticəsində ərazilərimizin böyük hissəsi işğaldan azad edildi və Azərbaycanın ərazi bütövlüyünün bərpası istiqamətində mühüm mərhələ başa çatdı.

2023-cü il sentyabrın 19–20-də keçirilmiş lokal xarakterli antiterror tədbirləri isə Azərbaycanın bütün ərazisində suverenliyinin bərpası ilə nəticələndi. Beləliklə, Azərbaycan Respublikasının dövlət bayrağının ölkənin bütün ərazilərində dalğalanması təmin edildi. Bu hadisə müstəqil Azərbaycanın dövlətçilik tarixində mühüm dönüş nöqtəsi kimi yadda qaldı.

Dövlət Suverenliyi Günü məhz bu tarixi reallığın gələcək nəsillərə çatdırılması baxımından xüsusi əhəmiyyət daşıyır. Suverenlik yalnız dövlət sərhədlərinin qorunması deyil, həm də xalqın öz taleyini sərbəst müəyyən etməsi, dövlətin bütün ərazisində konstitusion hüquq və qanunların təmin olunması deməkdir. Azərbaycanın suverenliyinin tam bərpa edilməsi ölkənin siyasi və hüquqi bütövlüyünün təmin olunmasının mühüm göstəricisidir.

Bu gün Qarabağ və Şərqi Zəngəzurda genişmiqyaslı bərpa və quruculuq işləri həyata keçirilir. İşğaldan azad edilmiş ərazilərdə yeni yollar, yaşayış məhəllələri, məktəblər, xəstəxanalar və digər sosial obyektlər inşa olunur, keçmiş məcburi köçkünlərin doğma yurdlarına qayıdışı təmin edilir. Bu proses Azərbaycanın suverenliyinin yalnız hərbi-siyasi müstəvidə deyil, sosial və iqtisadi baxımdan da möhkəmləndirilməsinə xidmət edir.

Dövlət Suverenliyi Günü həm də Azərbaycan xalqının milli birliyinin rəmzidir. Qarşıya qoyulan strateji məqsədlərin həyata keçirilməsində xalqımızın həmrəyliyi, dövlətə və dövlətçilik ideyalarına bağlılığı mühüm rol oynayır. Azərbaycan xalqı tarixinin müxtəlif mərhələlərində olduğu kimi, bu gün də müstəqil dövlətinin inkişafı və gələcək nəsillərin firavan həyatı naminə birlik nümayiş etdirir.

Bu əlamətdar gün bizə dövlət müstəqilliyinin və suverenliyin nə qədər böyük milli sərvət olduğunu bir daha xatırladır. Azərbaycanın ərazi bütövlüyünün və dövlət suverenliyinin tam təmin edilməsi xalqımızın çoxəsrlik dövlətçilik tarixində yeni səhifə açmışdır. Bu tarixi nailiyyətin qorunması, möhkəmləndirilməsi və gələcək nəsillərə ötürülməsi hər bir vətəndaşın mühüm vəzifələrindən biridir.

20 Sentyabr – Dövlət Suverenliyi Günü Azərbaycan xalqının milli qürurunu, dövlətimizin gücünü və müstəqilliyimizin əbədiliyini ifadə edən əlamətdar tarixdir. Bu gün ölkəmizin bütün ərazisində üçrəngli Azərbaycan bayrağının dalğalanması, dövlətimizin Konstitusiyasının və qanunlarının bütün ölkə ərazisində tətbiq olunması müstəqil Azərbaycanın əldə etdiyi tarixi nailiyyətin ən mühüm göstəricilərindəndir. Dövlət Suverenliyi Gününün hər il qeyd olunması bu tarixi həqiqətin yaddaşlarda yaşadılmasına və gələcək nəsillərə çatdırılmasına mühüm töhfə verir.

Rauf Nəcəfov

YAP Sədərək rayon təşkilatının məsləhətçisi

Paylaş:

Baxılıb: 48 dəfə