20 Sentyabr – Xankəndi, Xocalı, Xocavənd və Ağdərə şəhərləri günü milli qudurətimizi və tarixi ədalətin bərpasını təcəssüm etdirən əlamətdar tarixlərdən biridir

Bakı:

26 °C

69 %

3 m/s

AZ RU EN

Ana səhifə / YAP xəbərləri / 20 Sentyabr – Xankəndi, Xocalı, Xocavənd və Ağdərə şəhərləri günü milli qudurətimizi və tarixi ədalətin bərpasını təcəssüm etdirən əlamətdar tarixlərdən biridir

20 Sentyabr – Xankəndi, Xocalı, Xocavənd və Ağdərə şəhərləri günü milli qudurətimizi və tarixi ədalətin bərpasını təcəssüm etdirən əlamətdar tarixlərdən biridir

21.09.2026 [13:03]

20 Sentyabr – Xankəndi, Xocalı, Xocavənd və Ağdərə şəhərləri günü Azərbaycanın müasir dövlətçilik salnaməsində müstəsna yer tutan, milli qudurətimizi və tarixi ədalətin bərpasını təcəssüm etdirən əlamətdar tarixlərdən biridir. Məhz buna görə 20 sentyabrın Dövlət Suverenliyi Günü, eləcə də Xankəndi, Xocalı, Xocavənd və Ağdərə şəhərləri günü kimi qeyd olunması xüsusi məna daşıyır. Bu gün həmin şəhərlərin adı Azərbaycan tarixinin ağrılı səhifələrindən daha çox, qayıdışın, dirçəlişin və quruculuğun ünvanı kimi səslənir. Bir vaxtlar həsrət və nisgil ifadə edən bu adlar indi yenidən qurulan küçələr, ucaldılan binalar, açılan məktəblər, yaradılan yeni sosial və iqtisadi imkanlarla Azərbaycanın gələcəyinə bağlanır. Bu tarixi prosesdə Prezident İlham Əliyevin azad edilmiş ərazilərə ardıcıl səfərləri xüsusi əhəmiyyət daşıyır. Dövlət başçısının Xankəndi, Xocalı, Xocavənd və Ağdərəyə səfərləri, burada Azərbaycan Bayrağını ucaltması, həyata keçirilən bərpa-quruculuq işləri ilə tanış olması və sakinlərlə görüşləri Qarabağda yeni həyatın qurulmasının mühüm səhifələrini təşkil edir.
20 sentyabr həm keçmişə ehtiramla baxdığımız, həm də gələcəyə inamla addımladığımız gündür. Bu tarix suverenliyin yalnız bir anlayış deyil, xalqın dövlətçilik iradəsinin və milli birliyinin ifadəsi olduğunu göstərir.
Bu gün Qarabağ və Şərqi Zəngəzurda genişmiqyaslı quruculuq və bərpa işləri həyata keçirilir. Dağıdılmış şəhər və kəndlərin yenidən qurulması, müasir infrastrukturun yaradılması, sosial obyektlərin istifadəyə verilməsi, yolların və digər kommunikasiya xətlərinin bərpası istiqamətində mühüm layihələr icra olunur. Qarabağın yenidən dirçəldilməsi Azərbaycanın iqtisadi və sosial inkişafının mühüm istiqamətlərindən biridir. Bu gün Xankəndi, Xocalı, Xocavənd və Ağdərəyə baxarkən yalnız keçmişin izlərini deyil, Azərbaycanın gələcəyinin mənzərəsini də görmək mümkündür. Dağıntıların yerində qurulan yeni binalar, salınan yollar, yaradılan sosial obyektlər və doğma torpaqlarına qayıdan insanlar Qarabağda yeni həyatın artıq reallığa çevrildiyini göstərir. Prezident İlham Əliyevin bu ərazilərə mütəmadi səfərləri və burada həyata keçirilən layihələrlə yerində tanış olması dövlətin Qarabağın bərpasına və Böyük Qayıdış prosesinə verdiyi əhəmiyyətin göstəricilərindən biridir.
Xankəndidə, Xocalıda, Xocavənddə və Ağdərədə görülən işlər təkcə şəhərlərin fiziki simasının yenilənməsi deyil, həm də tarixi yaddaşın, milli-mədəni irsin və həyatın yenidən canlandırılması prosesidir. 20 sentyabr bizə bir daha xatırladır ki, dövlətçilik tarixində qazanılan nailiyyətlər gələcək nəsillər üçün böyük məsuliyyət yaradır. Suveren Azərbaycanın ərazisində dalğalanan üçrəngli bayrağımız, doğma yurdlarına qayıdan insanların sevinc dolu simaları və Qarabağda ucalan yeni şəhərlər bu tarixi yolun davam etdiyini göstərir. Xankəndi, Xocalı, Xocavənd və Ağdərə artıq Azərbaycanın yalnız tarixi yaddaşında deyil, bu günündə və sabahındadır. Azad Qarabağda dalğalanan üçrəngli bayrağımızın kölgəsində bu şəhərlər əbədi olaraq yaşayacaq və inkişaf edəcəkdir.

Azər Ağayev
YAP Tərtər rayon təşkilatının sədr müavini

Paylaş:

Baxılıb: 99 dəfə