Dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblər

Bakı:

23 °C

83 %

8 m/s

AZ RU EN

Ana səhifə / YAP xəbərləri / Dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblər

Dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblər

15.10.2026 [16:45]

Geyim qaydaları məktəb mədəniyyətinin və pedaqoji məsuliyyətin mühüm tərkib hissəsidir

Təhsil müəssisəsi yalnız bilik və bacarıqların formalaşdırıldığı məkan deyil, eyni zamanda şəxsiyyətin inkişaf etdiyi, milli-mənəvi dəyərlərin və davranış mədəniyyətinin aşılandığı mühüm sosial mühitdir. Bu baxımdan, dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblərə əməl olunması xüsusi əhəmiyyət daşıyır. Geyim qaydaları məktəbdə vahidlik, səliqə, intizam və işgüzar mühitin formalaşmasına xidmət edir.

Azərbaycan Respublikasının “Ümumi təhsil haqqında” Qanununa 7 iyul 2026-cı il tarixində edilmiş dəyişikliklərə əsasən, dövlət ümumi təhsil müəssisələrində həm təhsilalanların, həm də təhsilverənlərin geyimlə bağlı tələblərə riayət etməsi nəzərdə tutulub. Qanuna əsasən, təhsilverənlərin geyimi ilə bağlı tələblər müvafiq icra hakimiyyəti orqanının müəyyən etdiyi qurum tərəfindən müəyyən olunur. Eyni zamanda, valideynlərin və ya digər qanuni nümayəndələrin uşaqlarının geyim forması ilə bağlı tələblərə əməl etməsini təmin etmək vəzifəsi müəyyənləşdirilib.

Bu müddəalar geyim məsələsinin yalnız şəxsi seçim deyil, həm də qanunvericiliklə tənzimlənən məsuliyyət sahəsi olduğunu göstərir.

Dövlət ümumi təhsil müəssisələrində şagirdlərin geyim forması Azərbaycan Respublikası Nazirlər Kabinetinin 17 mart 2022-ci il tarixli 96 nömrəli Qərarı ilə təsdiq edilmiş qaydalara və sonrakı dəyişikliklərə uyğun olmalıdır.

Məktəbli geyimi şagirdlərin yaş xüsusiyyətlərinə, sağlamlığına və təhsil mühitinin tələblərinə uyğun seçilməlidir. Geyim formaları möhkəm, keyfiyyətli, rahat və sağlamlığa mənfi təsir göstərməyən parçalardan hazırlanmalıdır. Qaydalar çərçivəsində yay və qış geyim dəstləri nəzərdə tutulur. Məktəblərdə müəyyən edilmiş vahid geyim formasına riayət olunması tələb edilir.

2026-cı ilin sentyabr ayında edilmiş dəyişikliklərə əsasən, geyim formasının vahidliyini pozan, eləcə də ümumi təhsilin dünyəvilik prinsipinə uyğun olmayan əlavə geyim elementlərindən istifadəyə yol verilmir.

Şagirdlərin müəyyən olunmuş geyim formasında dərsə gəlməsinə valideynlər və ya digər qanuni nümayəndələr məsuliyyət daşıyırlar. Məktəb rəhbərliyi isə müvafiq tələblərin yerinə yetirilməsinə nəzarət edir.

Müəllim məktəbdə yalnız bilik verən şəxs deyil, həm də şagirdlər üçün davranış və mədəniyyət nümunəsidir. Buna görə də onun geyimi pedaqoji fəaliyyətin xarakterinə, məktəbin işgüzar mühitinə və peşə etikasına uyğun olmalıdır.

Azərbaycan Respublikası Nazirlər Kabinetinin 6 oktyabr 2026-cı il tarixli 325 nömrəli Qərarı ilə dövlət ümumi təhsil müəssisələrində təhsilverənlərin geyiminə dair xüsusi tələblər təsdiq edilib. Bu qərar müəllimlərin xarici görünüşü ilə bağlı məsələlərin vahid normativ çərçivədə tənzimlənməsinə yönəlib.

Təhsilverənlərin geyimi səliqəli, təmiz, münasib və peşəkar fəaliyyətə uyğun olmalıdır. Geyim müəllimin nüfuzuna, tədris prosesinin ciddiliyinə və məktəbdə formalaşdırılan etik mühitə uyğun seçilməlidir. Eyni zamanda, geyimlə bağlı tələblərin tətbiqi müəllimin şəxsi ləyaqətinə və peşəkar fəaliyyətinə hörmət prinsipi əsasında həyata keçirilməlidir.

Geyim qaydalarının səmərəli tətbiqi üçün məktəb rəhbərliyinin, pedaqoji kollektivin, şagirdlərin və valideynlərin əməkdaşlığı vacibdir. Məktəb rəhbərliyi qüvvədə olan normativ sənədlərin tələblərini kollektivə izah etməli, onların icrasına nəzarət etməli və yaranan məsələlərin qanunvericiliyə uyğun həllini təmin etməlidir.

Geyim qaydalarına riayət olunması ilə bağlı məsələlərdə pedaqoji yanaşma, maarifləndirmə və qarşılıqlı anlaşma əsas götürülməlidir. Şagirdlərlə iş zamanı onların yaş xüsusiyyətləri və sosial vəziyyətləri nəzərə alınmalı, heç bir şagirdin geyiminə görə alçaldılmasına və ayrı-seçkiliyə məruz qalmasına yol verilməməlidir.

Valideynlərin bu prosesdə iştirakı da mühüm əhəmiyyət daşıyır. Onların məktəblə əməkdaşlığı vahid geyim qaydalarının düzgün tətbiqinə və uşaqlarda məsuliyyət hissinin formalaşmasına kömək edir.

Dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblərin əsas məqsədi məktəbdə səliqəli, intizamlı, bərabər və sağlam təhsil mühitinin formalaşdırılmasıdır. Vahid geyim qaydaları məktəb mədəniyyətinin möhkəmlənməsinə, qarşılıqlı hörmətin inkişafına və tədris prosesinin işgüzar xarakterinin qorunmasına xidmət edir.

Bu tələblərin həyata keçirilməsində əsas prinsip qanunvericiliyə əməl olunması, pedaqoji etikanın qorunması, milli-mənəvi dəyərlərə hörmət və hər bir təhsil iştirakçısının hüquq və ləyaqətinə diqqətlə yanaşılmasıdır.

Məktəb ailə və cəmiyyətlə birgə çalışaraq bu qaydaların formal tələb kimi deyil, ümumi təhsil mədəniyyətinin ayrılmaz hissəsi kimi mənimsənilməsinə nail olmalıdır.

Gülnaz Rüstəmova

YAP Babək rayon təşkilatının əməkdaşı

Paylaş:

Baxılıb: 19 dəfə

Xəbər lenti

Hamısına bax