Yeni Azərbaycan Partiyası ötən müddət ərzində zəngin və şərəfli inkişaf yolu keçib

Bakı:

24 °C

71 %

3 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası ötən müddət ərzində zəngin və şərəfli inkişaf yolu keçib

Yeni Azərbaycan Partiyası ötən müddət ərzində zəngin və şərəfli inkişaf yolu keçib

25.01.2018 [10:13]

YAP Şərur rayon təşkilatının yaranmasının 25-ci ildönümü münasibətilə tədbir keçirilib
Yeni Azərbaycan Partiyası (YAP) Şərur rayon təşkilatının yaranmasının 25-ci ildönümü münasibətilə tədbir keçirilib.
Tədbiri giriş sözü ilə açan YAP Şərur rayon təşkilatının sədri, Naxçıvan Muxtar Respublikası Ali Məclisinin deputatı Əmir Babayev qeyd edib ki, öz fəaliyyətini Ümummilli liderimiz Heydər Əliyevin ideyaları əsasında uğurla davam etdirən Yeni Azərbaycan Partiyası ötən müddət ərzində zəngin və şərəfli inkişaf yolu keçib. Onun sözlərinə görə, cəmiyyətin avanqard siyasi qüvvəsi kimi YAP xalqımızın qarşısında duran vəzifələrin yerinə yetirilməsinə özünün layiqli töhfəsini verib.
1993-cü il yanvarın 23-də yaradılan YAP Şərur rayon təşkilatının öz fəaliyyətini uğurla davam etdirdiyini deyən Əmir Babayev əlavə edib ki, rayon təşkilatı sıralarında 10 min 424 nəfər partiya üzvünü birləşdirir. Üzvlərin 31 faizini (3 min 238 nəfər) gənclər, 29,5 faizini (3 min 81 nəfər) qadınlar təşkil edir. Ötən il YAP Şərur rayon təşkilatının sıralarına 121 nəfər qəbul olunub ki, bunların da 63 nəfərini qadınlar, 112 nəfəri gənclər təşkil edir.
YAP Naxçıvan Muxtar Respublika təşkilatının İcra katibi, Naxçıvan Muxtar Respublikası Ali Məclisinin deputatı Anar İbrahimov isə diqqətə çatdırıb ki, 1992-ci il noyabrın 21-də Naxçıvan şəhərində Ulu öndər Heydər Əliyev tərəfindən yaradılan Yeni Azərbaycan Partiyası öz fəaliyyəti ilə müstəqillik tariximizə adını ümumxalq partiyası kimi yazdırıb. Ümummilli lider Heydər Əliyevin banisi olduğu Yeni Azərbaycan Partiyasının fəaliyyətinin Azərbaycanda milli həmrəylik və bütövlüyü, ictimai-siyasi sabitliyi, sürətli inkişafı təmin etdiyini deyən Anar İbrahimov əlavə edib ki, bu gün cəmiyyətimizin bütün təbəqələrindən olan insanlar Yeni Azərbaycan Partiyasına üz tuturlar: “Yeni Azərbaycan Partiyasının fəaliyyətinin uğurlu nəticələrini göstərən faktlardan biri də budur ki, partiyamız 1993-cü ildən etibarən keçirilən bütün seçkilərdə qələbə qazanıb”.
Daha sonra çıxış edən Şərur rayon İcra Hakimiyyətinin başçısı Kamal Cəfərov YAP-ın yaranma tarixi, partiyanın əldə etdiyi nailiyyətlər və ölkənin ictimai-siyasi həyatındakı rolundan bəhs edib. Onun sözlərinə görə, Yeni Azərbaycan Partiyası çətin tarixi dövrdə yaranıb və partiyanın yaranması ictimai-siyasi zərurətdən doğub. YAP-ın Ümummilli lider Heydər Əliyevin ideyaları əsasında inkişaf etdiyini deyən Kamal Cəfərov qeyd edib ki, Prezident İlham Əliyevin uğurlu siyasəti sayəsində ölkəmizin inkişafı təmin edilib və Yeni Azərbaycan Partiyası cəmiyyətimizdə alternativsiz siyasi qüvvə kimi qəbul edilir.
Tədbirdə çıxış edən İbadulla kənd tam orta məktəbinin müəllimi Ülkər Məmmədova və YAP Şərur rayon təşkilatı Gənclər Birliyinin sədri Mirkərim Seyidov YAP-ın keçdiyi zəngin və şərəfli inkişaf yolundan bəhs ediblər.
Sonda YAP sıralarına qoşulmuş bir qrup gəncə partiyanın üzvlük vəsiqələri təqdim olunub.
Nurlan QƏLƏNDƏRLİ

Paylaş:

Baxılıb: 914 dəfə