Dahi şəxsiyyət Heydər Əliyevin qurtuluş missiyası tariximizə xilaskarlıq salnaməsini yazdı

Ana səhifə / YAP xəbərləri / Dahi şəxsiyyət Heydər Əliyevin qurtuluş missiyası tariximizə xilaskarlıq salnaməsini yazdı

Dahi şəxsiyyət Heydər Əliyevin qurtuluş missiyası tariximizə xilaskarlıq salnaməsini yazdı

13.06.2022 [14:02]

Ramil Orucov,

YAP Gəncə şəhər təşkilatının sədri

Azərbaycanın güclü, qüdrətli dövlətə çevrilməsi ölkəmizin tarixinə qızıl hərflərlə yazılmış 15 İyun-Milli Qurtuluş Gününün bəhrələridir. Bu qurtuluş tarixini yaradan, xalqımıza bəxş edən, böyük risklərə baxmayaraq, dövlətin və dövlətçiliyin qorunması məsuliyyətini öz üzərinə götürən dahi şəxsiyyət Ulu Öndər Heydər Əliyevdir.

Milli lider, qüdrətli dövlət xadimi kimi Ulu Öndər Heydər Əliyev 1993-cü il 15 iyun tarixindən müasir Azərbaycanın yeni inkişaf tarixinin müəllifi oldu. Xilası günü, qurtuluş günü kimi Azərbaycanın siyasi tarixinə həkk olunan həmin gündən Ulu Öndərimizin zəngin təcrübəyə, parlaq zəkaya, ali liderlik qabiliyyətinə, yüksək idarəçiliyə əsaslanan siyasəti nəticəsində müstəqil Azərbaycanımızın inkişaf yolunun başlanğıcının təməli qoyuldu.

XX əsrin sonlarında ölkəmizin və xalqımızın xilaskarı kimi adı tariximizə yazılan Ulu Öndər Heydər Əliyevin hakimiyyətə qayıdışı ilə Azərbaycan dərin ictimai-siyasi və iqtisadi böhrandan, müstəqilliyini itirmək təhlükəsindən, parçalanmaq təhlükəsindən xilas oldu.

1991-1993-cü illər ölkəmizin müasir tarixində hərc-mərclik, özbaşınalıq, avantürist eksperimentlər dövrünə, Azərbaycanın taleyi ilə bağlı narahatlıqlara Ümummilli Lider Heydər Əliyevin xalqın təkidli tələbi ilə hakimiyyətə qayıdışı nəticəsində, uzaqgörən siyasi fəaliyyəti sayəsində son qoyuldu. O zaman ölkəyə “rəhbərlik” edən qüvvələr də Azərbaycanı məruz qoyduqları təhlükədən xilas etmək üçün Ulu Öndər Heydər Əliyevin Bakıya gəlməsini yeganə çıxış yolu kimi dəyərləndirirdilər. Bu tarixi qayıdış xalqımızı fəlakətdən xilas etdi. Böyük xilaskarın Bakıya gəlməsi xəbəri xalq tərəfindən sevinclə qarşılandı. 1993-cü il iyunun 15-də isə Heydər Əliyev Azərbaycan Respublikası Ali Sovetinin Sədri seçildi. Azərbaycanda davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. Qısa müddətdə ölkədə ictimai-siyasi sabitlik bərpa olundu.

Yenə xalqın təkidli tələbi ilə Milli Məclis 1997-ci ilin iyununda bu günü bayram elan etdi. Beləliklə, bu mühüm tarixi gün xalqımızın yaddaşına Milli Qurtuluş Günü kimi daxil oldu, Azərbaycanın bu gününü, sabahını müəyyənləşdirdi, dövlətçilik tariximizin şanlı səhifəsinə çevrildi.

Ölkəmizin qüdrətli dövlət kimi inamlı inkişafı, tərəqqisi, milli-mənəvi yüksəlişi, azərbaycançılıq ideyalarının bərqərar olması məhz ümumbəşəri xüsusiyyətləri özündə cəmləşdirən Ulu Öndər Heydər Əliyevin adı ilə bağlıdır. Dahi şəxsiyyətin hakimiyyətə qayıdışı milli müstəqilliyimizin əbədiliyinin təminatı oldu.

Gələcəyimizin daha parlaq, işıqlı olacağına böyük əminlik yaradan o tarixi qayıdış bu gün öz bəhrəsini verir. Ötən dövrə nəzər saldıqda bir daha aydın olur ki, Ulu Öndərin ikinci dəfə hakimiyyətə qayıdışı gerçəkləşməsəydi, bu gün müstəqil, qüdrətli, sürətlə və davamlı inkişaf edən, tərəqqi yolunda inamla irəliləyən, şanlı zəfərlər qazanan Azərbaycan dövləti olmazdı.

Bu gün Ümummilli Lider Heydər Əliyevin layiqli davamçısı Prezident, Müzəffər Ali Baş Komandan cənab İlham Əliyevin rəhbərliyi ilə həyata keçirilən siyasət nəticəsində ölkəmiz güclü və nüfuzlu dövlətlər sırasında mətin addımlarla addımlayır.

Ən əsası, dahi şəxsiyyət Heydər Əliyevin qurtuluş missiyası Azərbaycan tarixində xilaskarlıq salnaməsini yazdı. Ulu Öndərimizin ən böyük arzusu Azərbaycanı bütöv görmək arzusu artıq reallığa çevrildi. Ata vəsiyyətini yerinə yetirən ölkə Prezidentimiz cənab İlham Əliyevin məqsədyönlü siyasəti nəticəsində bu gün şanlı Azərbaycan Ordusu Vətən müharibəsində parlaq Qələbə qazanıb, ölkəmizin ərazi bütövlüyü təmin olunub, düşmən işğalından azad edilən torpaqlarımızda üçrəngli bayrağımız əzəmətlə dalğalanır. Ümummilli Liderin layiqli davamçısı Prezident cənab İlham Əliyevin rəhbərliyi ilə həyata keçirilən siyasət nəticəsində 30 ilə yaxın müddət ərzində işğal altında qalan torpaqlarımız əsarətdən xilas edilib.

Ölkəmizin ərazi bütövlüyünün təmin olunması, tarixi ədalətin bərpası, Azərbaycanın yeni nailiyyətlər qazanaraq güclü və nüfuzlu dövlətlər sırasında öz mövqeyini daha da möhkəmləndirməsi məhz Ulu Öndər Heydər Əliyev siyasətinin, Ulu Öndərin layiqli davamçısı Prezident cənab İlham Əliyevin uğurlu strategiyasının təntənəsidir.

Bu gün milli qurtuluşdan başlanan Azərbaycanın gələcəyi daha parlaq görünür. Çünki müstəqil Azərbaycanın idarəçilik sükanı Ulu Öndər Heydər Əliyevin siyasi varisi Prezident cənab İlham Əliyevin əlindədir.

Paylaş:

Baxılıb: 74 dəfə

Xəbər lenti

Hamısına bax