Səmərqənd zirvə görüşü tarixi dostluğumuzun nəticəsidir

Bakı:

26 °C

57 %

10 m/s

Əlaqə

AZ RU EN

Ana səhifə / YAP xəbərləri / Səmərqənd zirvə görüşü tarixi dostluğumuzun nəticəsidir

Səmərqənd zirvə görüşü tarixi dostluğumuzun nəticəsidir

12.11.2022 [12:24]

Azərbaycanla Özbəkistan arasında qarşılıqlı münasibətlər uzaq əsrlərə gedib çıxan tarixi sağlam köklər üstündə bərqərar olub. Ölkələrimiz 70 ilə qədər SSRİ-nin tərkibində müttəfiq respublikalar kimi fəalliyət göstərib.

İki ölkə arasında diplomatik əlaqələr 1995-ci il oktyabr ayının 2-də qurulub. Növbəti ildə ulu öndər Heydər Əliyev Türkdilli Dövlət Başçılarının IV Forumunda Özbəkistanda səfərdə olub. 1997-ci ildə ümummilli liderin Özbəkistana rəsmi səfəri münasibətlərin inkişafında yeni mərhələ təşkil edib.

Prezident İlham Əliyevin Özbəkistana ilk dövlət səfəri 2004-cü ilin mart ayına təsadüf edib. Özbəkistanın o vaxtkı Prezidenti İslam Kərimov isə Azərbaycana 2008-ci ilin sentyabrında rəsmi səfərə gəlib. Təkbətək və geniş tərkibdə görüşlərdən sonra dövlətlər arasında mühüm sənədlər imzalanıb. Qardaş ölkədə Azərbaycanla ənənəvi mədəni-ədəbi dostluq, etimad və qarşılıqlı anlaşma münasibətlərinin olması fərəh doğuran faktlardır.

Birləşmiş Millətlər Təşkilatı və Türk Dövlətləri Təşkilatı, MDB, ATƏT, Qoşulmama Hərəkatı və digər beynəlxalq təşkilatlar çərçivəsində dialoqlarımız da konstruktiv xarakter daşıyır, qarşılıqlı dəstəyin vacibliyini önə çəkir. Görünən budur ki, artıq Türkiyə, Azərbaycan, Özbəkistan ,Qazaxıstan və digər qardaş ölkələrin dünyada böyük türk birliyinə doğru inamla irəliləmələri zamanın aşkar reallığına çevrilməkdədir.

Eyni soya, ortaq tarixə və mədəniyyətə, milli adət-ənənələrə malik olan Azərbaycan və Özbəkistan arasında dostluq və qardaşlığın kökləri tarixin dərin qatlarına gedib çıxır. Son illər ərzində iki ölkə arasında əlaqələr daha da möhkəmlənib. Azərbaycan və Özbəkistan dövlət müstəqilliklərini əldə etdikdən sonra tarixi dostluq və qardaşlıq münasibətləri daha da inkişaf etdirildi və uzun illərin sınağından çıxaraq bugünkü səviyyəsinə gəlib çatdı. Müstəqillik illərində iki qardaş ölkə arasında əlaqələrin inkişafında, dövlətlərarası münasibətlərin formalaşmasında ulu öndər Heydər Əliyevin və Özbəkistanın sabiq Prezidenti İslam Kərimovun müstəsna xidmətləri olub.
Noyabrın 11-də Səmərqənddə Türk Dövlətləri Təşkilatının IX Zirvə Görüşünün keçirilməsi və Prezident İlham Əliyevin tədbirdə yaxından iştirak etməsi təqdirəlayiq bir addımdır. Dövlətimizin başçısı oradakı çıxışında son 7 ayda üçüncü dəfə qardaş Özbəkistana səfər etdiyini məmnunluqla xatırladıb, Azərbaycan-Özbəkistan əlaqələrinin daha yüksək səviyyəyə qaldığını qeyd edib. Eyni zamanda sammitin 200 milyonluq türk dünyasının ali toplantısı olduğuna diqqəti cəlb edən Azərbaycan Prezidenti deyib ki, bu geniş coğrafiya böyük iqtisadi potensiala, enerji resurslarına, nəqliyyat yollarına və müasir hərbi imkanlara malikdir. Böyük bir ailə olan türk dünyası xalqları bir-birinin milli maraqlarını nəzərə alaraq bundan sonra da qarşılıqlı dəstək və həmrəylik göstərməlidirlər.

Bütün bunları nəzərə alaraq demək olar ki, etnik, dini və mədəni dəyərlər baxımından bir-birinə yaxın olan Azərbaycan-Özbəkistan münasibətləri bundan sonra da yüksələn xətlə inkişaf edəcək, bu əməkdaşlıq həm ölkələrimizin və xalqlarımızın, həm də bütün Türk dünyasının inkişafına əhəmiyyətli töhfələr verəcək.

YAP Tərtər rayon təşkilatının sədri Eldar Əsədov

Paylaş:

Baxılıb: 717 dəfə