Azərbaycan yaşıl enerjinin çox mühüm ixrac mənbəyinə çevriləcək

Bakı:

29 °C

54 %

10 m/s

Əlaqə

AZ RU EN

Ana səhifə / YAP xəbərləri / Azərbaycan yaşıl enerjinin çox mühüm ixrac mənbəyinə çevriləcək

Azərbaycan yaşıl enerjinin çox mühüm ixrac mənbəyinə çevriləcək

18.01.2023 [11:32]

“Prezident İlham Əliyevin Əbu-Dabi Dayanıqlılıq Həftəsinin rəsmi açılış mərasimində iştirakı və çıxışı həm Azərbaycan Liderinin, həm də dövlətinin yüksək nüfuzuna, eləcə dünyanın siyasi və biznes elitasının ölkəmizə olan böyük marağına işarə idi. Azərbaycan Liderinin Birləşmiş Ərəb Əmirliklərinin paytaxtında qlobal məsələlərin müzakirəsində iştirak etməsi, hətta Avrasiya geosiyasi məkanın enerji təhlükəsizliyi probleminin həllində ölkəmizin xüsusi reseptlərini təqdim etməsi xüsusilə tədirəlayiq hal idi. Eləcə də Prezident İlham Əliyevin Birləşmiş Ərəb Əmirliklərinə səfəri iki ölkə arasındakı münasibətlərin strateji əhəmiyyətliliyindən də xəbər verirdi”. Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.

Ramil Vəlibəyov bildirib ki, qlobal enerji təhlükəsizliyi fonunda bərpaolunan enerji imkanlarının dəyərləndirilməsi və bu sahəyə sərmayələrin yatırılması Azərbaycan nümunəsini diqqət mərkəzinə gətirir: “Çünki Azərbaycanda mövcud olan müsbət investisiya mühiti çərçivəsində neft və qaz sektoruna böyük sərmayələr cəlb edilib. Bu gün də Azərbaycan nəinki öz enerji tələbatlarını təmin edir, o cümlədən xam nefti, neft məhsullarını, təbii qazı, neft-kimya məhsullarını və elektrik enerjisini ixrac edir. Hazırda isə hədəf bərpaolunan enerji sektorudur. Prezident İlham Əliyevin qeyd etdiyi kimi, Azərbaycanın bərpaolunan enerji ilə bağlı proqramı tamamilə fərqli gündəliyə malikdir. Bu da həm nəhəng potensial, həm də ixracın şaxələndirilməsi ilə bağlıdır. Bu mənada, quruda 27 qiqavatlıq külək və günəş enerjisi, işğaldan azad edilmiş ərazilərdə 10 qiqavatlıq külək və günəş enerjisi, həmçinin Xəzər dənizinin Azərbaycan sektorunda 157 qiqavatlıq külək enerjisi imkanları mövcuddur ki, onun ixracı üçün kifayət qədər ixrac marşrutları lazımdır. Hazırda Azərbaycanın bərpaolunan enerji imkanlarının istehsalı və ixracı istiqamətində bir sıra müqavilələr də imzalanıb. Məsələn, Səudiyyə Ərəbistanı Krallığının “ACWA Power” şirkəti tərəfindən Azərbaycanda inşa edilən 240 meqavat gücündə "Xızı-Abşeron" Külək Elektrik Stansiyasından sonra Birləşmiş Ərəb Əmirliklərinin “Masdar” şirkəti tərəfindən inşa edilən 230 meqavat gücündə Qaradağ Günəş Elektrik Stansiyasının təməlqoyma mərasimlərinin keçirilməsi, həmçinin BP şirkəti ilə generasiya gücü 200 meqavatdan çox olan günəş elektrik stansiyasının inşası ilə bağlı danışıqların aparılması deyilən fikrin əyani sübutlarıdır. Eləcə də 12 min meqavatlıq enerjinin istehsalının SOCAR və “Fortescue Future Industries” şirkəti tərəfindən həyata keçirilməsi də nəzərdə tutulur. Ümumlikdə isə Azərbaycanın beynəlxalq enerji şirkətləri ilə imzaladığı anlaşma memorandumları və sazişlər əsasında 22 qiqavata qədər külək və günəş enerjisini istehsal etmək imkanını yaradacaq. Beləliklə də, bütün bu çoxşaxəli əməkdaşlıq əlaqələri çərçivəsində Azərbaycan yaşıl enerjinin çox mühüm ixrac mənbəyinə çevriləcək”.

Ramil Vəlibəyov əlavə edib ki, 2022-ci ilin 17 dekabr tarixində Azərbaycan, Gürcüstan, Macarıstan və Rumıniya arasında “Qara dənizin dibi ilə elektrik kabelinin çəkilməsinə dair” Saziş imzalanıb: “Heç şübhəsiz ki, bu Sazişlə Azərbaycandan 4 qiqavatlıq yaşıl enerjini nəql etmək imkanını yaradacaq kabel çəkiləcək. Məhz, bu ixrac yolu bütövlükdə Azərbaycanda istehsal olunacaq bərpaolunan enerjinin Avropa qitəsinə çıxarılmasına əlverişli şərait yaradacaq”.

Paylaş:

Baxılıb: 583 dəfə