İstədiyimizə nail olduq

Bakı:

25 °C

78 %

7 m/s

Əlaqə

AZ RU EN

Ana səhifə / YAP xəbərləri / İstədiyimizə nail olduq

İstədiyimizə nail olduq

13.11.2023 [14:34]

Müzəffər Ali Baş Komandan cənab İlham Əliyevin rəhbərliyi ilə rəşadətli ordumuz Qarabağda keçirilən lokal antiterror tədbirləri nəticəsində erməni hərbi birləşmələrini diz çökdürdü. Cəmi 23 saat davam edən antiterror əməliyyatı Azərbaycanın gücünü düşmənə, eləcə də onların havadarlarına göstərdi və yenə də düşmən ağ bayraq qaldıraraq təslim oldu. Beləliklə, ölkəmizin suverenliyi tam bərpa edildi. Oktyabrın 15-də ölkə başçısı Xankəndi şəhərində Azərbaycan Respublikasının Dövlət Bayrağını ucaltdı.

Noyabrın 8-də məhz Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi.

Paradda çıxış edən ölkə başçısı olduqca mühüm məsələlərə toxundu, çox ciddi mesajlar verdi.

Üç il bundan əvvəl Qarabağın tacı olan Şuşa şəhərinin işğalçılardan azad edilməsi ilə düşmən ordusunun təslim olduğunu və ağ bayraq qaldırdığını xatırladan prezident İlham Əliyev bildirdi ki, İkinci Qarabağ müharibəsi Azərbaycan dövlətinin tam Zəfəri ilə nəticələndi.

20 il öncə Prezident seçildikdən sonra xalqa verdiyi bütün sözləri tutan, yerinə yetirən cənab İlham Əliyev xalqın sevgisini, etimadını qazandı. Prezident kimi xalqına söz vermişdi ki, biz ərazi bütövlüyümüzü bərpa edəcəyik və Azərbaycanın Dövlət Bayrağını işğal altında olan torpaqların hər bir guşəsində qaldıracağıq. Və bu gün Azərbaycan Bayrağı bütün torpaqlarımızda dalğalanır.

Çıxışında Silahlı Qüvvələrimizin döyüş meydanında cəsarət, qəhrəmanlıq, fədakarlıq göstərməsindən bəhs edən Prezidentimiz Şuşa əməliyyatı, eləcə də 44 gün ərzində aparılan bütün digər hərbi əməliyyatlar, hərbçilərimizin bir qəhrəmanlıq dastanı olduğunu vurğuladı. Dövlətimzin başçısı qeyd etdi ki, 44 günlük müharibə zamanı Ermənistan ordusunda 12 min fərari olmuşdur. Azərbaycan Silahlı Qüvvələrinin bir nəfər də olsun hərbçisi döyüş meydanını tərk etməmişdir. Bu, Azərbaycan xalqının əyilməz ruhunu və yüksək mənəvi keyfiyyətlərini bir daha bütün dünyaya nümayiş etdirdi.

“Xankəndi şəhər stadionunda Ermənistanın baş naziri çıxış edərkən təkəbbürlə demişdi: “Qarabağ Ermənistandır və nöqtə”- deyən Prezident İlham Əliyev bildirdi ki, Biz ona, onun kimilərinə və onların arxasında duranlara döyüş meydanında qan tökərək, şəhidlər verərək göstərdik ki, o, səhv yolda idi.

Ölkə başçısı çıxışında həm düşmənə, həm də onların havadarlarına ciddi mesaj göndərərək bildirdi ki, bizimlə bundan sonra heç kim zarafat etməsin. Ermənistan rəhbərliyi əgər revanşist fikirlərlə yaşayırsa, Ermənistanın arxasında dayanan manipulyasiyaya öyrəşmiş ölkələr əgər yenə də Azərbaycan üçün hansısa məkrli plan qurursa, o, bugünkü parada bir nəzər yetirsin. Bilsin ki, burada mindən çox igidimiz düzülübdür və bizim 100 mindən çox onlar kimi igidlərimiz var və heç bir qüvvə bizi təhdid edə bilməz. Biz istənilən müstəvidə döyüşə hazırıq, siyasi, lazım olarsa, hərbi meydanda bunu göstərmişik. XXI əsrdə heç bir ordu bizim qədər peşəkarlıq, fədakarlıq göstərməmişdir. Heç bir xalq öz doğma torpağını bu qədər əziz tutub uğrunda ölümə getməyə hazır olmamışdır. Bunu biz hamımız yaxşı bilirik, bunu dünya da bilsin.

Prezident İlham Əliyev hərbi paradda çağırış edərək bildirdi ki, Biz istədiyimizə nail olduq, beynəlxalq hüququ bərpa etdik, tarixi ədaləti bərpa etdik, milli ləyaqətimizi bərpa etdik, düşmənə onun yerini göstərdik. Düşmən bizim qabağımızda diz çökdü və bu gün mən burada müzəffər Silahlı Qüvvələrin qarşısında çıxış edirəm. Yəni, biz bütün vəzifələri icra etmişik.

Beləliklə, Xankəndində keçirilən möhtəşəm parad mühüm hadisə kimi tariximizə yazıldı. Prezident, Müzəffər Ali Baş Komandan İlham Əliyevin paraddakı çıxışı, səsləndirdiyi bəyanatlar düşmənə və onun havadarlarına revanşist hislərinindən əl çəkmələri üçün ciddi mesaj idi.

Sahib Şükürov

YAP Göyçay rayon təşkilatının sədri

Paylaş:

Baxılıb: 730 dəfə