Laçının tarixinin yeni mərhələsi başlayıb

Bakı:

26 °C

66 %

8 m/s

Əlaqə

AZ RU EN

Ana səhifə / YAP xəbərləri / Laçının tarixinin yeni mərhələsi başlayıb

Laçının tarixinin yeni mərhələsi başlayıb

01.12.2023 [12:55]

İlqar İlyasov,

YAP Laçın rayon təşkilatının sədri

1988-ci ildən başlayan hadisələrin həm görünən, həm də görünməyən tərəflərini analiz etdikdə, geostrateji mövqeyinə baxmayaraq Laçının işğalının qarşısını almaq mümkünsüz idi. Çünki erməniləri kilsə və dünya erməni diaspora təşkilatları səfərbər etdikləri halda Azərbaycanda birləşdirici və səfərbəredici milli-ictimai qüvvə çox zəif idi. Hadisələr başlayanda isə nə hakimiyyət, nə siyasi qüvvələr, nə də ziyalılar xalqı səfərbər etmək gücündə olmadı.

Beləliklə, Laçın rayonunun işğal olunması nəticəsində rayonda dövlət və xüsusi mülkiyyətə ciddi zərər yetirildi. 217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif təyinatlı istehsal müəssisələri talan və məhv edildi. 54 dünya, 200-dən çox yerli əhəmiyyətli tarixi abidə vandalizmə məruz qaldı. VI-cı əsrə aid Alban Ağoğlan məbədi, 14-cü əsrə aid Məlik Əjdər türbəsi, Qaraqışlaq kəndində məscid, Zabux kəndində qədim qəbiristanlıq bunların sırasındadır. Laçın Tarix Muzeyi və onun qızıl, gümüş və tunc sikkələrdən ibarət qədim kolleksiyası talan edildi. Laçının 74 min nəfərdən çox sakini isə 30 ilə yaxındır ki, respublikanın 59 şəhər və rayonunda məcburi köçkün həyatı yaşayır.

2020-ci ilin 27 sentyabrından başlayaraq 44 gün davam edən Vətən müharibəsində Müzəffər Ordumuzun ermənilərə qarşı əks hücumu zamanı Ermənistanın uzun illər ərzində qurduğu mühəndis-istehkam sistemlərini, məğlubedilməzlik miflərini cəsarətlə yarıb keçən əsgər və zabitlərimizin qəhrəmanlığı, şəhidlərimizin qanı və canı bahasına torpaqlarımız işğaldan azad edildi. Tariximizə ən şərəfli səhifə kimi düşən bu Zəfərlə Azərbaycan faşist ideologiyasından bəhrələnən Ermənistanın 30 illik işğalına son qoyaraq, bir güllə atmadan, bir şəhid vermədən Ağdam, Kəlbəcər və Laçın rayonlarını işğaldan azad etdi.

44 günlük Vətən müharibəsində Laçın rayonunun bir neçə yaşayış məntəqəsi Azərbaycanın müzəffər ordusu tərəfindən düşmən tapdağından azad edildi, rayon mərkəzi daxil olmaqla bəzi kəndləri isə 10 noyabr müqaviləsinə əsasən erməni silahlıları tərk etdilər. Bu 44 günlük Vətən müharibəsinin məntiqi nəticəsi idi.

Dəmir yumruğun və güclü siyasi iradənin nəticəsində Laçın düyünü çözüldü, onu yağmalamaq istəyənlərin xəbis niyyəti boşa çıxdı. Otuz ilə yaxın boş və mənasız danışıqlarla baş qatan, erməni işğalını dondurmağa çalışan, ermənilərin torpaqlarımızda qanunsuz məskunlaşmasına göz yuman həmsədr dövlətlərin ikili siyasətinə son qoyan Azərbaycan beynəlxalq qanunları və tarixi ədaləti öz gücünə bərpa etdi. Artıq Şərqi Zəngəzur iqtisadi rayonuna daxil olan Laçının tarixinin və taleyinin yeni mərhələsi başlayıb, dağlar diyarında ən mühüm infrastruktur layihələr icra olunur, laçınlıların doğma yurda təhlükəsiz qayıdışı üçün dövlət tərəfindən hər cür şərait yaradılır, artıq onlarla ailə 1900 nəfərə yaxın laçınlı öz yeni və müasir evlərinə köçüb. Qısa müddət ərzində Laçın şəhərində 1400-ə yaxın, Zabuxda isə 500-ə yaxın laçınlı evlə təmin olunub. Aparılan məqsədyönlü siyasət nəticəsində Laçın dünyanın ən modern şəhərinə çevrilir, inanırıq ki, çox keçməyəcək bu şəhər turizm məkanı kimi tanınacaq.

Paylaş:

Baxılıb: 551 dəfə