XV Beynəlxalq Multikulturalizm Məktəbinin iştirakçıları Laçında

Bakı:

11 °C

87 %

7 m/s

Əlaqə

AZ RU EN

Ana səhifə / Xəbər lenti / XV Beynəlxalq Multikulturalizm Məktəbinin iştirakçıları Laçında

XV Beynəlxalq Multikulturalizm Məktəbinin iştirakçıları Laçında

26.09.2024 [14:14]

Bakı Beynəlxalq Multikulturalizm Mərkəzinin (BBMM) təşkil etdiyi “Sülhün, dialoqun və tolerantlığın qorunmasında mədəni irsin rolu” adlı XV Beynəlxalq Multikulturalizm Məktəbi Laçın şəhərində davam edir. Sentyabrın 26-da məktəb iştirakçıları Azərbaycan Milli Elmlər Akademiyasının Ziya Bünyadov adına Şərqşünaslıq İnstitutunun Ərəb ölkələri tarixi şöbəsinin müdiri Fərda Əsədovun “Qafqaz Albaniyası irsi siyasi diskursda” mövzusunda mühazirəsini dinləyiblər.

Mühazirəçi diqqətə çatdırıb ki, Azərbaycan Respublikası öz ərazisindəki bütün müsəlman və xristian etnik-mədəni irsinin hüquqi varisidir. Çoxkonfessiyalı və çoxmillətli ölkəmizdə bütün etnosiyasi və etnokonfessional münasibətlərin əsasında multikulturalizm dayanır. O vurğulayıb ki, bu gün Qafqaz Albaniyasının tarixi və mədəni mirasına dair tarix elmində mübahisələr mövcuddur. Bəzi qüvvələr tərəfindən yazılı mənbələrin ifadələri əsasında mövzunu siyəsiləşdirmək, Azərbaycan dövlətçiliyi və Azərbaycan xalqının siyasi və etnik tarixini təhrif etmək cəhdləri olunur. Fərda Əsədov mühazirəsində bütün bu məqamlara aydınlıq gətirib. Bildirib ki, Qafqaz Albaniyası Azərbaycanın tarixi-mədəni irsinin ayrılmaz tərkib hissəsidir. Azərbaycan zəngin alban etnomədəni irsinin, Qafqaz Albaniyasının antik və erkən orta əsrlərə aid mədəniyyətinin və bu ərazidə sonrakı əsrlərdə yaşamış etnoslar tərəfindən yaradılan bütün tarixi və dini irsin birbaşa varisi və qoruyucusudur.

Mühazirə XV Beynəlxalq Multikulturalizm Məktəbinin iştirakçıları tərəfindən maraqla qarşılanıb. İştirakçıların Laçın şəhərinə ekskursiyası təşkil olunub.

Qeyd edək ki, XV Beynəlxalq Multikulturalizm Məktəbində Azərbaycan, Rusiya, Türkiyə, Cənubi Koreya, Serbiya, Yaponiya, Qazaxıstan, Rumıniya, Moldova, Özbəkistan, Hindistan, Morokko, Bolqarıstan, Gürcüstan, Amerika Birləşmiş Ştatları, Mozambik və Konqodan olan 30-a yaxın tələbə iştirak edir.

Xatırladaq ki, Mərkəz yarandığı gündən etibarən Prezident İlham Əliyevin qarşıya hədəf kimi qoyduğu Azərbaycan multikulturalizminin dünyada tanıdılması, beynəlxalq arenada təbliği və təşviqi ilə bağlı bir sıra layihələr həyata keçirir. BBMM-in mühüm əhəmiyyət kəsb edən layihələrindən biri də artıq ənənə şəklini alan və mütəmadi olaraq ildə iki dəfə təşkil edilən Beynəlxalq Multikulturalizm Məktəblərinin təşkil olunmasıdır. Layihə BBMM-in “Azərbaycan multikulturalizmi fənninin xaricdə və ölkə universitetlərində tədrisi” layihəsinin məntiqi davamıdır. Tədris layihəsi çərçivəsində dünyanın və Azərbaycanın ali təhsil müəssisələrində Azərbaycan multikulturalizmini öyrənən tələbələr üçün ildə iki dəfə XV Beynəlxalq Multikulturalizm Məktəbi təşkil olunur. Məqsəd tələbə gənclərin nəzəri biliklərinin multikultural və tolerant dəyərlərin qorunub yaşandığı ölkəmizdə şahid olmalarına şərait yaratmaqdır. Artıq dəyərli ənənəyə çevrilən multikulturalizm yay və qış məktəblərinin nəticəsi olaraq xaricdə Azərbaycanın gənc dostlarının və onların yaxın çevrəsinin timsalında ölkəmizin haqq işini dəstəkləyən intellektual gənclərdən ibarət ünsiyyət platforması və güclü lobbisi formalaşıb. İntensiv şəkildə davam edən bu proses sübut edir ki, Prezident İlham Əliyevin Azərbaycanın dünyada tanıdılması istiqamətində müəyyənləşdirdiyi hədəflər uğurla reallaşmaqdadır.

Paylaş:

Baxılıb: 576 dəfə