Qarabağ torpaqlarında Azərbaycan Bayrağı əbədi dalğalanacaq

Bakı:

10 °C

93 %

3 m/s

Əlaqə

AZ RU EN

Ana səhifə / Xəbər lenti / Qarabağ torpaqlarında Azərbaycan Bayrağı əbədi dalğalanacaq

Qarabağ torpaqlarında Azərbaycan Bayrağı əbədi dalğalanacaq

26.12.2023 [09:20]

Günel A.

“Dekabrın 21-də Xankəndi stadionunda azərbaycanlı azarkeşlərin iştirakı ilə futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları arasında oyun keçirildi. Bu hadisə bütün Azərbaycan xalqının sevincinə səbəb olmuş unudulmaz hadisə oldu. İlk dəfə idi ki, işğaldan azad edilmiş ərazilərdə futbol matçı keçirilirdi”.

Bu fikirləri yeniazerbaycan.com-a Milli Məclisin deputatı Cavid Osmanov deyib.

Millət vəkili qeyd edib ki, futbol matçının Xankəndidə keçirilməsinin çox böyük mənası var: “Xankəndi qədim Azərbaycan diyarıdır. Xankəndinin təməli Qarabağ xanı tərəfindən qoyulmuşdur və ondan sonra Azərbaycan Respublikasının vəsaiti hesabına Azərbaycan memarları, inşaatçıları tərəfindən böyük şəhər yaradılmışdır. Son 30 il ərzində isə Xankəndidə separatçılar yuva salmışdılar. Xankəndi şəhəri separatizmin rəmzinə çevrilmişdi.

Dekabrın 21-də Xankəndi stadionunda çıxışı zamanı Prezident İlham Əliyev vurğuladı ki, torpaqlarımızı 30 il ərzində işğal altında saxlayan Ermənistan hesab edirdi ki, bunu əbədi edə biləcək. Şanlı Azərbaycan Ordusu onlara və bütün dünyaya sübut etdi ki, Qarabağ bizim tarixi, əzəli torpağımızdır. Bu torpaqların sahibləri Azərbaycan xalqıdır. Üç ay bundan əvvəl Xankəndi işğaldan azad edildi. Birgünlük antiterror əməliyyatı nəticəsində Azərbaycan öz dövlət suverenliyini tam təmin etmişdir, bu gün bütün Qarabağ bölgəsində Azərbaycan Bayrağı dalğalanır”.

C. Osmanov vurğulayıb ki, Qarabağın azad olunması böyük tarixi hadisədir və bu tarix bizim qəlbimizdə əbədi yaşayacaq. “Azərbaycan xalqı, dünya azərbaycanlıları bu Zəfər ilə bundan sonra əbədi fəxr edəcəklər. Hazırda Xankəndi şəhəri, Xocalı da daxil olmaqla işğaldan azad edilmiş digər ərazilərdə geniş quruculuq-abadlıq işləri aparılır.

Prezident İlham Əliyev çıxışı zamanı onu da qeyd etdi ki, Xankəndi stadionu cəmi iki ay ərzində yenidən inşa edildi, əsaslı təmir olundu. Separatizm simvolikasını əks etdirən bütün yazılar tarixin zibilxanasına atıldı. Ölkə başçısı bildirdi ki, yenidən qurulan Ağdam şəhərində də bir neçə aydan sonra Ağdam şəhərində “İmarət” stadionunun yenidən inşa edilməsinə başlanılacaq.

Xankəndi stadionunda Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları arasında keçirilən oyun başlamazdan öncə Prezident İlham Əliyev çıxışında onu da xatırlatdı ki, dörd il bundan əvvəl Xankəndi stadionunda bəziləri “Qarabağ Ermənistandır və nöqtə” demişdilər. Ancaq xalqımız bütün dünyaya sübut etdi ki, Qarabağ Azərbaycandır! İşğal edilmiş torpaqların böyük hissəsi üç il bundan əvvəl - İkinci Qarabağ müharibəsi nəticəsində işğalçılardan azad edildi. Qarabağın tacı olan Şuşa şəhərində Azərbaycan Bayrağı qaldırıldı. Üç ay bundan əvvəl - sentyabrın 19-20-də Xankəndi, Xocalı, Əsgəran, Xocavənd, Ağdərə rayonları da işğalçılardan azad edildi. Oktyabrın 15-də bütün bu şəhərlərdə Azərbaycan Bayrağı ucaldıldı. Noyabrın 8-də Xankəndinin mərkəzi meydanında Zəfər paradı keçirildi.

Prezident İlham Əliyev çıxışı zamanı bir daha bəyan etdi ki, bundan sonra bütün Qarabağ torpaqlarında Azərbaycan Bayrağı əbədi dalğalanacaq. Azərbaycanlılar bu torpaqlarda əbədi yaşayacaq”.

Paylaş:

Baxılıb: 460 dəfə