İsraildən İrana zərbə...

Bakı:

22 °C

83 %

10 m/s

Əlaqə

AZ RU EN

Ana səhifə / Arxiv / İsraildən İrana zərbə...

İsraildən İrana zərbə...

14.06.2025 [11:24]

İsrail Hərbi Hava Qüvvələri İranın ərazisində genişmiqyalı hücum əməliyyatları həyata keçirib. Qeyd edək ki, iyunun 13-də səhər saatlarından başlayaraq gün ərzində İsrail HHQ-nə məxsus 200-dən çox qırıcı təyyarə Tehran da daxil olmaqla İranın bir çox şəhərlərində strateji cəhətdən önəmli olan hərbi obyektlərə, xüsusilə də aerodromlara və ballistik raket mərkəzlərinə, o cümlədən nüvə obyektlərinə raket zərbələri endirib. İsrail HHQ-nin hücumlarında İslam İnqilabı Keşikçiləri Korpusunun Şirazdakı raket zavodu, Təbrizdəki aviabaza, Təbriz hava limanı, Natanzda və Fordodakı uranı zənginləşdirən zavodlar, ölkənin müxtəlif bölgələrində raket və hərbi texnika anbarları əsas hədəf kimi seçilib. Bununla yanaşı, hücum zamanı İranın bir sıra yüksək rütbəli hərbiçiləri və nüvə alimləri də həyatını itirib. İran dövlət agentliklərinin məlumatlarına görə, hücum nəticəsində İran Silahlı Qüvvələrinin Baş Qərargah rəisi, general Məhəmməd Hüseyn Baqeri, İslam İnqilabı Keşikçiləri Korpusunun (SEPAH) komandanı Hüseyn Salami, Baş Qərargah komandanı Hatəm əl-Ənbiya, general Qulam Əli Rəşid, SEPAH-ın Quru Qoşunlarının və Kosmik Qüvvələrinin komandanları Məhəmməd Pakpur və Əhməd Əli Hacızadə, Bəsic komandiri Əlirza Süleymani, İran Ordusunun komandanı Əmir Musəvi və İranın Atom Enerjisi Təşkilatının rəhbəri Fereydun Abbasi və İslami Azad Universitetinin prezidenti Məhəmməd Mehdi Tehrançi daxil olmaqla 6 nüvə alimi həlak olub. İslam Respublikasının Ali Rəhbər Seyid Əli Xameneinin müşaviri Əli Şəmxani də həlak olanlar arasındadır.

İsrail hücuma əvvəlcədən hazırlaşıb

İsrail Müdafiə Nazirliyinin yaydığı məlumatda bildirilib ki, İsrail qırıcılarının zərbələri “dəqiq və qabaqlayıcı” olub. “Times of İsrael” informasiya agentliyinin məlumatında deyilir ki, hücumun məqsədi İranın nüvə proqramına ciddi zərər vurmaq və Tehranın İsrailə qarşı davam edən aqressiyasına cavab vermək idi. İrandan gözlənilən hücumlara gəlincə, İsrail baş nazirinin ofisinin müşaviri Dmitri Gendelman TASS-a açıqlamasında deyib ki, İsrail İranla müharibə ehtimalına hazırdır. Gendelman, həmçinin vurğulayıb ki, İsrail həm müdafiədə, həm də hücumda ilk növbədə öz hərbi qüvvələrinə və imkanlarına güvənir. İsrail Müdafiə Qüvvələrinin Baş Qərargah rəisi Eyal Zamir isə yerli mətbuata açıqlamasında bildirib ki, İsrail Müdafiə Ordusu on minlərlə ehtiyatda olan hərbçini xidmətə çağırmağa başlayıb.

Eyni zamanda İsrail mediası bildirib ki, hücum uzun müddət ərzində hazırlanıb və yüksək rütbəli hərbi məmurlar və alimlər haqqında ətraflı məlumatlar əldə olunub. Əməliyyat İsrail Müdafiə Nazirliyi və MOSSAD arasında sıx əməkdaşlıq çərçivəsində həyata keçirilib. Agentliyin məlumatında bir məqam da vurğulanır ki, MOSSAD-ın xüsusi bölmələri əvvəlcədən mərkəzi İrandakı zenit-raket batareyalarının (SAM) yaxınlığında yüksək dəqiqlikli silah sistemləri yerləşdirib. İsrail Hərbi Hava Qüvvələri havadan hücuma başlayanda bu sistemlər aktivləşdirilib və eyni vaxtda dəqiq zərbələr endirərək əsas hədəfləri vurub. İsrail KİV-lərində MOSSAD -ın İran daxilində keçirdiyi əməliyyatda İranın hava hücumundan müdafiə sistemlərini məhv etdiyi barədə də məlumatlar yer almaqdadır.

Nüvə obyektlərində sızma baş verməyib

Beynəlxalq Atom Enerjisi Agentliyinin rəhbəri Rafael Qrossi öz sosial şəbəkə hesabında qeyd edib ki, İran hakimiyyəti İsrailin zərbələri nəticəsində İsfahan və Fordo nüvə obyektlərinə zərər dəymədiyi barədə Beynəlxalq Atom Enerjisi Agentliyinə (IAEA) məlumat verib. Qrossi əlavə edib ki, təşkilat İrandakı vəziyyəti diqqətlə izləyir və radiasiya səviyyəsi ilə bağlı ölkənin səlahiyyətli orqanları ilə əlaqə saxlayır.

Yunis ABDULLAYEV

Paylaş:

Baxılıb: 410 dəfə