Güclü Dövlətin təminatı – Azərbaycan Ordusu

Bakı:

28 °C

51 %

8 m/s

Əlaqə

AZ RU EN

Ana səhifə / Arxiv / Güclü Dövlətin təminatı – Azərbaycan Ordusu

Güclü Dövlətin təminatı – Azərbaycan Ordusu

22.06.2026 [11:33]

Azərbaycan xalqının müstəqillik tarixində ordu quruculuğu məsələsi hər zaman xüsusi əhəmiyyət daşıyıb. Ulu Öndər Heydər Əliyevin qeyd etdiyi kimi, “Ordu mövzusu, ordunun yaranması, formalaşması bizim bütün həyatımızda əsas mövzulardan biri olmalıdır”. Bu fikir Azərbaycan dövlətçiliyinin qorunması və inkişafında güclü ordunun rolunu aydın şəkildə ifadə edir.

1990-cı illərin əvvəllərində ölkəmiz ağır sınaqlarla üzləşmiş, hətta müstəqilliyini itirmək təhlükəsi ilə qarşı-qarşıya qalmışdı. Həmin dövrdə nizami ordu quruculuğunda ciddi problemlər mövcud idi. Ulu Öndər Heydər Əliyevin hakimiyyətə qayıdışından sonra ordu quruculuğu sahəsində əsaslı islahatlara başlanıldı, Silahlı Qüvvələrin formalaşdırılması və möhkəmləndirilməsi dövlət siyasətinin prioritet istiqamətlərindən birinə çevrildi.

Azərbaycan Ordusunun beynəlxalq standartlara uyğunlaşdırılması, peşəkar hərbi kadrların hazırlanması, maddi-texniki bazanın gücləndirilməsi və hərbi intizamın möhkəmləndirilməsi istiqamətində mühüm addımlar atıldı. Ulu Öndər vurğulayırdı ki, “Etibarlı, güclü, Vətənini, torpağını müdafiə etməyə qadir silahlı qüvvələri olmayan ölkənin müstəqilliyi də etibarlı ola bilməz”. Məhz bu siyasət nəticəsində müasir Azərbaycan Ordusunun təməli qoyuldu.

Sonrakı dövrdə Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ordu quruculuğu yeni inkişaf mərhələsinə qədəm qoydu. Müdafiə sahəsinə ayrılan vəsait artırıldı, ən müasir silah və texnikalar alındı, hərbi sənaye kompleksi formalaşdırıldı. Azərbaycan Ordusunun döyüş qabiliyyəti əhəmiyyətli dərəcədə yüksəldi və ordumuz regionun ən güclü silahlı qüvvələrindən birinə çevrildi.

2016-cı ilin Aprel döyüşləri Azərbaycan Ordusunun gücünü və peşəkarlığını bütün dünyaya nümayiş etdirdi. Bu qələbə sonrakı uğurların əsasını qoydu. 2020-ci ilin Vətən müharibəsində isə Azərbaycan Ordusu 44 gün ərzində tarixi Zəfər qazanaraq ölkəmizin ərazi bütövlüyünü bərpa etdi. Prezident İlham Əliyevin qeyd etdiyi kimi, “Biz bunu döyüş meydanında sübut edə bilmişik”. Məhz Azərbaycan əsgərinin şücaəti, xalq-ordu birliyi və Ali Baş Komandanın qətiyyətli rəhbərliyi nəticəsində tarixi ədalət bərpa olundu.

2020-ci il noyabrın 10-da imzalanan üçtərəfli Bəyanat Azərbaycanın hərbi-siyasi qələbəsini rəsmiləşdirdi. Bundan sonra da ordumuzun inkişafı daha sürətlə davam etdirildi. Xüsusi təyinatlı qüvvələrin və Komando briqadalarının yaradılması, hərbi hissələrin müasirləşdirilməsi, yeni döyüş hazırlığı proqramlarının tətbiqi Azərbaycan Silahlı Qüvvələrinin imkanlarını daha da genişləndirdi.

Bu gün Azərbaycan Ordusunun inkişafında qardaş Türkiyə ilə hərbi əməkdaşlıq mühüm yer tutur. Ordumuzun Türkiyə Silahlı Qüvvələri modelinə uyğunlaşdırılması istiqamətində mühüm addımlar atılır. 2021-ci ildə imzalanmış Şuşa Bəyannaməsi iki qardaş ölkə arasında hərbi, müdafiə sənayesi və təhlükəsizlik sahələrində əməkdaşlığı yeni mərhələyə yüksəltdi. Eyni zamanda, Pakistan İslam Respublikası da Azərbaycanın mühüm hərbi və siyasi tərəfdaşlarından biridir.

Bu gün Azərbaycan Ordusu dünyanın güclü orduları sırasında yer alır. Prezident İlham Əliyevin dediyi kimi, “Güclü dövlətin güclü ordusu olmalıdır”. Müasir silahlarla təchiz edilmiş, yüksək döyüş hazırlığına malik, vətənpərvərlik ruhunda yetişmiş şəxsi heyətə sahib olan Azərbaycan Ordusu dövlətimizin təhlükəsizliyinin və suverenliyinin etibarlı təminatçısıdır.

26 iyun – Azərbaycan Respublikasının Silahlı Qüvvələri günü münasibətilə bütün hərbi qulluqçularımızı, müharibə veteranlarını və Azərbaycan Ordusunun sıralarında xidmət etmiş hər bir vətəndaşı təbrik edir, ordumuza yeni uğurlar arzulayırıq. Qalib Azərbaycan Ordusu xalqımızın qürur mənbəyi, dövlətimizin güc və qüdrət simvoludur.

Anar Alışov

Yeni Azərbaycan Partiyası Yardımlı rayon təşkilatının sədri

Paylaş:

Baxılıb: 422 dəfə