Aralıq dənizində gəmi qəzaları: yüzlərlə miqrant itkin düşüb və ya həlak olub

Bakı:

26 °C

71 %

11 m/s

Əlaqə

AZ RU EN

Ana səhifə / Dünya / Aralıq dənizində gəmi qəzaları: yüzlərlə miqrant itkin düşüb və ya həlak olub

Aralıq dənizində gəmi qəzaları: yüzlərlə miqrant itkin düşüb və ya həlak olub

27.01.2026 [14:25]

Beynəlxalq Miqrasiya Təşkilatı (BMT) Aralıq dənizində baş vermiş bir neçə ölümcül gəmi qəzası barədə məlumatlardan dərin narahatlığını ifadə edib. İlkin məlumatlara görə, yüzlərlə insan dənizdə itib və ya həlak olub. Əlverişsiz hava şəraiti axtarış-xilasetmə əməliyyatlarını çətinləşdirib. Təşkilat daxil olan məlumatları dəqiqləşdirir.

AZƏRTAC xəbər verir ki, BMT-nin açıqlamasında bu cür faciələrin miqrantların qanunsuz daşınması və alveri ilə məşğul olan şəbəkələrin fəaliyyətinin nəticəsi olduğu bildirilir. Cinayətkar qruplar cəzasız şəkildə fəaliyyətini davam etdirərək insanları üzməyə yararsız və həddən artıq yüklənmiş qayıqlarla dənizə çıxarırlar. Təşkilat beynəlxalq ictimaiyyəti bu cinayət şəbəkələrinin ləğvi və yeni itkilərin qarşısının alınması üçün səyləri gücləndirməyə çağırır.

Soyuqdan ölüm

Axtarış-xilasetmə əməliyyatı nəticəsində İtaliyanın Lampeduza adası sahillərində Tunisdən yola çıxmış qayıqda üç nəfərin həlak olduğu təsdiqlənib. Ölənlər arasında, sağ qalan ananın sözlərinə görə, sahilə çıxmağa az qalmış soyuqdan dünyasını dəyişən təxminən bir yaşlı əkiz qızlar da var. Sahilə çatdıqdan qısa müddət sonra bir kişi də soyuqdan ölüb.

Xilas edilənlər bildiriblər ki, eyni limandan və eyni vaxtda daha bir qayıq yola çıxıb, lakin təyinat nöqtəsinə çatmayıb.

Beynəlxalq Miqrasiya Təşkilatı sərnişinlərin taleyinin aydınlaşdırılması istiqamətində işi davam etdirir. Maltadan daxil olan son məlumata əsasən, ticarət gəmisi tərəfindən xilas edilmiş sağ qalanlardan biri 50 nəfərin itkin düşdüyü və ya həlak olduğu gəmi qəzasından sağ çıxdığını bildirib.

İtkin düşənlərin axtarışı

İtaliyanın sahil mühafizəsi dənizdə itkin düşmüş və ya qəzaya uğradığı ehtimal edilən digər qayıqların tapılması üçün axtarış əməliyyatlarını koordinasiya edir. Liviya sahillərində baş verən gəmi qəzası nəticəsində azı 51 nəfər həlak olub. Hadisə ilə bağlı rəsmi təsdiq hələ gözlənilsə də, ehtimal olunan itkilərin miqyası Mərkəzi Aralıq dənizində növbəti böyük faciədən xəbər verir.

Son gəmi qəzaları Aralıq dənizində son dərəcə güclü “Harri” siklonu zamanı baş verib. Üzməyə yararsız və həddən artıq yüklənmiş qayıqlarla miqrantların daşınması cinayətdir. İnsanlar faktiki olaraq ölüm riski olan şəraitdə bilərəkdən açıq dənizə çıxarılıb.

Mərkəzi Aralıq dənizi marşrutu dünyada ən ölümcül miqrasiya dəhlizi olaraq qalır. Təkcə 2025-ci ildə bu marşrut üzrə azı 1340 nəfər həlak olub.

Paylaş:

Baxılıb: 466 dəfə