Ermənistanda vəziyyət yenidən gərginləşir

Bakı:

24 °C

62 %

1 m/s

Əlaqə

AZ RU EN

Ana səhifə / Dünya / Ermənistanda vəziyyət yenidən gərginləşir

Ermənistanda vəziyyət yenidən gərginləşir

24.07.2015 [09:13]

Əhali həbs olunan etirazçılara güc tətbiq edən polislərin cəzalandırılmasını tələb edir
Məlum olduğu kimi, Ermənistan dərin sosial-iqtisadi böhran içərisindədir. Bu ölkənin belə bir acınacaqlı duruma düşməsi isə, ilk növbədə, onun işğalçılıq siyasəti ilə bağlıdır. Azərbaycanın torpaqlarının 20 faizini işğal altında saxlaması Ermənistanın iqtisadiyyatını tamamilə tənəzzülə uğradıb. İqtisadi tənəzzül isə əhalinin sosial durumunun ağırlaşmasında birbaşa rol oynayır. Bu da işğalçı ölkə əhalisinin səbrini daşırmaqdadır. Məhz bu səbəbdəndir ki, Ermənistanda vətəndaşlar kütləvi etiraz aksiyalarına başlayıblar. Bu günlərdə paytaxt Yerevanda və digər bölgələrdə etiraz aksiyalarının böyük vüsət alması bu reallığı bir daha təsdiqləyir.
Erməni ekspertlər isə siyasi gərginliyin daha da kəskinləşərək vətəndaş müharibəsi həddinə çatacağını bəyan edirlər. Qeyd edilir ki, mövcud problemlər bu ölkədə sosial inqilab çağırışlarını aktuallaşdırır və siyasi kataklizmləri şiddətləndirir. Məhz bu, Ermənistanın gələcəyini sual altına alan başlıca faktorlardandır. Xatırladaq ki, etiraz aksiyalarının başlanmasına səbəb Ermənistan hökuməti tərəfindən elektrik enerjisinin qiymətinin 20 faizə yaxın artırılmasıdır. Yerevanda keçirilən etiraz aksiyasının güc strukturları tərəfindən vəhşicəsinə dağıdılması isə növbəti qarşıdurmalara təkan verib. Mitinqçilərə hücum edən mülki geyimli şəxslər, polis əməkdaşları və xüsusi təyinatlılar insanlara zərbələr endirib, Ermənistan prezidentinin administrasiyasının binası qarşısında etiraz edənlərə qarşı güclü su şırnağından istifadə edilib.
Son məlumatlara görə isə, Ermənistanda elektrik enerjisinin qiymətinin artmasına etiraz edən yüzlərlə “Talana yox” hərəkatının fəalı Yerevanın mərkəzi küçəsində oturaq etiraz aksiyalarına başlayıb. Etirazçılar Yerevanın mərkəzi küçələri Maştoç və Amiryanı bağlayıblar. Aksiyaçılar əllərində 23 iyun və 6 iyul aksiyalarında nümayiş iştirakçıları və jurnalistlərə zor tətbiq etmiş polis əməkdaşlarının şəkillərini tutaraq onların cəzalandırılmasını tələb edir. Fəal Maksim Sarkisyanın sözlərinə görə, nümayişçilər təqsirkar polislərin cəzalandırılması barədə prokurorluqdan zəmanət almayana qədər etirazlarını davam etdirəcəklərini bildiriblər. Qeyd edək ki, iyunun 23-də Yerevan polisi elektrik enerjisinin bahalaşmasına qarşı mübarizə aparmış “Talana yox” hərəkatının nümayişini dağıdarkən 237 nəfəri, həmçinin, jurnalistləri saxlayıb.
Bütün bunlar göstərir ki, Ermənistanda mübarizə yeni müstəviyə keçir və işğalçı ölkədə sosial tələblər siyasi müstəviyə istiqamətlənib. Belə olan halda isə Sarkisyan rejiminin sonu çata bilər. Təbii ki, bütün bu proseslər Ermənistanın daxili vəziyyətinin daha da gərginləşdiyini göstərir. Daha doğrusu, Sarkisyan başda olmaqla hazırkı prezident komandası proseslərin inkişafını nəzarətdə saxlaya bilmir. Heç cür normal idarəetmə sistemi qura bilməyən Ermənistan hakimiyyətində xaos açıq şəkildə özünü göstərir.
Nardar BAYRAMLI

Paylaş:

Baxılıb: 1329 dəfə