“Amnesty İnternational”, “Human Rights Watch”, “Freedom House” kimi təşkilatların qəribə susqunluğu

Bakı:

20 °C

88 %

3 m/s

AZ RU EN

Ana səhifə / Dünya / “Amnesty İnternational”, “Human Rights Watch”, “Freedom House” kimi təşkilatların qəribə susqunluğu

“Amnesty İnternational”, “Human Rights Watch”, “Freedom House” kimi təşkilatların qəribə susqunluğu

29.08.2015 [10:48]

Yaxud özlərini “hüquq müdafiəçiləri” kimi qələmə verən bu təşkilatlar ABŞ-da iki jurnalistin qətlə yetirilməsinə niyə göz yumurlar?...
Özlərini dünyada “insan hüquqlarının müdafiəsi üzrə ən kamil qurumlar” kimi qələmə verən “Amnesty İnternational”, “Transparency İnternational”, “Human Rights Watch”, “Freedom House” kimi təşkilatlar son günlər sərgilədikləri mövqe ilə bir daha hansı məqsədlərə xidmət etdiklərini təsdiqlədilər. Daha doğrusu, müstəqil xarici siyasət yürüdən ölkələrdəki hər hansı xırda hadisəni anında siyasiləşdirib gündəmə daşıyan bu təşkilatlar avqustun 26-da ABŞ-ın Virciniya ştatında baş vermiş jurnalistlərin qətlinə heç bir reaksiya vermədilər.
Məlumat üçün bildirək ki, avqustun 26-da ABŞ-ın Virciniya ştatında WDBJ7 televiziyasının əməkdaşları - jurnalist, 24 yaşlı reportyor Alison Parker və 27 yaşlı fotoqraf Adam Vard canlı yayım zamanı güllələnərək, qətlə yetirilib. Maraqlıdır ki, ABŞ Konqresindən maliyyələşən transmilli KİV-lər hadisəni şəxsi münasibətlər müstəvisində baş vermiş münaqişə kimi xarakterizə ediblər. Lakin Qərb mediası qətlin nə qədər məişət zəminində törədildiyini təlqin etməyə çalışsa da, araşdırmalar qətlin irqçilik kontekstində baş verdiyini göstərir.
Yeri gəlmişkən, Jurnalistlərin Həmkarlar İttifaqının sədri Müşfiq Ələsgərlinin KİV-ə verdiyi analizdən də görünür ki, qətli törətmiş Flagan heç də “sevgi qurbanı” olmayıb. Flagan qətldən əvvəl ABC NEWS telekanalına göndərdiyi faksda göstərir ki, əməkdaşı olduğu WDBJ7 telekanalının ağdərili rəhbərləri tərəfindən mənəvi terrora məruz qalmış, irqi ayrı-seçkilikdən əziyyət çəkmiş, işdən ayrılmış və nəhayət, əsəbləri dözmədiyindən bu qətli reallaşdırmışdır.
Beləliklə, bu hadisə bir sıra məsələlərə işıq salıb. Əvvəla, aydın olub ki, ABŞ-da jurnalistlərin təhlükəsizliyi qorunmur. Hər halda, jurnalistlərin iş başında öldürülməsi belə deməyə əsas verir. Digər tərəfdən, bu hadisə ABŞ-da irqi ayrı-seçkiliyin, hüquqsuzluq şəraitinin və jurnalist qətllərinin dinamik şəkildə artdığını təsdiqlədi.
Və ən əsası, yuxarıda da vurğuladığımız kimi, “Amnesty İnternational”, “Human Rights Watch”, “Freedom House” kimi təşkilatlar ABŞ-da baş verən bu qətli tamamilə görməzdən gəldilər və heç bir reaksiya vermədilər. Lakin Bakıda bir qədər əvvəl “Facebook” sosial şəbəkəsində yazışmadan sonra törədilmiş cinayətin bütün günahkarlarının həbs olmasına rəğmən, yuxarıda adı çəkilən təşkilatlar məsələni siyasiləşdirdilər. Bu isə bir daha onların gerçək mahiyyətini ortaya qoyur.
Digər tərəfdən, “Amnesty İnternational”, “Transparency İnternational”, “Human Rights Watch” təşkilatları bir dəfə olsun belə Ermənistanın işğalçılıq siyasəti nəticəsində milyona yaxın insanın hüquqlarının pozulduğunu dilə gətirməyiblər. İnsanların hüquqlarının kütləvi şəkildə pozulmasında günahkar olan Ermənistan dövlətinə bir dəfə formal olsa belə çağırış edilməyib. Öz növbəsində, bu tip beynəlxalq insan haqları təşkilatları işğalçı ölkədə nə parlament gülləbaran edildikdə, nə kütləvi aksiyalar vəhşiliklə dağıdıldıqda, nə də mitinqə çıxan insanlara atəş açıldıqda və nümayişçilər həbs edildikdə Ermənistanı insan haqlarının pozulmasına görə tənqid etməyiblər.
Bütün bunların fonunda qeyd edək ki, Azərbaycanda hansısa xırda bir məsələni şişirdərək dünya səviyyəli problemə çevirməyə çalışan bu təşkilatlar yalnız onlara verilən tapşırıq və əmrlər əsasında fəaliyyət göstərirlər. Həmin əmrdən kənara çıxmaq isə bu təşkilatların maliyyə mənbəyinin “quruması” ilə nəticələnə bilər. Elə onların ABŞ-dakı son olaylara susqun yanaşması da maliyyə mənbəyinin itirilməsi qorxusundan irəli gəlir.
Emin KƏRİMOV

Paylaş:

Baxılıb: 1418 dəfə