Məğlub Ermənistanın siyasi mənzərəsini konfrontasiya və böhran vəziyyəti təşkil edir

Bakı:

18 °C

94 %

1 m/s

Əlaqə

AZ RU EN

Ana səhifə / Dünya / Məğlub Ermənistanın siyasi mənzərəsini konfrontasiya və böhran vəziyyəti təşkil edir

Məğlub Ermənistanın siyasi mənzərəsini konfrontasiya və böhran vəziyyəti təşkil edir

29.01.2021 [22:16]

Məlum olduğu kimi, 44 günlük müharibədə işğalçı ordusu məhv edilən, Azərbaycan qarşısında diz çökmək məcburiyyətində qalan Ermənistanda xaos və anarxiya getdikcə dərinləşir. Daxili siyasi qarşıdurmanın, sosial-iqtisadi böhranın davam etdiyi məğlub ölkədə hakimiyyətə qarşı kütləvi etiraz aksiyaları da ara vermir. Bütün səviyyələrdə baş nazir Nikol Paşinyanın istefası tələb olunduğu bir vaxtda isə hakim komanda müxtəlif yollarla iqtidarı əldə saxlamağa çalışır.

Ermənistan mediasının yazdığına görə, hakimiyyəti əldən vermək istəməyən Paşinyan komandasına yeni çıxış yolları axtarmağı tapşırıb. Belə ki, son günlər “Mənim addımım” fraksiyasının keçirdiyi iclaslarda müzakirə edilən məsələlər arasında növbədənkənar seçkilər və parlamentin buraxılması əsas yer tutur. Qeyd edək ki, əsas müxalifət partiyalarının birləşdiyi “Vətənin xilası naminə hərəkat” isə indiki vaxtda növbədənkənar seçkilərin keçirilməsini Ermənistan üçün təhlükə hesab edir. “News.am” yazır ki, hərəkatın koordinatoru İşxan Saqatelyan 28 yanvarda verdiyi açıqlamada deyib ki, N.Paşinyanın rəhbərliyi altında növbədənkənar parlament seçkiləri keçirilməsi iqtidarın itirdiyi nüfuzu qazanmaq və məsuliyyətdən yayınmaq cəhdi olduğundan ölkə üçün fəlakət vəd edir. Onun fikrincə, indiki şəraitdə seçki keçirilsə, ölkədə mövcud olan qeyri-sabitlik, nifrət mühiti və cəmiyyətdəki parçalanma davam edəcək. İstefa tələbi ilə 18 fevral tarixinə ümumxalq mitinqinin təyin olunduğunu qeyd edən koordinator, həmçinin yaxın günlərdə mitinq, yürüş, piket və digər itaətsizlik aksiyalarının da baş tutacağını dilə gətirib.

Yeri gəlmişkən, “Aysor.am” yazır ki, “Vahid Ermənistan” partiyasının rəhbəri Vahan Badasyan baş nazir Paşinyanın fiziki cəhətdən məhvinin vacibliyini bildirib. “Paşinyan fiziki cəhətdən zərərsizləşdirilməli, hakimiyyətdən kənarlaşdırılmalıdır. Fiziki məhvinə qədər bütün yollardan istifadə edilməklə sıradan çıxarılmalıdır”, - deyə o bildirib.

Bunlarla yanaşı, Paşinyanın istefasını tələb edən vətəndaşların hökumət binasına daxil olmağa çalışmaları da müzakirə mövzusudur. “News.am” yazır ki, polis əməkdaşları ilə etirazçılar arasında toqquşma olub, onların bir qismi saxlanılıb. Baş nazirin istefasını tələb edən bir çox vətəndaş isə Respublika meydanına toplaşıb. Eyni zamanda, baş prokurorluq binası qarşısında da mitinq keçirilib. Mitinqin təşkilatçılarından olan rejissor Arşak Zakaryan deyib ki, dövlətə xəyanət baş verib və günahkar cəzalandırılmalıdır: “Baş prokurordan Paşinyanın həbsini tələb etdik. Baş prokuror Paşinyanı həbs etmirsə, xalqın tələblərini yerinə yetirməkdən imtina etdiyi üçün o da məsuliyyət daşıyır”.

Qeyd edək ki, kəskin bəyanatlar verən V.Badasyan və A.Zakaryan həmin gün təhlükəsizlik xidmətinin əməkdaşları tərəfindən saxlanılıblar.

Bu arada, bütün ermənilərin katolikosu II Qaregin də Paşinyanın istefası tələbindən geri çəkilmədiklərini dilə gətirib. Baş keşiş deyib ki, erməni kilsəsinin baş nazirin istefası ilə bağlı mövqeyində dəyişiklik yoxdur. “Ermənistan heç vaxt belə çətin vəziyyətə düşməmiş və bu qədər itkilər verməmişdi. Bu vəziyyətdə təbii olaraq kilsə öz mövqeyini bildirməli idi”, - deyə vurğulayan II Qaregin erməni apostol kilsəsinin Paşinyanın dərhal istefasını zəruri hesab etdiyini söyləyib.

Beləliklə, bu günlərdə Yerevan küçələrində baş verənlər göstərir ki, məğlub ölkədə vətəndaş müharibəsi təhlükəsi sovuşmayıb və Ermənistan sonu görünməyən fəlakətə yuvarlanır.

Qaşqay ZİYƏDDİNOĞLU

Paylaş:

Baxılıb: 1044 dəfə