“Mən tanıqlıq edirəm” kitabının imza günü keçirilib

Bakı:

13 °C

71 %

7 m/s

Əlaqə

AZ RU EN

Ana səhifə / Ədəbiyyat / “Mən tanıqlıq edirəm” kitabının imza günü keçirilib

“Mən tanıqlıq edirəm” kitabının imza günü keçirilib

24.05.2016 [10:00]

Əkbər Qoşalı: Bu kitab bir daha göstərdi ki, 20 Yanvar haqqında hələ yazılası, deyiləsi çox sözümüz var
Mayın 21-də Əməkdar jurnalist, Mətbuat Şurası İdarə Heyətinin üzvü Azər Həsrətin “Mən tanıqlıq edirəm” kitabının imza günü keçirilib. Tanınmış yazarların, mətbuat nümayəndələrinin iştirak etdiyi tədbiri giriş sözü ilə açan kitabın redaktoru, şair-publisist Əkbər Qoşalı toplu barədə ümumi məlumat verib.
Qeyd olunub ki, 1990-cı ilin 20 Yanvar olaylarına işıq tutan əsərdə müəllif gördüklərini, yaşadıqlarını, eyni zamanda geniş ictimaiyyət tərəfindən bilinməyən bəzi gerçəkləri oxucuya təqdim edir: “Azər Həsrətin yazıları Azərbaycan oxucusuna yaxşı tanışdı. Özəlliklə, xalqımızın, Türk dünyasının həm ağrı-acılı, həm də sevincli günləri ilə bağlı qələmə aldığı yazılar həmişə diqqət çəkib. 20 Yanvar mövzusunun da Azər Həsrət qələmindən dəfələrlə keçdiyini bilirəm. Ancaq onun bu mövzunu bədii mətn şəklində qələmə aldığını bilmirdim. Bu kitab bir daha göstərdi ki, 20 Yanvar haqqında hələ yazılası, deyiləsi çox sözümüz var”.
Digər çıxışçılar da qanlı tariximizdən bəhs edən, ancaq fərqli şəkildə qələmə alınan “Mən tanıqlıq edirəm” kitabının mahiyyətindən, gərəkliliyindən söz açıb, müəllifə minnətdarlıqlarını ifadə ediblər.
Sonra kitabın yazılma səbəblərindən danışan Azər Həsrət sözügedən qanlı olayın şahidi kimi yaddaşında ilişib qalan hadisələri qələmə almağı özünə borc bildiyini vurğulayıb.
Əsərin qəhrəmanı rolunda çıxış edən müəllif deyib ki, 20 Yanvar ərəfəsində və sonrakı günlərdə etdiyi müşahidələri bir şahid kimi qələmə alıb: “Bu kitab vasitəsilə oxucu eyni zamanda yanvarın 17-dən başlayaraq ölkənin quzey qapısı sayılan Xaçmaz rayonunun Xudat dəmiryol stansiyasında yerli əhalinin Bakıya yeridiləcək əlavə əsgər qüvvəsi və hərbi texnika gətirən qatarı dayandırıb geri qaytarmasından xəbər tutacaq. Və təbii ki, həmin günlərdə insanların duyğuları, düşüncələri, yanaşmaları da bu kitabda öz əksini tapıb. Bir sözlə, bu bir şahid ifadəsidir. Yazdıq ki, gələcək nəsillər o günlərdə baş verənləri məhz həmin hadisələrin iştirakçılarının dilindən oxuya bilsinlər”.
Azər Həsrət sonda tədbirə gələn hər kəsə təşəkkürünü bildirib və “Mən tanıqlıq edirəm” kitabını imzalayaraq hədiyyə edib.
Qeyd edək ki, kitabın redaktoru şair, Dünya Gənc Türk Yazarlar Birliyinin sədri Əkbər Qoşalı, fotolarının müəllifi isə tanınmış fotoqraf, o günlərin canlı şahidi olmuş, baş verənləri lentin yaddaşına köçürmüş Rasim Sadıqovdur.
NADİR

Paylaş:

Baxılıb: 4122 dəfə