Azərbaycan ilə Bolqarıstan arasında ikitərəfli münasibətlər müxtəlif sahələrdə uğurla inkişaf edir

Bakı:

26 °C

78 %

10 m/s

AZ RU EN

Ana səhifə / Gündəm / Azərbaycan ilə Bolqarıstan arasında ikitərəfli münasibətlər müxtəlif sahələrdə uğurla inkişaf edir

Azərbaycan ilə Bolqarıstan arasında ikitərəfli münasibətlər müxtəlif sahələrdə uğurla inkişaf edir

14.11.2009 [11:01]

Azərbaycan Respublikasının Prezidenti İlham Əliyev Bolqarıstanda işgüzar səfərdə olub
AzərTAc-ın xüsusi müxbiri xəbər verir ki, dünən Azərbaycan Respublikasının Prezidenti İlham Əliyev Belarus Respublikasına rəsmi səfərini başa çatdıraraq Bolqarıstana işgüzar səfərə yola düşüb.
Hər iki ölkənin dövlət bayraqları ilə bəzədilmiş Sofiya Beynəlxalq hava limanında Azərbaycan Prezidentinin şərəfinə fəxri qarovul dəstəsi düzülüb. Prezident İlham Əliyevi Bolqarıstan Respublikasının yüksək vəzifəli dövlət və hökumət nümayəndələri qarşılayıblar.
Sofiyada, Prezident Administrasiyasında Azərbaycan Prezidenti İlham Əliyevin və Bolqarıstan Prezidenti Georgi Pırvanovun görüşü olub.
Əvvəlcə prezidentlər İlham Əliyev və Georgi Pırvanov rəsmi foto çəkdiriblər.
Görüşdə Azərbaycan ilə Bolqarıstan arasında ikitərəfli münasibətlərin müxtəlif sahələrdə uğurla inkişaf etdiyi qeyd olunub.
İqtisadi əlaqələrin, o cümlədən enerji sahəsində əməkdaşlığın perspektivləri müzakirə edilib. Dövlət başçıları Azərbaycan-Bolqarıstan münasibətlərinin bundan sonra da möhkəmlənəcəyinə əmin olduqlarını bildiriblər.
Görüşdə, həmçinin regional əməkdaşlıq və beynəlxalq məsələlər ətrafında fikir mübadiləsi aparılıb.
Sofiyada, Prezident Administrasiyasında Azərbaycan-Bolqarıstan sənədlərinin imzalanma mərasimindən sonra Azərbaycan Respublikasının Prezidenti İlham Əliyevin və Bolqarıstan Respublikasının Prezidenti Georgi Pırvanovun birgə mətbuat konfransı olub. Bolqarıstan Prezidenti Georgi Pırvanov bildirib ki, bu gün iki ölkə arasında imzalanan sənədlər münasibətlərimizin keyfiyyətcə yeni mərhələsini təşkil edir. ölkələrimiz arasında fəal siyasi dialoq mövcuddur. “Eyni zamanda, iqtisadi sahadə əməkdaşlıq meyillərini görürük”, - deyən Georgi Pırvanov ölkələrimizin beynəlxalq təşkilatlar, o cümlədən Avropa və Avratlantik təsisatlar çərçivəsində fəal əməkdaşlıq etdiyini diqqətə çatdırıb.
Bolqarıstan Prezidenti bildirib ki, Azərbaycan bizim energetika sahəsində yaxın tərəfdaşımızdır. Georgi Pırvanov Azərbaycanda hasil edilən qazın Bolqarıstana nəqlində maraqlı olduqlarını diqqətə çatdırıb.
Azərbaycan Prezidenti İlham Əliyev qeyd edib ki, keçirilən danışıqlarda gözəl nəticələr əldə olunub və ikitərəfli münasibətlərimiz uğurla inkişaf edir. Azərbaycan dövlətinin başçısı bildirib ki, Bolqarıstan bizim üçün önəmli tərəfdaş və dost ölkədir.
Prezident İlham Əliyev vurğulayıb ki, ölkələrimiz arasında siyasi əlaqələrin yüksək səviyyədə olması bütün başqa sahələrə də öz müsbət təsirini göstərir: “Avropa İttifaqı ilə Azərbaycan arasında əməkdaşlıqda Bolqarıstanın çox önəmli rolu var”.
Avratlantik strukturlara inteqrasiya prosesində Bolqarıstanın həmişə Azərbaycanı dəstəklədiyini vurğulayan dövlətimizin başçısı deyib ki, bu yaxınlarda Azərbaycan Avropa İttifaqının “Şərq tərəfdaşlığı” Proqramının üzvü olub: “Biz ümid edirik ki, bu proqram çərçivəsində Avropa İttifaqı ilə Azərbaycan arasında əməkdaşlıq daha da genişlənəcəkdir”.
Avropa İttifaqı ilə Azərbaycan arasında enerji sahəsində əlaqələrə toxunan dövlətimizin başçısı qeyd edib ki, son illər enerji təhlükəsizliyi məsələlərinin əhəmiyyəti artıb. Azərbaycan bu məsələlərin həllinə öz töhfəsini verir.
Prezident İlham Əliyev əmin olduğunu bildirib ki, Bolqarıstan ilə Azərbaycan arasında qaz sahəsində əməkdaşlıq da uğurlu olacaq.
Sonda dövlət başçıları jurnalistlərin suallarını cavablandırıblar.
Sofiyada prezidentlər İlham Əliyevin və Georgi Pırvanovun iştirakı ilə Azərbaycan-Bolqarıstan sənədlərinin imzalanması mərasimi olub.
“Azərbaycan Respublikasının Sənaye və Energetika Nazirliyi və Bolqarıstan Respublikasının İqtisadiyyat, Enerji və Turizm Nazirliyi arasında əməkdaşlıq haqqında Memorandum”u Azərbaycanın sənaye və energetika naziri Natiq Əliyev və Bolqarıstanın iqtisadiyyat, enerji və turizm naziri Trayço Traykov, “Bolqarıstanın “Bulqartransqaz” Şirkəti və Azərbaycan Respublikası Dövlət Neft Şirkəti arasında təbii qazın nəqli sahəsində qarşılıqlı Anlaşma Memorandumu”nu “Bulqartransqaz”ın icraçı direktoru İvan Drenoviçki və ARDNŞ-in vitse-prezidenti Elşad Nəsirov imzalayıblar.

* * *

Sofiyada, Prezident Administrasiyasında mətbuat konfransından sonra Azərbaycan Prezidenti İlham Əliyev və Bolqarıstan Prezidenti Georgi Pırvanov birgə nahar ediblər.

* * *

Dünən Azərbaycan Respublikasının Prezidenti İlham Əliyevin Bolqarıstan Respublikasına işgüzar səfəri başa çatıb. Hər iki ölkənin dövlət bayraqları ilə bəzədilmiş Sofiya Beynəlxalq hava limanında Azərbaycan Prezidentinin şərəfinə fəxri qarovul dəstəsi düzülüb. Prezident İlham Əliyevi Bolqarıstan Respublikasının yüksək vəzifəli dövlət və hökumət nümayəndələri yola salıblar.
Dövlətimizin başçısı həmin gün axşam Bakıya qayıdıb. Azərbaycan Prezidentini Heydər Əliyev adına Beynəlxalq hava limanında Baş nazir Artur Rasizadə, Prezident Administrasiyasının rəhbəri Ramiz Mehdiyev və Bakı Şəhər İcra Hakimiyyətinin başçısı Hacıbala Abutalıbov qarşılayıblar.

Paylaş:

Baxılıb: 1412 dəfə