Qırğız Respublikasında Azərbaycan Musiqisi Günü keçirilib

Bakı:

11 °C

93 %

3 m/s

Əlaqə

AZ RU EN

Ana səhifə / Mədəniyyət / Qırğız Respublikasında Azərbaycan Musiqisi Günü keçirilib

Qırğız Respublikasında Azərbaycan Musiqisi Günü keçirilib

18.10.2014 [10:56]

Azərbaycan Respublikasının Qırğız Respublikasındakı səfirliyinin dəstəyi ilə oktyabrın 15-də Qırğız Respublikasının Abdılas Maldıbayev adına Milli Akademik Opera və Balet Teatrında Azərbaycan Musiqisi Günü keçirilib. Qırğız Respublikasının hökumət üzvlərinin, xarici dövlətlərin bu ölkədəki səfirlərinin, beynəlxalq təşkilatların rəhbərlərinin, görkəmli ziyalıların, həmçinin, Qırğız ictimaiyyətin nümayəndələrinin də iştirak etdiyi tədbiri A.Maldıbayev adına Milli Akademik Opera və Balet Teatrının direktoru Timur Salamatov açaraq Azərbaycan Respublikasının bu ölkədəki səfirliyinin son vaxtlar iki qardaş ölkənin mədəniyyət sahəsində əlaqələrinin inkişafı üçün göstərdiyi səylərə görə təşəkkürünü bildirib.
Sonra çıxış edən Qırğız Respublikasının mədəniyyət, informasiya və turizm nazirinin birinci müavini, stats-sekretar Akimbek Tekeşov növbəti dəfə belə böyük tədbirin Bişkekdə keçirilməsinin təşkili üçün Azərbaycan Respublikasının Qırğız Respublikasındakı fövqəladə və səlahiyyətli səfiri Hidayət Orucova təşəkkür edərək, iki ölkə arasında mədəni əlaqələrin inkişafında xidmətlərinə görə ona Qırğız Respublikası Mədəniyyət, İnformasiya və Turizm Nazirliyinin fəxri medalını təqdim edib.
Tədbirdə çıxış edən səfir Hidayət Orucov mükafatın onun üçün gözlənilməz olduğunu və bunun üçün dərin təşəkkürünü bildirib. Səfir vurğulayıb ki, Azərbaycan ilə Qırğızıstan arasında əməkdaşlıq münasibətləri təkcə siyasi və iqtisadi sahədə deyil, həm də humanitar sahədə inkişaf etməkdədir və bu xətt Azərbaycan Respublikasının Prezidenti İlham Əliyevin və Qırğız Respublikasının Prezidenti Almazbek Atambayevin siyasətinin prioritet istiqamətlərindəndir: “Son zamanlarda həm Azərbaycanda, həm də Qırğızıstanda bir çox birgə maraqlı humanitar tədbirlər keçirilməkdədir. Belə tədbirlərin keçirilməsi qardaş xalqları daha da yaxınlaşdırır. Bu axşam baxacağımız “Arşın mal alan” operettası həm yaşlı, həm də cavan nəsil arasında çox sevilir, çünki o bütün nəsillər üçün yaranmış unudulmaz bir incidir”.
Qeyd olunub ki, Üzeyir Hacıbəyli 101 il bundan əvvəl - 1903-cü ildə hələ Peterburq konservatoriyasının tələbəsi olarkən “Arşın mal alan” operettasını yazıb və elə həmin ildə də bu operetta Bakıda Zeynalabdin Tağıyev adına teatrda səhnəyə qoyulub. Bu əsər 76 ölkənin 187 teatrında səhnəyə qoyulub. Onun əsasında hələ 1945-ci ildə çəkilmiş film isə 136 ölkədə göstərilib. Üzeyir Hacıbəyli bütün müsəlman Şərqində ilk operanın, operettanın, musiqili komediyanın və kantat-oratoriya musiqisinin yaradıcısı, ümumilikdə isə Azərbaycan klassik musiqi sənətinin banisidir. Üzeyir Hacıbəyli 1908-ci ilin 25 yanvarında Azərbaycan milli opera sənətinin ilk nümunəsi kimi tarixə düşən “Leyli və Məcnun”u səhnələşdirilib.
Səfir görkəmli Azərbaycan bəstəkarlarının əsərlərini həmişə öz repertuarına daxil etdiyi və bu gün “Arşın mal alan” operettasını tamaşaya hazırladığı üçün Qırğız Respublikasının Abdılas Maldıbayev adına Milli Akademik Opera və Balet Teatrının kollektivinə dərin təşəkkürünü bildirib.
Sonra Üzeyir Hacıbəylinin “Arşın mal alan” operettasının premyerası keçirilib.
Qeyd edək ki, tamaşanın quruluşçu-dirijoru - Qırğız Respublikasının Xalq artisti Jumakadır Kanimetov, quruluşçu-rejissoru - Əməkdar artist Sapar İsmailov, quruluşçu-baletmeysteri - Berdalı Pomankulov, quruluşçu-xormeysteri - Karaqul Tilençiyevdir. Əsərin liberettosunun tərcüməçisi - Uzakbay Abdukaimovdur.
“Arşın mal alan” operettasının ifaçıları istedadlı gənc qırğız vokalçılardır.
Gülçöhrə rolunda - Gülnur Niyazbayeva, Əskər rolunda - Stalbek Junuşaliyev, Süleyman rolunda - Nurciqit Asanov, Sultan bəy rolunda - Qırğız Respublikasının Əməkdar artisti Kayınbek Kuskakov, Asya rolunda - Kunduz Karıppayeva, Telli rolunda - Salıyma Mamatova, Vəli rolunda - Almazbek İstambayev çıxış ediblər.
Tamaşanı teatrın xoru və simfonik orkestri müşahidə edib.

Paylaş:

Baxılıb: 1140 dəfə