Rusiya vasitəçi ölkə olaraq öhdəliklərini pozur

Bakı:

17 °C

63 %

11 m/s

Əlaqə

AZ RU EN

Ana səhifə / Siyasət / Rusiya vasitəçi ölkə olaraq öhdəliklərini pozur

Rusiya vasitəçi ölkə olaraq öhdəliklərini pozur

18.10.2017 [10:12]

İşğalçı Ermənistanı silahlandıran rəsmi Moskva Dağlıq Qarabağ münaqişəsində bitərəf olmadığını göstərir
Xəbər verildiyi kimi, Ermənistan hökuməti oktyabrın 12-də Rusiyadan alacağı 100 milyon dollarlıq birinci kredit paketini təsdiq edib. Xatırladaq ki, 2015-ci il noyabrın 26-da imzalanmış razılaşmaya əsasən, Rusiya Ermənistana müasir silahlar almaq üçün 200 milyon dollar kredit vermək öhdəliyi götürüb. Müqaviləyə əsasən, 100 milyonluq kredit Ermənistana 20 il müddətinə verilir. Bu müddətin 5 ilinin illik 3 faiz dərəcəsi ilə güzəştli olması nəzərdə tutulub. Həmin vəsaitə Ermənistanın “Smerç” reaktiv sistemləri, “İqla-S” zenit raket kompleksləri, “Avtobaza-M” radiotexniki kəşfiyyat kompleksləri, TOC-1A “Solnsepyok” ağır odsaçan sistemləri və digər sursatlar alacaq.
Göründüyü kimi, Rusiya Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır. Həmçinin Rusiya ATƏT-in Minsk qrupunun həmsədri kimi, öz öhdəliklərini pozur, münaqişə tərəflərinin birinə hərtərəfli yardım göstərməklə bitərəflik tələbinə əməl etmədiyini açıq şəkildə göstərir. Digər tərəfdən, Rusiyanın bu addımı ölkəmizlə olan dostluq, yaxın qonşuluq və strateji tərəfdaşlıq prinsiplərinə ziddir. Eləcə də Minsk qrupunun həmsədri olaraq vasitəçilik missiyasını üstlənən Rusiya bu silahlandırma ilə işğalçılıq siyasətinin həvəsləndirilməsinə və beynəlxalq hüququn tələblərinin kobud şəkildə pozulmasına xidmət göstərir. Bunun qarşılığında Azərbaycan dövləti və ictimaiyyəti Rusiyadan daha ölçülüb-biçilmiş siyasət yürüdülməsini, işğalçı Ermənistana yardımlarını dayandırmasını və ATƏT-in Minsk qrupunun həmsədri kimi, öz missiyasını və üzərinə düşən öhdəliklərini yerinə yetirməsini gözləyir.
Məsələ ilə bağlı fikirlərini bölüşən Milli Məclisin deputatı Musa Qasımlı qeyd edib ki, Rusiyanın Ermənistana silah verməsi regionda şəraitin daha da gərginləşməsinə yönəlib. Onun sözlərinə görə, Ermənistanın hərbi təcavüzü nəticəsində yaranmış Dağlıq Qarabağ münaqişəsinin həlli məqsədi ilə yaradılmış ATƏT-in Minsk qrupunun həmsədri olan Rusiyanın Ermənistana silah verməsi həm həmsədrlik mandatı, həm beynəlxalq normalar, həm də mənəvi baxımdan yanlışdır. Bu addım münaqişənin həllinə deyil, şəraitin daha da gərginləşməsinə yönəlib.
“Trend” İnformasiya Agentliyinin baş direktorunun müavini Arzu Nağıyev də Rusiyanın işğalçı Ermənistana müasir silahlar almaq üçün 200 milyon dollar kredit verməsi ilə ATƏT-in Minsk qrupunun həmsədri kimi, öhdəlikləri pozduğunu dilə gətirib. A.Nağıyev qeyd edib ki, Rusiya münaqişə tərəflərinin birinə hərtərəfli yardım göstərməklə bitərəflik tələbinə əməl etmədiyini açıq göstərir: “Ermənistan bugünkü iqtisadi vəziyyəti ilə bu krediti qaytarmaq imkanında deyil. Rusiya Ermənistanı müasir silahlarla təchiz edir, təcavüzkar və işğalçı dövlətin hərbi potensialını gücləndirməyə çalışır. Rusiyanın Ermənistanı silahlandırması Azərbaycan-Rusiya münasibətlərinin ruhuna ziddir. İki ölkə arasında mühüm əlaqələr mövcuddur. Rusiyanın Ermənistan-Azərbaycan, Dağlıq Qarabağ münaqişəsinin həllində heç də bitərəf olmadığı və daha çox Ermənistanın maraqlarına uyğun hərəkət etdiyi aydın görünür”.
PƏRVİZ

Paylaş:

Baxılıb: 449 dəfə