Azərbaycan və Dağıstan iqtisadi sahədə əməkdaşlığı genişləndirmək niyyətindədirlər

Bakı:

11 °C

87 %

7 m/s

Əlaqə

AZ RU EN

Ana səhifə / Siyasət / Azərbaycan və Dağıstan iqtisadi sahədə əməkdaşlığı genişləndirmək niyyətindədirlər

Azərbaycan və Dağıstan iqtisadi sahədə əməkdaşlığı genişləndirmək niyyətindədirlər

25.05.2010 [10:03]

Dünən Rusiya Federasiyası Dağıstan Respublikasının Prezidenti Maqomedsalam Maqomedov Azərbaycana səfərə gəlib. Rusiya Federasiyası Dağıstan Respublikasının Prezidenti Maqomedsalam Maqomedov Fəxri Xiyabana gələrək, xalqımızın ümummilli lideri, görkəmli dövlət xadimi Heydər Əliyevin xatirəsini ehtiramla yad edib, məzarı önünə əklil qoyub. Görkəmli oftalmoloq alim, akademik Zərifə xanım Əliyevanın xatirəsi yad olunub, məzarı üstünə gül dəstələri düzülüb. 1942-1948-ci illərdə Dağıstan Vilayət Partiya Komitəsinin birinci katibi vəzifəsində çalışmış böyük alim və görkəmli dövlət xadimi Əziz Əliyevin də xatirəsi yad olunub, məzarı üzərinə gül dəstələri qoyulub. Rusiya Federasiyası Dağıstan Respublikasının Prezidenti Maqomedsalam Maqomedov Şəhidlər Xiyabanına gələrək, Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının məzarlarını ziyarət edib, “Əbədi məşəl” abidəsinin önünə əklil qoyub. Ali qonaq Bakının ən hündür nöqtəsindən Azərbaycan paytaxtının mənzərəsini seyr edib.

* * *

Dünən Azərbaycan Respublikasının Baş naziri Artur Rasizadə və Rusiya Federasiyasının Dağıstan Respublikasının Prezidenti Maqomedsalam Maqomedovun görüşü keçirilib. Azərbaycan hökumətinin başçısı qeyd edib ki, xalqlarımızı möhkəm tarixi dostluq və qardaşlıq telləri birləşdirir, Azərbaycanda Dağıstanın uğurlarını həmişə sevinclə izləyirlər. ümummilli lider Heydər Əliyev Rusiya Federasiyasının subyektlərindən biri olan, Azərbaycanın müxtəlif sahələrdə fəal əməkdaşlıq etdiyi Dağıstanla əlaqələrin genişləndirilməsi məsələlərinə həmişə böyük diqqətlə yanaşırdı. Artur Rasizadə Dağıstan nümayəndə heyətinin üzvlərinə Azərbaycanın əsas problemi Ermənistan-Azərbaycan, Dağlıq Qarabağ münaqişəsinin hələ də nizamlanmaması barədə məlumat verib.
Prezident Maqomedsalam Maqomedov isə Dağıstan ərazisində dəniz neft yataqlarının işlənilməsində Azərbaycan neftçilərinin təcrübəsindən istifadə etməyin vacibliyini vurğulayıb. O, həmçinin, Azərbaycan-Dağıstan hökumətlərarası komissiyasının birinci iclasının keçirilməsinə hazırlıq işlərini, Samur çayı üzərində su elektrik stansiyası tikintisinə dair müştərək layihənin həyata keçirilməsini sürətləndirməyin zəruri olmasını qeyd edib.
Azərbaycanda səfərdə olan Rusiya Federasiyası Dağıstan Respublikasının Prezidenti Maqomedsalam Maqomedov Milli Məclisdə olub. Parlamentin binası önündə ali qonağı Milli Məclisin sədri Oqtay Əsədov və digər rəsmi şəxslər qarşılayıblar. Dağıstan Prezidenti Milli Məclisin iclas zalına baxıb, deputatlar üçün yaradılmış şəraiti yüksək qiymətləndirib. Sonra Oqtay Əsədov ilə Maqomedsalam Maqomedov arasında təkbətək görüş olub. Daha sonra görüş geniş tərkibdə davam etdirilib. Oqtay Əsədov Maqomedsalam Maqomedovu Dağıstan Respublikasının Prezidenti seçilməsi münasibətilə təbrik edib. Milli Məclisin sədri deyib ki, Azərbaycan Respublikası ilə Rusiya Federasiyası Dağıstan Respublikası arasında münasibətlər bütün sahələrdə inkişaf edir. Xalqlarımız arasında çox qədim dostluq və qonşuluq münasibətləri var. Yüksək səviyyəli qarşılıqlı səfərlər əlaqələrimizin daha da inkişaf etdirilməsi üçün yeni imkanlar açır.
Maqomedsalam Maqomedov səmimi sözlərə və təbrikə görə minnətdarlıq edib. Azərbaycan parlamentinin binasında aparılmış təmir-bərpa işlərini, yeni korpusun tikintisini yüksək qiymətləndirən qonaq deyib ki, bu, həm də Azərbaycanın dinamik inkişafının bariz göstəricisidir. Maqomedsalam Maqomedov Dağıstanın Azərbaycan ilə əlaqələrin bütün sahələrdə inkişaf etdirilməsində maraqlı olduğunu bildirib. Görüşdə qarşılıqlı maraq doğuran məsələlər ətrafında geniş fikir mübadiləsi aparılıb.

* * *

Rusiya Federasiyası Dağıstan Respublikasının Prezidenti Maqomedsalam Maqomedov dünən Heydər Əliyev Fondunda olub. Ali qonağa Azərbaycan xalqının ümummilli liderinin xatirəsinə yaradılmış Fondun məqsədləri və fəaliyyəti barədə məlumat verilib. Dağıstan Prezidenti Ulu öndərin şəxsi arxivindən götürülmüş və Onun fəaliyyətinin ayrı-ayrı dövrlərinə aid eksponatlar və fotoşəkillərlə tanış olub. Fondla tanışlıq zamanı Dağıstan Prezidentinə məlumat verilib ki, bugünkü qüdrətli və zəngin Azərbaycan Ulu öndər Heydər Əliyevin müəyyənləşdirdiyi yol ilə uğurla irəliləyir. Müasir müstəqil Azərbaycanın memarı və qurucusu Heydər Əliyev azərbaycanlıların milli qürur və iftixar mənbəyinə çevrilib, xalqımızın ümummilli lideri adını qazanıb. Ulu öndərin hakimiyyətdə olduğu dövr Azərbaycan tarixində ən şərəfli səhifələrdən biridir. Bu gün beynəlxalq birlik tərəfindən ölkəmizin misilsiz uğurları kimi qəbul edilən sosial-iqtisadi inkişaf, əldə olunan nailiyyətlər məhz ümummilli liderin fəaliyyətinin bəhrələridir.
Dağıstan Prezidenti fenomen şəxsiyyət Heydər Əliyevin həyatının ən müxtəlif məqamlarını əks etdirən və Azərbaycan tarixinin bütöv bir dövrü barədə geniş təsəvvür yaradan çoxlu sənədlərlə, dünyanın tanınmış siyasi xadimlərinin bəxş etdikləri hədiyyələrlə, Ulu öndərə həsr olunmuş kitablarla, nüfuzlu elm, mədəniyyət və incəsənət xadimlərinin müstəqil Azərbaycan dövlətinin qurucusu haqqında fikirləri ilə tanış olub, xarici ölkələrin liderləri ilə görüşlərdə çəkilmiş şəkillərə maraqla baxıb.
Prezident Maqomedsalam Maqomedov Fondla tanışlıqdan sonra Xatirə kitabına ürək sözlərini yazıb. Dağıstan Prezidentinə Fondun nəşri olan “Muğam aləmi” musiqi albomu hədiyyə edilib. Dağıstan Prezidenti də Fonda xatirə hədiyyəsi təqdim edib. Ali qonaq Fonddan zəngin təəssüratla ayrılıb.

Paylaş:

Baxılıb: 1123 dəfə