Azərbaycan Respublikasının Seçki Məcəlləsinə əlavələr və dəyişikliklər ediləcək

Bakı:

13 °C

88 %

10 m/s

Əlaqə

AZ RU EN

Ana səhifə / Siyasət / Azərbaycan Respublikasının Seçki Məcəlləsinə əlavələr və dəyişikliklər ediləcək

Azərbaycan Respublikasının Seçki Məcəlləsinə əlavələr və dəyişikliklər ediləcək

10.06.2010 [02:03]

Azərbaycan Respublikasının Seçki Məcəlləsinə əlavələr və dəyişikliklər ediləcək. Milli Məclisin Hüquq siyasəti və dövlət quruculuğu komitəsinin dünən keçirilmiş iclasında “Azərbaycan Respublikasının Seçki Məcəlləsinə əlavələr və dəyişikliklər edilməsi haqqında” qanun layihəsi müzakirə olunub. Komitənin sədri Əli Hüseynov deyib ki, Yeni Azərbaycan Partiyasının (YAP) Milli Məclisdə təmsil olunan deputatları Azərbaycanın seçki praktikasının daha da təkmilləşdirilməsi, beynəlxalq standartlara uyğunlaşdırma və qabaqcıl dünya təcrübəsinin tətbiq olunması üçün Seçki Məcəlləsinə əlavələr və dəyişikliklər edilməsi barədə layihə hazırlayaraq parlamentin rəhbərliyinə təqdim ediblər. Milli Məclisin sədri, daxili nizamnaməyə uyğun olaraq, həmin qanun layihəsini baxılmaq üçün komitəyə göndərib.
Sonra YAP İcra katibinin müavini, deputat Siyavuş Novruzov Seçki Məcəlləsinə təklif olunan əlavə və dəyişikliklərlə bağlı məlumat verib. O, deyib ki, məcəlləyə təklif olunan birinci dəyişiklik seçkilərin elan edilməsi müddətinin azaldılması ilə bağlıdır. Belə ki, təklif olunan variantda seçkilərin elan edilməsi müddəti 75 gündən 60 günə endirilir. Yəni seçkilər (referendum) səsvermə gününə azı 60 gün qalmış elan ediləcək. Dairə seçki komissiyalarının təşkili maddəsinə təklif olunan dəyişikliyə görə DSK-lar seçkilərdən əvvəl yaradıldıqda səsvermə gününə azı 50 gün qalmış təşkil olunmalıdır. Bununla yanaşı, layihədə seçki siyahılarının məntəqə seçki komissiyaları tərəfindən səsverməyə azı 20 gün qalmış dəqiqləşdirilməsi, namizədlərin qeydə alınması üçün sənədlərin seçki komissiyalarına səsvermə gününə azı 30 gün qalmış təqdim edilməsi, seçkiqabağı təşviqatın səsvermə gününə 23 gün qalmış başlayaraq, səsvermənin başlanmasına 24 saat qalanadək dayandırılması və s. nəzərdə tutulub. Məcəlləyə təklif olunan əsas dəyişikliklərdən biri seçkilərin maliyyələşdirilməsi ilə əlaqədardır.
S.Novruzov deyib ki, ölkəmizdə seçkilərin keçirilməsi dövlət tərəfindən maliyyələşdirilir. Dairə və məntəqə seçki komissiyaları dövlət tərəfindən saxlanılır. Seçki ilə bağlı bütün xərcləri dövlət çəkdiyi halda əlavə olaraq, namizədlərə vəsait verilməsi düzgün deyildir: “2005-ci ildə əksər adamlar təbliğat üçün veriləcək 200 manatı almaq üçün namizədliklərini irəli sürmüşdülər. Qanuna görə seçkidə 3 faizə qədər səs toplamayan namizədlər ayrılan vəsaiti geri qaytarmalıdırlar. Lakin bu günə kimi vəsaitin geri qaytarılması baş verməyib. Ona görə də namizədlərə təbliğat üçün əlavə vəsait verilməyəcək”.
Sonra YAP İcra katibinin digər müavini, deputat Mübariz Qurbanlı layihə ilə bağlı təmsil olunduğu partiyanın mövqeyini açıqlayıb, bu sahədə mövcud dünya praktikasından danışıb. Müzakirələr zamanı çıxış edən deputatlar Seçki Məcəlləsinə təklif olunan əlavə və dəyişikliklərin mahiyyətindən danışıb, bu dəyişikliklərin Azərbaycanın seçki praktikasını daha da təkmilləşdirəcəyini vurğulayıblar.
Sonda qanun layihəsi Milli Məclisin müzakirəsinə tövsiyə olunub.
Müzakirələrdə ATƏT-in Bakı ofisinin nümayəndəsi də iştirak edib.

Paylaş:

Baxılıb: 1112 dəfə