Bəzi qüvvələr din pərdəsi altında gizlənərək ölkəmizdə təxribatlar törətməyə çalışırlar

Bakı:

11 °C

87 %

1 m/s

Əlaqə

AZ RU EN

Ana səhifə / Siyasət / Bəzi qüvvələr din pərdəsi altında gizlənərək ölkəmizdə təxribatlar törətməyə çalışırlar

Bəzi qüvvələr din pərdəsi altında gizlənərək ölkəmizdə təxribatlar törətməyə çalışırlar

18.01.2011 [09:37]

Azərbaycan hər zaman fərqli dinlərin daşıyıcılarının qardaşlıq zəminində yaşadığı ölkə olub. Azərbaycanın dünya üçün bir tolerantlıq nümunəsi olması hər zaman xüsusi olaraq vurğulanır. Təbii ki, müxtəlif dini, siyasi, etnik qarşıdurmalarla müşayiət olunan XXI əsrdə Azərbaycanda bu cür gözəl bir ab-havanın hökm sürməsi, bütün dinlərin daşıyıcılarının sərbəst şəkildə öz inanclarına etiqad etməsinə şəraitin yaradılması Ulu öndərimiz tərəfindən əsası qoyulan və bu gün də Prezident İlham Əliyev tərəfindən uğurla davam etdirilən siyasi kursun nəticəsidir. Azərbaycan Konstitusiyasında dinindən, dilindən asılı olmayaraq, bütün vətəndaşların qanun qarşısında bərabər hüquqlarının təsbit olunması ölkəmizdəki tolerantlığın bariz sübutu sayılmalıdır. Azərbaycanda dövlət-din münasibətləri modeli çərçivəsində bütün dini konfessiyalar qanun qarşısında bərabərdir və eyni statusa malikdir. ölkə vətəndaşlarının əksəriyyətini təşkil edən müsəlmanların hüquqlarının təmin olunması ilə yanaşı, dövlət respublikada yayılan digər dinlərə də qayğı göstərir.
Təəssüf ki, ölkəmizdə yaradılan bu şəraitdən bəzən sui-istifadə etməyə çalışanlar tapılır. Xarici qüvvələrin təhriki ilə ölkədə demokratik inkişafa mane olmağa, ara qarışdırmağa çalışan bu cür qüvvələr din pərdəsi altında gizlənirlər. Son zamanlar bir qrup insanların istər hicab məsələsində, istərsə də, digər bir sıra məsələlərdə ortaya qoyduqları mövqe, həyata keçirmək istədikləri təxribatlar da bir daha sübut edir ki, onlar öz çirkin oyunlarda müqəddəs dindən istifadə etməklə bu inancın siyasiləşdirilməsinə çalışırlar.
Məsələyə münasibət bildirən Milli Məclisin deputatı, politoloq Rasim Musabəyov deyib ki, Azərbaycan dünyəvi dövlətdir və ölkəmizdə din dövlətdən ayrı olmalıdır. Bəzi dini qrupların siyasiləşməsi cəhdlərini mənfi hal kimi dəyərləndirən millət vəkili hesab edir ki, belə dairələrin fəaliyyətinə nəzarət gücləndirilməlidir: “Azərbaycanda din dövlətdən ayrı olmalıdır. Ona görə də, müəyyən dairələrin son vaxtlar tutduqları mövqe düzgün deyil. Belə qrupların xarici qüvvələrin təsiri altında fəaliyyət göstərməsi şübhə doğurmur”.
Politoloqun fikrincə, qanunun pozulduğu təqdirdə kimliyindən və dinindən asılı olmayaraq, hər kəs cavab verməlidir: “Biz açıq cəmiyyətdə yaşayırıq. Xarici təsirlərin mövcudluğu inkar edilə bilməz. Amma bu təsirlər bilavasitə qanunun qadağan etdiyi şəkil aldığı təqdirdə, təbii ki, qarşısı alınmalıdır. Məsələn, Azərbaycan qanunvericiliyinə görə, siyasi partiyalar xaricdən maliyyələşdirilə bilməz. Eyni zamanda, müəyyən qrupların hansısa şəbəkəyə daxil olmaları da yolverilməzdir”.
Politoloq Elşad Mirbəşir də Azərbaycanın tolerant ölkə olduğunu və bu coğrafiyada tarixin hər bir məqamında fərqli dini konfessiyaların mövcud olduğunu bildirib. Onun sözlərinə görə, ölkəmizdə bütün dinlərin müstəqil fəaliyyəti, dəyərlərini qoruyub saxlamaları üçün hər cür imkan və şərait mövcuddur: “Fərqli dinlərin daşıyıcıları üçün ən yüksək səviyyədə şərait yaradılıb. Amma nəzərə alınmalıdır ki, bu fəaliyyət qanunun çərçivələrini aşmamalıdır. Təbii ki, ölkə hüdudlarından kənarda Azərbaycandakı siyasi-iqtisadi sabitliyin pozulmasında maraqlı olan qüvvələr kimi dini qarşıdurmaların da yaranmasına çalışanlar var. Bu üzdən də, dini sahədəki sabitliyi süni şəkildə pozmağa çalışırlar. Bir müddət öncə hicabla bağlı məsələni şişirdib ali müstəviyə qaldırmağa cəhdlər buna misal ola bilər”.
Müxtəlif dini təriqətlərə qulluq edən qeyri-leqal silahlı qüvvələrin zaman-zaman Azərbaycanda sabitliyə qarşı müəyyən hadisələr törətməyə cəhdlər göstərdiyini söyləyən E.Mirbəşir bu yaxınlarda da belə bir qrupun aşkarlanaraq zərərsizləşdirildiyini söyləyib: “Bu kimi hallar bir növ Azərbaycandakı dini sabitliyə kölgə salmaq cəhdləridir. Lakin Azərbaycanda kifayət qədər dayanıqlı, kifayət qədər mükəmməl siyasi idarəetmə sistemi mövcuddur. Bu baxımdan da, bu cür pozucu halların qarşısı qətiyyətlə və peşəkarlıqla alınır”.
Politoloq Elman Nəsirli də bildirib ki, Azərbaycan dünyəvi dövlətdir və bununla yanaşı, ölkəmizdə bütün dinlərin, təriqətlərin təmsilçiləri ölkə qanunları çərçivəsində azad fəaliyyət göstərmək hüququna malikdirlər. Azərbaycanın sözün əsl mənasında tolerant dövlət olduğunu bildirən politoloq qeyd edib ki, yaradılan bu şəraitdən sui-istifadə etməyə çalışanlar da tapılır: “Təəssüf ki, bir sıra hallarda dinlə əlaqəsi olmayan qüvvələr tapılır ki, onlar daha çox öz siyasi məqsədlərinin əsirinə çevrilirlər. Belələri yaradılmış bu gözəl və əlverişli imkandan pis niyyətlərini həyata keçirmək üçün bir vasitə kimi istifadə etməyə çalışırlar. Bu cür tendensiyalara hər zaman təsadüf olunub. ölkəmiz iqtisadi-siyasi nailiyyətlər əldə etdikcə, Qərb standartlarına, demokratik ənənələrə daha çox bağlandıqca Azərbaycanın uğurlarını qəbul etməyən qüvvələr din pərdəsi altında daha çox fəallaşmağa çalışırlar və ölkədə dövlətçilik əleyhinə öz siyasi niyyətlərini həyata keçirməyə cəhdlər göstərirlər. çox maraqlıdır ki, bu cür psevdo din xadimlərinin evlərindən “Qurani-Kərim”, başqa dini kitabların yerinə, silah-sursat çıxır, sanki onların evləri silah anbarıdır”.
Bu silah-sursatın konkret təyinatının olduğunu bildirən politoloq vurğulayıb ki, psevdo din xadimləri bunu inkar etməyə çalışsalar da, bu belədir: “özünü din xadimi kimi təqdim edən, guya dinin keşiyində dayanan belə insanların evində silah-sursat tapılırsa, şübhəsiz ki, həmin silahın konkret təyinatı var və həmin təyinat da dövlətçiliyimizin əleyhinə yönəlib. Fikrimcə, Azərbaycan xalqı, dövlətimizin gələcəyini düşünən insanlar, statusundan, cəmiyyətdəki mövqeyindən asılı olmayaraq, bir ideya ətrafında birləşməlidirlər. Həmin ideya da azərbaycançılıq ideyasıdır. Hər bir vətəndaş belə hallara qarşı etiraz səsini ucaltmalı, mübarizə aparmalıdır. Bu qüvvələrin arxasında dayanan xarici havadarlara öz mövqeyimizi bildirməliyik. Təəssüflə qeyd etməliyik ki, belə qüvvələr ara-sıra Azərbaycanda peyda olurlar. Sevindirici haldır ki, onların Azərbaycanda fəaliyyəti üçün münbit şərait yoxdur. Ona görə də, Azərbaycan cəmiyyətinin hər bir üzvü istər daxilimizdə olan belə qüvvələrə qarşı, istərsə də xaricdən onları maliyyələşdirən qüvvələrə qarşı birgə mübarizə aparmalıdır”.
Pərviz SADAYOÄžLU

Paylaş:

Baxılıb: 961 dəfə