Azərbaycan Mətbuat Şurası Şirməmməd Hüseynovun 90 illik yubileyi ilə bağlı tədbir keçirib

Bakı:

18 °C

94 %

2 m/s

Əlaqə

AZ RU EN

Ana səhifə / Sosial / Azərbaycan Mətbuat Şurası Şirməmməd Hüseynovun 90 illik yubileyi ilə bağlı tədbir keçirib

Azərbaycan Mətbuat Şurası Şirməmməd Hüseynovun 90 illik yubileyi ilə bağlı tədbir keçirib

18.12.2014 [10:06]

Dünən Beynəlxalq Mətbuat Mərkəzində Azərbaycan jurnalistikasının görkəmli simalarından biri, mətbuatımızın əvəzedilməz tədqiqatçısı, Bakı Dövlət Universitetinin professoru Şirməmməd Hüseynovun 90 illik yubileyinə həsr olunmuş tədbir keçirilib. Azərbaycan Mətbuat Şurasının təşəbbüsü ilə keçirilmiş tədbirin iştirakçıları öncə yubilyarın ömür yolu ilə bağlı “Ustad” sənədli filminə tamaşa ediblər. Şuranın “O film” studiyası ilə birgə layihəsi əsasında çəkilmiş, Ş.Hüseynovu dəyərli ziyalı, tələbkar pedaqoq, qayğıkeş ailə başçısı, əsl dost olaraq səciyyələndirən xüsusiyyətlərin ətraflı təhlil olunduğu film maraqla qarşılanıb.
Yubiley mərasimində çıxış edən MŞ sədri Əflatun Amaşov Ş.Hüseynovu Azərbaycan jurnalistlərinin müəllimi kimi xarakterizə edən cəhətlərdən söz açıb. Yubilyarın həyat və yaradıcılığının nəinki gənc nəsil, müasirləri üçün də örnək mahiyyətini vurğulayıb. Ə.Amaşov qocaman qələm sahibinin Azərbaycan Xalq Cümhuriyyətinin banisi Məmməd Əmin Rəsulzadənin irsinin öyrənilməsi sahəsində xidmətləri üzərində dayanaraq bildirib ki, Ş.Hüseynov mövcud istiqamətdəki fəaliyyəti ilə bütövlükdə Azərbaycan tarixinin zənginləşməsinə layiqli töhfə verib. “90 illik ömür yolunun hikməti neçə-neçə elmi monoqrafiyadan, məqalədən və digər sanballı nümunələrdən ibarətdir. Məhz buna görə də Şirməmməd müəllim canlı salnamədir. Ona dəyər vermək təkcə bu günümüz deyil, gələcəyimiz üçün də zəruridir. Bu mənada Azərbaycan Respublikasının Prezidenti cənab İlham Əliyevin dünən (dekabrın 16-da - red.) imzaladığı Sərəncamla Şirməmməd Hüseynovun “Şərəf” ordeni ilə təltif edilməsi çox böyük hadisədir. Çünki yubilyarın yaradıcılıq fəlsəfəsinin qayəsində Azərbaycan xalqının varlığını, onun dünya xalqları arasındakı mövqeyini səciyyələndirən cəhətlər dayanır”, - deyə Ə.Amaşov bildirib.
Yubilyar Şirməmməd Hüseynov yubiley mərasimindəki çıxışında Azərbaycan Xalq Cümhuriyyətinin tarixi şəxsiyyətləri ilə bağlı tədqiqatlardakı spesifik məqamlardan, onları səciyyələndirən milli təəssübkeşlik xüsusiyyətlərindən, dövlətçilik ənənələrimizə sədaqət ruhunu yaşatmalarından söz açıb. Qocaman jurnalist həmçinin maraqlı replikaları ilə də diqqət çəkib. Yubilyarın Azərbaycan Xalq Cümhuriyyətinin 100 illik yubileyini görmək arzusu mərasim iştirakçıları tərəfindən alqışlarla qarşılanıb.
Tədbirdə Milli Məclisin deputatı, MŞ İdarə Heyətinin üzvü, “Azərbaycan” qəzetinin baş redaktoru Bəxtiyar Sadıqov, millət vəkili, tanınmış ədəbiyyatşünas və publisist Rafael Hüseynov, Milli Məclisin deputatı, MŞ İdarə Heyətinin üzvü Cavanşir Feyziyev, Əməkdar jurnalist, MŞ-nin Ahıl Jurnalistlər Məclisinin rəhbəri Yusif Kərimov, ANS Şirkətlər Qrupunun vitse-prezidenti Mirşahin Ağayev, Bakı Slavyan Universitetinin jurnalistika fakültəsinin dekanı Aynur Bəşirli çıxış edərək bildiriblər ki, Ş.Hüseynovun 90 illik yubileyi milli istiqlal düşüncəmizin bayramıdır.
Çıxışlarda Ş.Hüseynovun pedaqoq, tədqiqatçı və jurnalist kimi Azərbaycan xalqı qarşısındakı xidmətlərinin misilsiz olduğu da qeyd edilib.

Paylaş:

Baxılıb: 1211 dəfə