Abşeron seçiciləri də yüksək fəallıq nümayiş etdiriblər

Bakı:

16 °C

72 %

8 m/s

Əlaqə

AZ RU EN

Ana səhifə / Sosial / Abşeron seçiciləri də yüksək fəallıq nümayiş etdiriblər

Abşeron seçiciləri də yüksək fəallıq nümayiş etdiriblər

02.11.2015 [11:33]

Ölkə həyatının demokratikləşməsi, bütün sahələrdə şəffaflığın təmin olunması müstəqil Azərbaycanın qarşıya qoyduğu əsas hədəflərdəndir. Ölkəmiz hədəflənən məqsədlərə çatmaq üçün daim islahatlara yaşıl işıq yandırır, o cümlədən də respublikamızda seçki sistemi mütəmadi qaydada təkmilləşdirilərək dünyanın qabaqcıl dövlətlərinin modelinə uyğunlaşdırılır. Bu sahədə həyata keçirilən islahatlar, ilk növbədə, ona istiqamətlənib ki, seçkilərdə vətəndaş fəallığı, şəffaflıq daha geniş miqyasda təmin olunsun. Noyabrın 1-də keçirilən növbəti çağırış Milli Məclisə seçkilər respublikamızda vətəndaş cəmiyyətinin, demokratiyanın inkişafını hədəfləyən islahatların kifayət qədər səmərəli olduğunu təsdiqlədi. Milli Məclisə budəfəki seçkilər məhz vətəndaş fəallığının kifayət qədər yüksək olması ilə diqqəti cəlb etdi.
Bu baxımdan Abşeron rayonu da istisna deyil. Rayonda iki - 45 saylı Abşeron və 50 saylı Abşeron-Qobustan seçki dairələri təşkil olunub. 45 saylı Abşeron Dairə Seçki Komissiyasının sədri Dilşad Abbasovanın verdiyi məlumata əsasən, bəhs olunan dairə üzrə 36 məntəqədə 46 min 514 seçici qeydiyyata alınıb. Dairə üzrə məntəqələrdə seçkiyə bütün zəruri hazırlıqlar yüksək səviyyədə aparılıb. 12 məntəqədə veb-kameralar quraşdırılıb, 6 məntəqə hərəkətləri məhdud olan seçicilər üçün pantuslarla təmin edilib, eyni zamanda, bütün məntəqələrə gözdən əlil vətəndaşların seçkilərdə iştirakını təmin etmək məqsədilə xüsusi trafaretlər verilib. Dairə üzrə ən yaşlı seçicinin 103 yaşı var, həmçinin 812 nəfər 18 yaşı tamam olan gənc ilk dəfə səs verib.
45 saylı Abşeron Seçki Dairəsi üzrə 4 saylı Seçki Məntəqəsində səsvermənin başladığı ilk saatlardan səsvermə bitənədək seçicilərin böyük aktivliyi müşahidə edilib. Məntəqə Seçki Komissiyasının sədri Nailə Əzizova bildirib ki, məntəqədə 1391 seçici qeydiyyata alınıb. Səsvermədə seçicilərin aktivliyini təmin etmək məqsədilə bütün zəruri tədbirlər görülüb, ələlxüsus da ilk dəfə səs verəcək vətəndaşlarla geniş maarifləndirmə işləri aparılıb.
Məntəqədə seçkilərə yüksək səviyyədə hazırlıq görülməsi seçiciləri də razı salıb. Seçicilər Həsənağa Ağaverdiyev, Zeynəb Gözəlova səsvermə zamanı sərbəst şəkildə öz iradələrini ifadə etdiklərini bildiriblər. Müşahidə edilən əsas cəhətlərdən biri də ondan ibarətdir ki, məntəqədən çıxan seçicilərin böyük qismi Yeni Azərbaycan Partiyasının (YAP) namizədinə səs verdiklərini məmnunluqla qeyd ediblər.
50 saylı Abşeron-Qobustan Seçki Dairəsi dairə Seçki Komissiyasının sədri Rafəddin Nağdəliyevdən aldığımız məlumata əsasən, bu dairə üzrə qeydiyyata alınan 47 min 630 seçici 51 məntəqədə səs verib. Dairə üzrə məntəqələrin 49-u daimi, 2-si isə qapalıdır.
50 saylı Abşeron-Qobustan Seçki Dairəsi üzrə 1 saylı Məntəqə Seçki Komissiyasının sədri Afət Bayramov noyabrın 1-də səhər saat 8:00-da məntəqədə səsvermənin qanunvericiliyə uyğun qaydada başladığını bildirib. Seçici fəallığı səsvermənin sonunadək davam edib. Seçicilər, o cümlədən də ilk dəfə səs verən vətəndaşlar böyük məmnuniyyətlə seçki məntəqəsinə gələrək öz iradələrini ifadə ediblər. Ümumiyyətlə, məntəqədə 1403 seçici qeydiyyata alınıb. Səsvermənin aktiv keçməsinə əsaslanaraq seçicilərin böyük əksəriyyətinin seçkilərə fəal şəkildə qatıldığını söyləmək mümkündür.
1 saylı Seçki Məntəqəsində Yeni Azərbaycan Partiyasından müşahidəçi qismində qeydə alınan Elşən Rzayev, “Ana Vətən” Partiyasının müşahidəçisi sahib Hüseynov seçkilər zamanı hər hansı qanun pozuntusunu müşahidə etmədiklərini bildiriblər. Onlar məntəqədə səsvermənin yüksək səviyyədə keçməsini təmin etmək məqsədilə bütün lazımi şəraitin yaradıldığını vurğulayıblar.
Müşahidələrimiz zamanı həmçinin 45 saylı Abşeron Seçki Dairəsi üzrə 19 saylı Seçki Məntəqəsində, 50 saylı Abşeron-Qobustan Seçki Dairəsi üzrə 8, 6 və digər saylı məntəqələrdə də səsvermənin seçicilərin yüksək fəallığı şəraitində keçdiyinin şahidi olduq. Məntəqələrdən çıxan seçicilərə ünvanladığımız “Hansı partiyanın namizədinə səs verdiniz” sualına onların böyük əksəriyyəti “Seçkilərə “Yeni hədəflərə doğru” şüarı ilə gələn Yeni Azərbaycan Partiyasının namizədlərinə” cavabını veriblər.

Paylaş:

Baxılıb: 810 dəfə