Səhiyyə Nazirliyinin Analitik Ekspertiza Mərkəzi ilin yekunları ilə bağlı hesabat verib

Bakı:

29 °C

54 %

9 m/s

Əlaqə

AZ RU EN

Ana səhifə / Sosial / Səhiyyə Nazirliyinin Analitik Ekspertiza Mərkəzi ilin yekunları ilə bağlı hesabat verib

Səhiyyə Nazirliyinin Analitik Ekspertiza Mərkəzi ilin yekunları ilə bağlı hesabat verib

21.12.2016 [09:52]

Dekabrın 20-də Səhiyyə Nazirliyinin Analitik Ekspertiza Mərkəzində cari ilin yekunları ilə əlaqədar hesabat xarakterli mətbuat konfransı təşkil olunub.
AZƏRTAC xəbər verir ki, tədbirdə Analitik Ekspertiza Mərkəzinin (AEM) mütəxəssisləri və şöbə müdirləri jurnalistlərin suallarını cavablandırıblar.
Bildirilib ki, “Dərman vasitələri haqqında” Azərbaycan Respublikası Qanununun 11-ci maddəsinə əsasən, ölkəmizdə istehsal olunan və ya ölkəyə idxal olunan dərman vasitələrinin istifadə təlimatları Azərbaycan dilində olmalıdır. Bununla əlaqədar yanvar ayının 1-dən istifadə təlimatı Azərbaycan dilində olmayan dərman vasitələrinin idxalı qadağan edilib.
AEM-in dərman vasitəsinin istifadə təlimatı üzrə eksperti istifadə təlimatının əhəmiyyətindən, onun daşıdığı informasiyadan, habelə istifadə təlimatının istehlakçının dərman vasitəsindən düzgün istifadə etməsi üçün zəruri məlumatları özündə əks etdirən mühüm vasitə olmasından danışıb. Vurğulayıb ki, dərman vasitəsindən düzgün istifadə edilməsi onun müalicəvi effektini təmin edən əsas şərtlərdəndir. Bunun üçün də istifadə təlimatının Azərbaycan dilində olması zəruridir.
Daha sonra AEM-in əczaçılıq subyektləri ilə iş şöbəsinin mütəxəssisləri apteklərdə vəziyyətlə əlaqəli sualları cavablandıraraq vətəndaşların müraciəti əsasında 3 aptekdə baxış zamanı 81 adda, 85 seriyada 205 qutu dərman vasitəsinin satış dövriyyəsindən çıxarıldığını qeyd ediblər. Diqqətə çatdırılıb ki, Səhiyyə Nazirliyi Kollegiyasının 2015-ci il 21 oktyabr tarixli qərarı ilə “Aptek təşkilatlarından dərman vasitələrinin buraxılması Qaydaları” təsdiqlənib. Yeni Qaydalara əsasən, həkimlər xəstələrə resept yazarkən dərman vasitəsinin ticarət adını deyil, beynəlxalq patentləşdirilməmiş adını (təsiredici maddə adını) qeyd edəcəklər. Beləliklə də, vətəndaş aptekə müraciət edən zaman reseptdə göstərilən beynəlxalq patentləşdirilməmiş ada, büdcəsinə uyğun olaraq dərman vasitəsinin qiymətinə və istehsalçısına görə özü seçim edə biləcək.
AEM-in dərman vasitələrinin keyfiyyətinin yoxlanılması laboratoriyasının mütəxəssisləri də mətbuat konfransında jurnalistlərin suallarını cavablandırıblar. Mərkəzin 2012-ci ildə İSO 17025 “Sınaq və kalibrləmə laboratoriyasının səlahiyyətlərinə ümumi tələblər” standartına uyğun akkreditasiya olunduğu, həmçinin laboratoriyanın İSO/İEC 17025:2009 akkreditasiya sertifikatı aldıqdan sonra Qlobal Fondun akkreditasiya olunmuş laboratoriyaları siyahısına daxil edildiyi, 2014-cü ildən etibarən isə Avropa Farmakopeyası Komissiyasının müşahidəçi üzvü qəbul olunduğu diqqətə çatdırılıb.
Həmçinin ölkəyə idxal olunan dərman vasitələri ilə bağlı sənədlərin qəbulu və icazələrin verilməsi, mərkəzin fəaliyyət istiqamətləri üzrə bir sıra prosedurların həyata keçirilməsi, o cümlədən mərkəzə yönəlmiş müraciətlərin qəbulu və vaxtında cavablandırılması, qeydiyyat sənədlərinin qəbulu və təqdim edilməsi, habelə şikayət və sorğuların qəbulu və cavablandırılması “Bir pəncərə xidməti” adı ilə fəaliyyət göstərən yeni xidmət haqqında suallar da cavablandırılıb.
Dərman vasitələrinin qeydiyyatı ilə əlaqəli sualları cavablandıran mütəxəssislər 2016-cı ildə 372 adda dərman vasitəsinin dövlət qeydiyyatına alındığını, 17 adda dərman vasitəsinin isə dövlət qeydiyatından imtina olunduğunu bildiriblər.
Tədbirdə AEM-in əczaçılıq sahəsində müasir inkişaf tendensiyaları ilə ayaqlaşmaq məqsədilə xarici ölkələrlə qurduğu münasibətlərdən də danışılıb. Dünya Səhiyyə Təşkilatının dərman vasitələrinin monitorinqi beynəlxalq proqramına AEM-in də qoşulduğu, hazırda proqramın assosiativ üzvü olduğu nəzərə çatdırılıb. Həmçinin AEM tərəfindən artıq 11 ölkədə istehsal müəssisələrinin GMP tələblərinə uyğunluğunun yoxlanılması faktı diqqətə çatdırılıb. Bu il Analitik Ekspertiza Mərkəzinin Belarus və Qazaxıstanla qarşılıqlı anlaşma və əməkdaşlıq haqqında memorandum imzalaması və belə memorandumun yaxın vaxtlarda Ukrayna və Türkiyə ilə də imzalanması üçün danışıqların aparılması qeyd olunub.
Ümumiyyətlə, mətbuat konfransında “keyfiyyətli” və “saxta” dərman anlayışlarına aydınlıq gətirilib, jurnalistlərə bu anlayışları qarışdırmamaları, eləcə də məlumat verəcəkləri hər hansı məsələ haqqında suallar hazırlayarkən diqqətli olmaları tövsiyə edilib. Jurnalistlərə, həmçinin sensasiya və reytinq naminə müsahibənin içindən hər hansı yarımçıq cümlə və ya natamam fikrin başlıq kimi yazılması irad olaraq bildirilib. Qeyd olunub ki, belə hallar xəstə vətəndaşlara və xəstəsi olan ailələrə pis təsir edir, əhali arasında panika yaradır.
AEM mütəxəssisləri KİV nümayəndələrini əhalinin dərman təhlükəsizliyi sahəsində Səhiyyə Nazirliyinin Analitik Ekspertiza Mərkəzinə dəstək olmağa çağırıblar.

Paylaş:

Baxılıb: 671 dəfə