Biləsuvarlı pambıqçılar qısa vaxtda 3186 ton məhsul toplayıblar

Bakı:

25 °C

57 %

3 m/s

Əlaqə

AZ RU EN

Ana səhifə / Sosial / Biləsuvarlı pambıqçılar qısa vaxtda 3186 ton məhsul toplayıblar

Biləsuvarlı pambıqçılar qısa vaxtda 3186 ton məhsul toplayıblar

05.10.2018 [08:45]

Bir neçə gündür ki, Biləsuvarda kütləvi pambıq yığımına başlanılıb. Ötən il sahələrdən 24 min 470 ton məhsul toplayan fermerlər cari ildə də yüksək məhsuldarlığa nail olmaq üçün bütün qüvvələrini səfərbər ediblər. Yığıma mütəşəkkil başlayan məhsul istehsalçıları az vaxtda 3186 ton pambıq toplayaraq qəbul məntəqələrinə göndəriblər.
Gün ərzində 490-500 ton məhsul toplanılır
AZƏRTAC-ın bölgə müxbiri xəbər verir ki, bu il biləsuvarlı pambıqçılar 12 min hektar sahədə pambıq yetişdiriblər. Toxum səpinindən tutmuş yığım gününə kimi bitkiyə aqrotexniki qaydada qulluq göstərildiyindən sahələrdə bol məhsul yetişib. Məhsulu qısa müddətdə toplamaq üçün 29 ədəd müasir kombayn və yığım üçün lazım olan digər texnikalar məhsul istehsalçılarının ixtiyarına verilib. İşin yaxşı təşkili nəticəsində pambıq sahələrindən gün ərzində 490-500 ton məhsul toplanılır.
Pambığın alış qiymətinin hər ton üçün 50 manat artırılması və əlavə güzəştlər fermerləri daha çox məhsul istehsal etməyə həvəsləndirib
Qabaqcıl pambıqçı Lətif Cəfərov ötən il becərdiyi sahənin hər hektarından 45 sentner məhsul götürüb. “Bu ilə 25 hektarda məhsul yetişdirmişəm. Müqavilə bağladığım şirkət tərəfindən lazımi texnika, toxum, gübrə və kimyəvi preparatla təmin olunmuşam. Aqrotexniki tədbirləri vaxtında həyata keçirdiyim üçün bu il də bol məhsul yetişib. Birinci yığımı qısa müddətdə başa çatdırmışam. Bu günə qədər hər hektardan 45 sentner məhsul götürməklə 75 ton pambıq yığmışam. Hələ məhsul çoxdur. Bundan sonra daha 40 ton pambıq toplayacağıma əminəm. Dövlətimiz tərəfindən pambığın alış qiymətinin hər ton üçün 50 manat artırılması və əlavə güzəştlər bizi daha çox məhsul istehsalına həvəsləndirib. Fermerlərə göstərilən dəstəkdən yararlanaraq növbəti ildə əkin sahəsini daha da artıracağam”, - deyə fermer bildirib.
Biləsuvarlı pambıqçılar ötən il 11 min 351 hektar sahədən 24 min 470 ton məhsul toplayaraq pambıqçılıq rayonları arasında ikinci olublar.
Qeyd edək ki, bu il Azərbaycanda 22 rayonda, ümumilikdə, 132,581 hektarda pambıq əkilib. Ən çox pambıq Saatlı rayonunda əkilib (15,815 hektar). Ölkə üzrə 9 min hektardan çox pambıq əkən 7 rayon var. Saatlı rayonu ilə yanaşı, İmişli (13,645 hektar), Sabirabad (13,055 hektar), Biləsuvar (12,022 hektar), Ağcabədi (9,946 hektar), Bərdə (9,630 hektar) və Beyləqanda (9,560 hektar) 9 min hektardan çox sahədə pambıq əkini aparılıb. Ölkə üzrə pambıq əkinlərinin 2/3 hissəsi bu rayonların payına düşür.

Paylaş:

Baxılıb: 542 dəfə