Vətənpərvər gənclər yetişdirmək ən müqəddəs işdir

Bakı:

25 °C

73 %

1 m/s

Əlaqə

AZ RU EN

Ana səhifə / Sosial / Vətənpərvər gənclər yetişdirmək ən müqəddəs işdir

Vətənpərvər gənclər yetişdirmək ən müqəddəs işdir

08.12.2018 [10:07]

Bu yöndə həyata keçirilən tədbirlərə öz töhfəsini vermək Vətən torpaqları işğal altında olan Azərbaycanın hər bir vətəndaşının borcudur
Vətənpərvərlik hissi hər bir millətin etnik, mədəni, siyasi və tarixi xüsusiyyətləri əsasında formalaşır. Tarixən bu məfhum yeni dövlətlərin yaranması, milli-azadlıq hərəkatlarının vüsət alması zamanı, xüsusilə müharibə ərəfəsində daha aktual olub. Müharibə və sülh dövründə vətənpərvərliyin əsasını vətənə, dövlətə sadiqlik və öz canını bu müqəddəs amal üçün qurban verməyə hazır olmaq duyğuları təşkil edib.
Azərbaycanda da həmişə Vətən, torpaq ana kimi əziz hesab edilib, onun uğrunda canını fəda etmək müqəddəs vəzifə kimi qarşıya qoyulub. Təsadüfi deyil ki, istiqlal şairimiz Əhməd Cavad himnimizdə “Azərbaycan” adlı Vətən üçün hər bir gəncin canından keçməyə hazır olduğunu birmənalı şəkildə qeyd edib.
27 il əvvəl müstəqillik əldə edən Azərbaycanın erməni işğalına məruz qalması da gənc vətən övladlarının səfərbər olmasını labüdləşdirdi. Çünki torpaqlarımızın azad edilməsi və dövlətçiliyimizin qorunmasında əsas məsuliyyət gənclərin üzərinə düşür.
Bu baxımdan, ümumtəhsil müəssisələrinin X-XI sinif şagirdlərinə “Gənclərin çağırışaqədərki hazırlığı” fənninin tədrisi həm hərbi xidmətə hazırlıq, həm də vətənpərvərlik hissinin aşılanması işində böyük əhəmiyyət daşıyır. Gənclərin və uşaqların hərbi düşərgələrə cəlb olunması, onların arasında müxtəlif hərbi oyunların, vaxtaşırı Hərb Tarixi Muzeyinə ekskursiyaların təşkili də təqdirəlayiq addımlardandır.
Prezident İlham Əliyevin 13 fevral 2012-ci il tarixli Fərmanı ilə yaradılan Səfərbərlik və Hərbi Xidmətə Çağırış üzrə Dövlət Xidməti (SHXÇDX) də gənclərin hərbi-vətənpərvərlik ruhunda tərbiyə edilməsi üçün çoxsaylı tədbirlər həyata keçirir. SHXÇDX-nin Azərbaycanın bütün rayonlarında “Vətənin müdafiəsinə hazıram!” devizi altında keçirilən tədbirləri bu işdə böyük rol oynayır.
Xatırladaq ki, SHXÇDX son 7 il ərzində gənclərin hərbi xidmətə çağırış prosesinin düzgün qurulması və mövcud problemlərin həll olunması baxımından xeyli işlər görüb. SHXÇDX rəisi general-leytenant Arzu Rəhimovun mütəmadi olaraq bölgələrdə vətəndaşları qəbul etməsi isə bu prosesə mühüm töhfə verir. SHXÇDX internet saytı üzərindən də müxtəlif xidmətlər göstərir. 2013-cü ildə istifadəyə verilən çağırışçılara hansı hərbi hissədə xidmət keçmələri barədə məlumatların verilməsi layihəsi isə əsas xidmətlərdən biridir.
Beləliklə, gənclərə təhsil aldığı dövrdə vətənpərvərlik hissinin aşılanması, SHXÇDX tərəfindən valideynlərə və çağırışçılara yüksək səviyyədə xidmətin göstərilməsi gənclərin vətənpərvər ruhda yetişmələrində və ruh yüksəkliyi ilə hərbi xidmətə yollanmalarında böyük rol oynayır. Bu müqəddəs fəaliyyətə töhfə vermək isə Vətən torpaqları işğal altında olan Azərbaycanın hər bir vətəndaşının borcudur.
Qaşqay ZİYƏDDİNOĞLU
Yazı Səfərbərlik və Hərbi Xidmətə Çağırış üzrə Dövlət
Xidmətinin yaradılmasının 7-ci ildönümü
münasibətilə elan edilmiş yazı müsabiqəsinə təqdim olunur

Paylaş:

Baxılıb: 723 dəfə