Baş pediatr Erkin Rəhimov: Peyvəndlər vaxtında vurulmazsa, uşaqlar arasında digər yoluxucu xəstəliklər yayıla bilər

Bakı:

19 °C

94 %

3 m/s

AZ RU EN

Ana səhifə / Sosial / Baş pediatr Erkin Rəhimov: Peyvəndlər vaxtında vurulmazsa, uşaqlar arasında digər yoluxucu xəstəliklər yayıla bilər

Baş pediatr Erkin Rəhimov: Peyvəndlər vaxtında vurulmazsa, uşaqlar arasında digər yoluxucu xəstəliklər yayıla bilər

15.07.2021 [09:08]

Ümumdünya Səhiyyə Təşkilatının (ÜST) təlimatlarına əsasən, uşaq sağlamlığına ən çox müsbət təsir göstərən, həmçinin dünyada uşaq ölümlərinin qarşısını alan əsas faktorlar ana südü və vaksinasiyadır. Statistikaya görə, dünyada hər il təxminən 4-5 milyon uşaq məhz vaksinasiya sayəsində sağ qalır. Təəssüflər olsun ki, bunun əksinə olaraq ildə 2 milyona yaxın azyaşlı isə peyvənd vurulmadığı üçün həyatını itirir. Peyvəndin faydaları barədə danışan Səhiyyə Nazirliyinin baş pediatrı Erkin Rəhimov bildirib ki, vaksinasiya uşaqları bir sıra ölümcül xəstəliklərə qarşı, doğrudan da, müdafiə edir. Onun sözlərinə görə, müvafiq peyvəndlər fəsadları ağır olan və qarşısı alına bilən xəstəliklər zamanı istifadə edilir: “Nəticədə, orqanizmdə xəstəliyə qarşı əvvəlcədən immunitet formalaşır, insan ya, ümumiyyətlə, xəstələnmir, ya da xəstəliyi yüngül keçirir. İstənilən xəstəliyə qarşı tətbiq edilən vaksinlər ciddi elmi tədqiqatlara əsaslanır”.
Baş pediatr bildirib ki, yeni növ koronavirus (COVID-19) infeksiyası dönəmində uşaqların Milli Peyvənd Təqviminə əsasən, peyvəndlənməsi zəifləyib: “Vətəndaşlar koronavirusa yoluxmaqdan qorxduqları üçün tibb müəssisələrinə getmirlər. Bu dönəmdə xəstəliyi olan uşaqların peyvənd olunmasına daha az rast gəlinir. Demək olar ki, yalnız sağlam uşaqlar peyvənd olunurlar. Lakin valideynlər bilməlidir ki, əgər peyvəndlər vaxtında vurulmazsa, uşaqlar arasında koronavirusdan daha təhlükəli hesab edilən göyöskürək, qızılca, tetanus və digər xəstəliklərin yayılma ehtimalı arta bilər”.
Erkin Rəhimov peyvəndlərin istehsalı məsələsinə də toxunub: “Vaksinlərin istehsal prosedurları təkmilləşib və zərərlər minimuma endirilib. Bir çox dövlətlərdə peyvəndlənmə məcburidir. Yəni valideynlər övladlarını vaksinasiyadan keçirmədən bağçaya və yaxud da məktəbə göndərə bilməzlər. Valideynlər maariflənməlidirlər. Uşaqları vaxtında peyvənd etdirmək lazımdır ki, sadə xəstəliklərdən dünyasını dəyişməsinlər”.
Baş pediatr əlavə edib ki, peyvənd vurulan yerdə qızartı və səpkinin əmələ gəlməsi normaldır: “Lakin bəzən iynə yerində yaranan irinləmə bir müddət davam edir. Bədən temperaturu isə 38,5 dərəcəyə qədər qalxır. Ümumiyyətlə, vaksin vurulandan sonra uşaqda qıcolma, huşun itməsi və süstlük hiss edirsinizsə, mütləq həkimə müraciət etmək lazımdır. Bunlar çox nadir müşahidə olunan yan təsirlərdir”.
“Canlı peyvəndlər, sadəcə immuniteti zəif olan uşaqlar üçün qadağandır. Misal üçün, xərçəngdən və ya birincili və ikincili immunitet azlığı xəstəliklərindən əziyyət çəkənlər üçün təhlükəlidir. Cansız peyvəndlərin tətbiqi üçün isə əks-göstərişlər, ümumiyyətlə, məhduddur”, - deyə Erkin Rəhimov söyləyib.
MÜŞFİQƏ

Paylaş:

Baxılıb: 830 dəfə