“Wolt Azərbaycan” bağlanır?

Bakı:

23 °C

71 %

12 m/s

Əlaqə

AZ RU EN

Ana səhifə / Sosial / “Wolt Azərbaycan” bağlanır?

“Wolt Azərbaycan” bağlanır?

17.08.2023 [11:32]

Son illər ölkəmizdə qida məhsullarının çatdırılması ilə bağlı xidmətlər genişlənib. Xüsusilə pandemiya dövründə bu xidmətlərdən daha aktiv istifadə olunurdu. Qida məhsullarının istehlakçılara təhlükəsiz çatdırılması vacibdir. İsti və soyuq zəncirin qorunması, məhsulların temperatur rejimi qaydalarının pozulmaması əsas məqamlardan biridir.

Buna baxmayaraq, yemək sifarişinin çatırılması zamanı istehlakçıları narahat edən bəzi nüanslar var. Məsələn, nəqliyyat vasitələrində dezinfeksiya işlərinin aparılmaması, qidaların tələblərə cavab verməyən termo çantalarda olması və dağılması, çatdırılmanı edən şəxslərin tibbi müayinədən keçməməsi və.s.

Ölkəmizdə qida məhsullarının çatdırılması ilə məşğul olan “Wolt Azərbaycan” MMC fəaliyyətini dayandırıb. Bununla bağlı Azərbaycan Qida Təhlükəsizliyi Agentliyindən (AQTA) məlumat verilib. Bildirilib ki, “Wolt”un fəaliyyətinin dayandırılması ilə bağlı məhdudlaşdırıcı qərarın təkrar tətbiqi barədə qərar qəbul edilib.

Belə ki, “Wolt Azərbaycan” MMC-yə məxsus qida məhsullarının çatdırılması müəssisəsində qida təhlükəsizliyi sahəsində bir sıra tələblərin pozulması faktları aşkarlanıb. Müəssisənin “Qida təhlükəsizliyi haqqında” qanununa zidd olaraq qida təhlükəsizliyi qeydiyyatından keçmədən fəaliyyət göstərdiyi müəyyən olunub.

Daha sonra isə qəbul edilmiş qərarın icra vəziyyətinin yoxlanılması ilə əlaqədar “Wolt Azərbaycan” MMC-də plandankənar yoxlama keçirilib. Yoxlama zamanı şirkət tərəfindən nöqsanların aradan qaldırılmadığı, həmçinin fəaliyyətinin dayandırılmasına baxmayaraq, fəaliyyət göstərdiyi müəyyən olunub: “Bununla əlaqədar, qanunvericiliyin tələblərinə uyğun olaraq, həmin müəssisənin fəaliyyətinin dayandırılması ilə bağlı məhdudlaşdırıcı qərarın təkrar tətbiqi barədə qərar qəbul edilib. Eyni zamanda, tələblər yerinə yetirilmədiyinə görə cəmiyyətin məsul şəxsi barəsində müvafiq tədbir görülüb”.

AQTA tədbirlərini genişləndirəcək...

AQTA-nın məlumatına görə, qida zəncirinin bütün mərhələlərində qanunvericiliyin tələblərinə əməl olunmalıdır: “Anomal hava şəraiti bu məsələni daha da aktuallaşdırır. Belə ki, xüsusilə isti yay aylarında qida məhsullarının daşınması, saxlanması ilə bağlı hansısa qanunvericiliyin tələblərinin pozulması insan sağlamlığına ciddi fəsadlar yarada bilər. Agentlik bu istiqamətdə fəaliyyətini davam etdirəcək və nəzarət tədbirlərini daha da genişləndirəcək”.

Fəaliyyətimizi davam etdiririk

“Wolt Azərbaycan” MMC fəaliyyətinin dayandırılması ilə bağlı yayılmış xəbərlərə dair açıqlama verib: “Şirkət fəaliyyətini davam etdirir, onun mobil tətbiqi aktivdir və müştərilər öz sifarişlərini həmişəki qaydada yerləşdirə bilərlər”.

KOBİA-da görüş

Kiçik və Orta Biznesin İnkişafı Agentliyində (KOBİA) son günlər “Wolt Azərbaycan” MMC ilə bağlı yaranmış vəziyyətə dair şirkət rəhbərliyi ilə görüş keçirilib. Görüşdə son bir neçə gün ərzində şirkətlə bağlı yaranmış vəziyyətə dair fikir mübadiləsi aparılıb. Məsələyə dair şirkət rəhbərliyinin fikirləri dinlənilib.

Qeyd edilib ki, KOBİA mandatına uyğun olaraq daima sahibkarların yanındadır və onların qanuni maraqlarının müdafiəsi üçün səlahiyyətləri çərçivəsində biznes subyektlərinə dəstək göstərir. Mövcud vəziyyətlə bağlı KOBİA şirkətin qanuni maraqlarının qorunmasına, yaranmış vəziyyətin həllinə dəstək olmağa hazırdır. Eyni zamanda, istehlakçıların hüquqlarının və sağlamlıqlarının qorunması, qida məhsullarının çatdırılmasında iştirak edən şəxslərin maraqlarının təmin olunması məsələlərinin diqqətdə saxlanılması da şirkət rəhbərliyinə bildirilib.

AQTA-nın İctimaiyyətlə əlaqələr sektorunun müdiri İlkin Kərimov şirkətin fəaliyyətini davam etdirib-etdirmədiyi barədə “Yeni Azərbaycan”a danışıb. Onun sözlərinə görə, artıq AQTA tərəfindən şirkətin fəaliyyəti ilə bağlı lazım olan açıqlama verilib: “Bu baxımdan da əlavə fikir bildirməyə ehtiyac yoxdur”.

Y.BAYRAMOVA

Paylaş:

Baxılıb: 743 dəfə