Bir millətin qüruru: Qarabağda bərpa və zəfər yolu

Bakı:

20 °C

77 %

4 m/s

Əlaqə

AZ RU EN

Ana səhifə / YAP xəbərləri / Bir millətin qüruru: Qarabağda bərpa və zəfər yolu

Bir millətin qüruru: Qarabağda bərpa və zəfər yolu

17.09.2025 [21:43]

İlqar İlyasov,

YAP Laçın rayon təşkilatının sədri

Azərbaycan Respublikasının tarixinə əbədi həkk olunmuş günlərdən biri də 20 sentyabrdır. 2023-cü ilin sentyabr ayında Azərbaycan Ordusunun Qarabağ bölgəsində həyata keçirdiyi lokal antiterror tədbirləri nəticəsində Xankəndi, Xocalı, Xocavənd və Ağdərə şəhərləri tam nəzarətə götürüldü. Bu tarixi hadisə ilə Azərbaycan Respublikasının suverenliyi bütün əraziləri üzərində bərpa olundu. Nəticədə 20 sentyabr – bu şəhərlərin azadlığı günü kimi tarixə düşdü və milli təqvimdə mühüm yerini aldı.

2023-cü il noyabrın 8-də – Zəfər Gününün üçüncü ildönümündə Xankəndi şəhərində hərbi parad keçirildi. Bu hadisə yalnız Vətən müharibəsində əldə edilən qələbənin deyil, eyni zamanda Azərbaycanın suveren hüquqlarının əyani nümayişi idi. Hərbi paradda Müzəffər Ali Baş Komandan İlham Əliyev iştirak edərək xalqımıza tarixi bir mesaj verdi: Azərbaycan Ordusu öz missiyasını ləyaqətlə yerinə yetirib və Qarabağda dövlət suverenliyi tam bərpa olunub.

Azad edilmiş ərazilərdə sosial-iqtisadi həyatın bərpası çərçivəsində ən mühüm layihələrdən biri də Qarabağ Universitetinin yaradılması oldu. Bu ali təhsil müəssisəsi həm regionun elmi və təhsil potensialının inkişaf etdirilməsinə xidmət edəcək, həm də keçmişdə dağıdılmış təhsil infrastrukturunun yenidən qurulmasında mühüm rol oynayacaq. Qarabağ Universiteti, eyni zamanda, bölgənin mədəni-mənəvi dirçəlişinə töhfə verməyi qarşıya məqsəd qoyur.

Prezident İlham Əliyevin işğaldan azad edilmiş ərazilərə səfərləri, xüsusən Xocavənd rayonuna etdiyi mütəmadi səfərlər, Azərbaycanın Qarabağ siyasətinin əsas istiqamətlərindən biri kimi ərazilərin bərpası və dirçəldilməsi prosesinə yüksək səviyyədə diqqət göstərildiyini nümayiş etdirir.

2021-ci ilin yanvarından başlayaraq Xocavənd rayonunun Böyük Tağlar, Edilli, Düdükçü və Tuğ kəndləri ilə tanışlıq, Hadrutda Dövlət Bayrağının ucaldılması və yeni yolların təməlinin qoyulması kimi mühüm tədbirlər həyata keçirildi. Bu səfərlər zamanı qədim Alban məbədlərinə, Azıx mağarasına və dağıdılmış məktəblərə baxış keçirildi.

2021-ci ilin oktyabrında Hadrut-Cəbrayıl-Şükürbəyli, Tuğ-Hadrut və Füzuli-Hadrut yollarında tikinti işlərinə başlanıldı. Hadrutda yeni məscidin və "Hadrut" qovşaq yarımstansiyasının təməlləri qoyuldu. 2023-cü ildə isə Hadrutda 360 şagirdlik məktəb binasının bərpa layihəsi təqdim olundu və turizm inkişaf konsepsiyası elan edildi.

2023-cü ilin mayında Tuğ kəndində ilk yaşayış məhəlləsinin və inzibati mərkəzin təməlləri qoyuldu. Eyni zamanda Şükürbəyli-Cəbrayıl-Hadrut avtomobil yolunun 8,2 kilometrlik hissəsi istifadəyə verildi. 2025-ci ilin sentyabrında isə Hadrutda məscidin açılışı baş tutdu, Qırmızı Bazar və Sos kəndlərinin sakinləri ilə görüşlər keçirildi.

Xocavənd şəhərində 15 oktyabr 2023-cü il tarixində Azərbaycan Respublikasının Dövlət Bayrağı ucaldıldı. Bu hadisə, işğaldan azad olunmuş ərazilərdə dövlət rəmzlərinin bərpasının, milli qürur və kimliyin yenidən təsdiqinin göstəricisi idi.

20 sentyabr – Xankəndi, Xocalı, Xocavənd və Ağdərə şəhərlərinin azadlığı günü yalnız siyasi və hərbi baxımdan deyil, milli yaddaş və kimlik baxımından da mühüm əhəmiyyətə malikdir. Azərbaycan dövləti işğaldan azad olunmuş ərazilərdə mütəşəkkil şəkildə bərpa və inkişaf işləri aparmaqla, bu torpaqlarda yeni həyatın əsasını qoyur. Prezident İlham Əliyevin rəhbərliyi ilə aparılan bu siyasət Azərbaycan tarixində "Qayıdış dövrü" kimi yadda qalacaq.

Paylaş:

Baxılıb: 746 dəfə

Xəbər lenti

Hamısına bax