Antiterror əməliyyatı – separatizmə son qoyan tarixi Qələbə

Bakı:

23 °C

64 %

7 m/s

Əlaqə

AZ RU EN

Ana səhifə / YAP xəbərləri / Antiterror əməliyyatı – separatizmə son qoyan tarixi Qələbə

Antiterror əməliyyatı – separatizmə son qoyan tarixi Qələbə

22.09.2025 [19:22]

Meydanəli Yolçiyev

YAP Daşkəsən rayon təşkilatının sədri

2023-cü ilin 19-20 sentyabr tarixlərində baş vermiş lokal xarakterli antiterror əməliyyatı müasir tariximizin ən əhəmiyyətli dönəmlərindən biri kimi yaddaşlara həkk olundu. Bu əməliyyat nəticəsində Azərbaycan Respublikasının suverenliyi tam təmin edildi, separatizmə son qoyuldu və üçrəngli bayrağımız Xankəndi, Xocalı, Xocavənd, Ağdərə və digər strateji şəhərlərdə əzəmətlə ucaldıldı. Bu hadisə xalqımızın həmrəyliyinin, dövlətimizə bağlılığının və ordumuzun misilsiz qəhrəmanlığının rəmzinə çevrildi.

10 noyabr 2020-ci il tarixli üçtərəfli Bəyanatdan sonra Azərbaycanın Qarabağ bölgəsində 10 mindən artıq Ermənistan silahlı qüvvəsi və qeyri-qanuni silahlı dəstələr qaldı. Halbuki sənədin müddəalarına əsasən, bu qüvvələr ərazini dərhal tərk etməli idilər. Azərbaycan dövləti və xalqı üç il ərzində sülhə və Qarabağın reinteqrasiyasına ümid edərək qarşı tərəfə dəfələrlə çağırışlar etdi. Lakin erməni separatçıları əksinə, mövqelərini gücləndirdi, silahlı qüvvələrini artırdı.

Bütün xəbərdarlıqlara baxmayaraq, Ermənistan rəhbərliyi və xaricdəki havadarları bu qanunsuzluğu davam etdirdi. Qarabağda minaların basdırılması, sərhəddə toqquşmalar, Şuşa-Laçın yolunda ekoloji fəlakətə yol açan qanunsuz fəaliyyətlər Azərbaycanın səbrini sınadı. Vəziyyətin belə davam etməsi bölgədə sülhün və təhlükəsiz birgəyaşayışın mümkün olmayacağını göstərdi.

2023-cü il sentyabrın 19-da erməni silahlı dəstələrinin törətdiyi genişmiqyaslı təxribatlar artıq dözülməz həddə çatdı. Əhmədbəyli–Füzuli–Şuşa yolunda əvvəlcədən quraşdırılmış minaların partlaması nəticəsində mülki şəxslər və hərbçilər şəhid oldu, ordumuzun bölmələri intensiv atəşə tutuldu. Dövlət Konstitusiya quruluşunun bərpası və mülki əhalinin təhlükəsizliyinin təmin edilməsi məqsədilə lokal xarakterli antiterror əməliyyatı başlandı.

Cəmi 23 saat 43 dəqiqə davam edən əməliyyat nəticəsində Azərbaycan Ordusu yüksək peşəkarlıq və qəhrəmanlıq nümayiş etdirərək düşmənin mövqelərini sıradan çıxardı. 406 kvadratkilometrlik strateji ərazi tam nəzarətə götürüldü, yüzlərlə hərbi texnika və minlərlə silah ələ keçirildi. Ən önəmlisi, separatçı rejim təslim oldu və erməni silahlı dəstələri tərksilah edilərək Azərbaycan ərazilərini tərk etdi.

Eyni zamanda Azərbaycan humanizm prinsiplərinə sadiqliyini nümayiş etdirdi. Əməliyyat başlamazdan əvvəl və onun gedişində Qarabağda yaşayan erməni mülki əhaliyə xəbərdarlıqlar edildi, onların təhlükəsizliyi təmin olundu. Qadınlara, uşaqlara, qocalara, xəstələrə və digər həssas qruplara lazımi tibbi və sosial yardım göstərildi. Bu, Azərbaycanın həm hərbi, həm də humanist yanaşmasının nümunəsi oldu.

Əməliyyat nəticəsində separatçı rejim tamamilə ləğv edildi. Sentyabrın 28-də qondarma qurumun rəhbəri Samvel Şahramanyan öz imzası ilə rejimin fəaliyyətini dayandırdığını bəyan etdi. Bu, Azərbaycanın suverenliyinə qarşı yönəlmiş separatizmin rəsmi sonu oldu. Xankəndi, Xocalı, Xocavənd və Ağdərə şəhərlərində Azərbaycan Bayrağının ucalması, ölkəmizin ərazi bütövlüyünün tam bərpası və xalqımızın qətiyyətli iradəsinin təntənəsi kimi tarixə yazıldı.

Azərbaycan Prezidenti, Silahlı Qüvvələrin Ali Baş Komandanı İlham Əliyev 2023-cü il oktyabrın 15-də həmin şəhərlərdə Azərbaycan Bayrağını ucaldaraq bu tarixi Zəfərin rəmzini xalqımıza nümayiş etdirdi. Bu hadisə həm də dövlətimizin gücünü, ordumuzun qəhrəmanlığını və xalqımızın iradəsini bütün dünyaya nümayiş etdirdi.

Tarixi Qələbənin əhəmiyyəti nəzərə alınaraq, Prezidentin 18 sentyabr 2024-cü il tarixli Sərəncamı ilə 20 sentyabr – Dövlət Suverenliyi Günü təsis edildi. Həmin gün xalqımızın həmrəyliyinin, əzm və qəhrəmanlığının, dövlət suverenliyinin qorunub saxlanmasının təcəssümünə çevrildi. Hər il qeyd olunan bu tarixi gün gələcək nəsillərə vətənpərvərlik ruhunu aşılayır, dövlətimizin gücünü, xalqımızın birliyini və müstəqilliyinin əbədiliyini əks etdirir.

Paylaş:

Baxılıb: 552 dəfə