İlham Əliyev: 22 ilin uğur salnaməsi – Sədaqət, xidmət və xalq sevgisi

Bakı:

24 °C

88 %

3 m/s

Əlaqə

AZ RU EN

Ana səhifə / YAP xəbərləri / İlham Əliyev: 22 ilin uğur salnaməsi – Sədaqət, xidmət və xalq sevgisi

İlham Əliyev: 22 ilin uğur salnaməsi – Sədaqət, xidmət və xalq sevgisi

15.10.2025 [14:56]

İlqar İlyasov

YAP Laçın rayon təşkilatının sədri

Azərbaycan Respublikasının Prezidenti İlham Əliyevin ölkəyə rəhbərlik etməsinin 22 ili tamam olur. Bu illər ərzində Azərbaycan tarixinin yeni və şərəfli səhifələri yazılıb. İlham Əliyev xalqına sədaqətlə xidmət edən, dövlətçiliyin möhkəmlənməsinə və Azərbaycanın beynəlxalq aləmdə nüfuz qazanmasına böyük töhfələr verən lider kimi yadda qalıb. Onun prezidentliyi dövründə Azərbaycan müstəqilliyini möhkəmləndirib, iqtisadiyyatını gücləndirib, ərazi bütövlüyünü bərpa edərək tarixdə görünməmiş uğurlara imza atıb. 2003-cü ildə ümummilli lider Heydər Əliyevin siyasi kursunu davam etdirmək üçün Azərbaycan xalqının etimadı ilə prezident seçilən İlham Əliyev o gündən bu günə qədər daim xalqa arxalanıb, xalqın rifahı naminə çalışıb. Prezidentin “Mən hər bir azərbaycanlının prezidenti olacağam” ifadəsi sadəcə bir şüar deyil, 22 ilin bütün mərhələlərində öz təsdiqini tapmış prinsipial mövqedir. O, vətəndaşların maraqlarını hər zaman üstün tutub, sosial sahədə geniş islahatlar həyata keçirib, əhalinin həyat səviyyəsini yüksəltmək üçün davamlı addımlar atıb. İlham Əliyevin prezidentliyi dövründə Azərbaycan iqtisadiyyatında əhəmiyyətli irəliləyişlər baş verib. Neft strategiyası ilə ölkə böyük gəlirlər əldə edib, bu gəlirlər isə xalqın rifahına yönəldilib. İnfrastruktur layihələri, regionların inkişafı, kənd təsərrüfatının dirçəldilməsi, nəqliyyat və enerji layihələri Azərbaycanın həm regional liderə, həm də beynəlxalq enerji xəritəsində mühüm ölkəyə çevrilməsinə səbəb olub. Bu uğurlar təkcə iqtisadi sferada deyil, həm də siyasi və diplomatik sahələrdə özünü göstərib. Azərbaycan beynəlxalq müstəvidə etibarlı tərəfdaş, söz sahibi dövlətə çevrilib. Ən böyük uğurlardan biri isə 2020-ci ildə Azərbaycanın öz ərazi bütövlüyünü bərpa etməsi oldu. 44 günlük Vətən müharibəsində Ali Baş Komandan İlham Əliyevin rəhbərliyi ilə Azərbaycan Ordusu zəfər qazandı. Bu qələbə təkcə hərbi-siyasi deyil, həm də mənəvi zəfər idi. Onilliklərlə davam edən işğala son qoyuldu, Azərbaycanın ərazi bütövlüyü bərpa olundu. Xalq bu qələbəni İlham Əliyevin qətiyyəti, liderliyi və uzaqgörənliyi sayəsində əldə etdi. İlham Əliyev təkcə daxili siyasətdə deyil, həm də beynəlxalq aləmdə balanslı və prinsipial siyasət yürüdərək ölkənin maraqlarını qoruyub. Onun rəhbərliyi ilə Azərbaycan Qoşulmama Hərəkatına sədrlik etmiş, BMT, ATƏT, İƏT kimi beynəlxalq təşkilatlarda fəal mövqe sərgiləmişdir. Bu gün Azərbaycan dünyada söz sahibidir və bu uğurda İlham Əliyevin əvəzsiz rolu var. 22 il ərzində İlham Əliyev xalqı ilə bir olub, onun arxasında güclü xalq dəstəyi dayanıb. Xalqla Prezident arasında olan bu qarşılıqlı etimad, sevgi və inam Azərbaycana dayanıqlıq, sabitlik və inkişaf gətirib. Bu gün Azərbaycan sabaha inamla baxırsa, bu, ilk növbədə İlham Əliyevin düşünülmüş və ardıcıl siyasətinin nəticəsidir. İlham Əliyevin 22 illik prezidentliyi Azərbaycanın müasir tarixində əhəmiyyətli bir dövr kimi qalacaq. Bu illər sədaqətin, xidmətin və xalq sevgisinin real təcəssümüdür. İlham Əliyev lider kimi sübut etdi ki, xalqına bağlı, vətənə sadiq və uzaqgörən siyasətçi olmaqla həm ölkənin bu gününü, həm də sabahını qurmaq mümkündür.

Paylaş:

Baxılıb: 627 dəfə