Ucalan Bayrağımız – Qürurumuz, Kimliyimiz, Əbədiyyət Simvolumuz

Bakı:

19 °C

72 %

7 m/s

Əlaqə

AZ RU EN

Ana səhifə / YAP xəbərləri / Ucalan Bayrağımız – Qürurumuz, Kimliyimiz, Əbədiyyət Simvolumuz

Ucalan Bayrağımız – Qürurumuz, Kimliyimiz, Əbədiyyət Simvolumuz

09.11.2025 [17:52]

Hər xalqın yaddaşında onu bir millət kimi birləşdirən, varlığını və mənəviyyatını əks etdirən müqəddəs rəmzlər var. Azərbaycan üçün bu rəmzlərin ən ucası, ən doğması, ən müqəddəsi — üçrəngli, ay-ulduzlu Dövlət Bayrağımızdır. 9 Noyabr – Dövlət Bayrağı Günü xalqımızın azadlıq salnaməsində, dövlətçilik tarixində xüsusi yer tutur. Bu gün biz təkcə bir simvolu deyil, Azərbaycan xalqının əzmini, müstəqilliyini və milli birliyini qeyd edirik. Bayrağımızın hər rəngi dərin mənalar daşıyır. Göy rəng — türk köklərimizi, əcdadımızın azadlıq ruhunu; qırmızı — inkişaf və müasirləşmə yolunu; yaşıl — mənəviyyatımızı, islami dəyərlərə sadiqliyimizi təcəssüm etdirir. Ay və səkkizguşəli ulduz isə xalqımızın imanını, ümidini və milli birliyini əks etdirən əbədi işıqdır.
Bu bayraq ilk dəfə 1918-ci ildə Azərbaycan Xalq Cümhuriyyəti tərəfindən qaldırıldıqda, o, bütün türk dünyasında azadlıq və istiqlalın rəmzinə çevrildi. Lakin tarix bizdən bu ucalığı bir müddət aldı. Və ancaq Ümummilli Lider Heydər Əliyevin uzaqgörən siyasəti, dövlətçilik iradəsi nəticəsində, 1990-cı illərdə bu bayraq yenidən Azərbaycan səmasında dalğalanmağa başladı. Bu gün isə Cənab Prezident İlham Əliyevin rəhbərliyi ilə üçrəngli bayrağımız Vətənimizin hər guşəsində, azad edilmiş torpaqlarımızda – Şuşada, Xankəndidə, Laçında, Füzulidə, Zəngilanda, Kəlbəcərdə qürurla dalğalanır.
44 günlük Vətən müharibəsində əldə etdiyimiz tarixi Qələbə, şəhidlərimizin qanı, ordumuzun igidliyi və xalqımızın birliyi ilə yazıldı. O günlərdə Cənab Prezidentin “Bizim bayrağımız Şuşada dalğalanacaq!” sözləri milyonların ürəyinə inam, qürur və zəfər ruhu bəxş etdi. Və bu sözlər tarixin gerçəkliyinə çevrildi — bayrağımız azad Qarabağ səmasında əbədi ucaldı. Bu gün üçrəngli bayrağımız təkcə bir dövlət atributu deyil — xalqımızın azadlıq rəmzi, dövlətçiliyimizin nişanı, milli qürurumuzun təcəssümüdür. O, hər bir vətəndaşın qəlbində, hər bir azərbaycanlının düşüncəsində bir inam kimi yaşayır. Biz bu bayrağı sevməklə öz azadlığımıza, müstəqilliyimizə, Vətənə olan sevgimizə səcdə edirik.
Ucal, ey üçrəngli bayrağım! Ucal ki, sənin kölgəndə böyüyən gənclər vətənə sədaqət, azadlığa inam və qürurla yaşasınlar! Sənin dalğalanmağınla Azərbaycanın gələcəyi daha parlaq, xalqımızın birliyi daha möhkəm olacaq!

Bayraq Günümüz mübarək olsun! Yaşasın müstəqil Azərbaycan! Uca olsun üçrəngli bayrağımız!

Səfa Ağayev
YAP İmişli rayon təşkilatının sədri

Paylaş:

Baxılıb: 393 dəfə