Azərbaycan-Türkmənistan münasibətlərində yeni inkişaf mərhələsi

Bakı:

28 °C

57 %

3 m/s

Əlaqə

AZ RU EN

Ana səhifə / YAP xəbərləri / Azərbaycan-Türkmənistan münasibətlərində yeni inkişaf mərhələsi

Azərbaycan-Türkmənistan münasibətlərində yeni inkişaf mərhələsi

24.06.2026 [15:01]

Azərbaycan Respublikasının beynəlxalq münasibətlər sistemində qonşu dövlətlərlə ikitərəfli əlaqələrin müqavilə-hüquq bazasının gücləndirilməsi xarici siyasətin əsas prioritetlərindən biridir. Türkmənistan Prezidenti Sərdar Bərdiməhəmmədovun 22 iyun 2026-cı il tarixində Azərbaycana reallaşan rəsmi səfəri, iki ölkə arasında mövcud olan ikitərəfli münasibətlərin hüquqi təməllərinin daha da möhkəmləndirilməsi baxımından yeni bir mərhələnin başlanğıcı oldu. Bu tarixi səfər çərçivəsində reallaşan geniş tərkibli görüşlər və imzalanan mühüm sənədlər paketi, ölkəmizdə yürüdülən uzaqgörən və hədəfəyönümlü diplomatiyanın növbəti parlaq qələbəsidir.

Səfər zamanı iki ölkə arasında imzalanmış sənədlər sadəcə rəsmi xarakter daşımır, onlar iqtisadiyyat, ticarət, energetika, nəqliyyat, loqistika və humanitar sahələrdə konkret birgə layihələrin icrasını nəzərdə tutan genişmiqyaslı fəaliyyət proqramıdır. Respublika rəhbərliyinin xarici investorlar və regional tərəfdaşlar üçün yaratdığı əlverişli şərait, Azərbaycanın tranzit potensialını maksimum dərəcədə cəlbedici edib. İmzalanan yeni sazişlər Xəzər dənizi vasitəsilə yükdaşımaların həcminin artırılmasına, gömrük və sərhəd-keçid prosedurlarının sadələşdirilməsinə birbaşa təkan verəcəkdir. Dövlətimizin başçısının prinsipial mövqeyi və strateji yanaşması nəticəsində reallaşan bu hüquqi addımlar, hər iki ölkənin biznes subyektləri üçün yeni bazarlar və geniş imkanlar vəd edir.

Azərbaycan və Türkmənistan arasında ikitərəfli münasibətlərin cari vəziyyəti iki dövlət başçısının siyasi iradəsinin yüksək səviyyədə olmasının göstəricisidir. Prezident İlham Əliyevin qeyd etdiyi kimi, ticarət dövriyyəsinin strukturunun şaxələndirilməsi və sənaye kooperasiyasının gücləndirilməsi üçün böyük potensial mövcuddur. İmzalanan sənədlər məhz bu potensialı reallığa çevirmək məqsədi daşıyır. Energetika sektorunda qarşılıqlı faydalı əməkdaşlıq, o cümlədən karbohidrogen resurslarının daşınması sahəsində koordinasiyalı fəaliyyət həm Bakının, həm də Aşqabadın qlobal enerji təhlükəsizliyindəki rolunu və çəkisini əhəmiyyətli dərəcədə artırır. Bu regional layihələrin arxasında dayanan əsas hərəkətverici qüvvə isə Azərbaycan Liderinin beynəlxalq miqyaslı keyfiyyətləri və sülhsevər siyasətidir.

Türkmənistan Prezidentinin Azərbaycana rəsmi səfəri və səfər çərçivəsində əldə olunmuş razılaşmalar iki ölkə münasibətlərinin gələcək inkişaf vektorunu müəyyən edir. Prezident İlham Əliyevin mükəmməl strateji idarəçiliyi sayəsində Azərbaycan, Mərkəzi Asiya dövlətləri ilə Avropa arasında sarsılmaz və etibarlı bir körpü rolunu tam olaraq üzərinə götürüb. Bu status həm ölkəmizin daxili iqtisadi qüdrətini artırır, həm də dövlətimizin başçısının rəhbərliyi ilə qazanılan diplomatik uğurların miqyasını genişləndirir. İmzalanmış müqavilələr və formalaşan yeni əməkdaşlıq platformaları, Azərbaycan-Türkmənistan qardaşlığının və strateji tərəfdaşlığının gələcək nəsillərə daha güclü bir miras kimi ötürülməsini təmin edəcəkdir.

Samirə Zeynalova

YAP Tərtər Rayon Təşkilatının mühasibi

Paylaş:

Baxılıb: 265 dəfə