“Qış məktəbi”: Biliklərin mübadiləsinə yardımçı layihə

Bakı:

10 °C

81 %

2 m/s

Əlaqə

AZ RU EN

Ana səhifə / YAP xəbərləri / “Qış məktəbi”: Biliklərin mübadiləsinə yardımçı layihə

“Qış məktəbi”: Biliklərin mübadiləsinə yardımçı layihə

12.02.2014 [09:21]

YAP Gənclər Birliyinin “Qış məktəbi”nin ikinci günündə müxtəlif mövzularda müzakirələr keçirilib
Dünən Yeni Azərbaycan Partiyası (YAP) Gənclər Birliyinin təşkil etdiyi “Qış məktəbi”ndə dövlətin gənclər siyasəti barədə geniş fikir mübadiləsi, mühazirələr davam etdirilib. Qrup rəhbərləri olan YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, YAP Siyasi Şurasının üzvləri, YAP Gənclər Birliyinin sədr müavinləri Samirə Quliyeva və Ramin Məmmədov, YAP Mərkəzi Aparatında təlimatçı Emil Abasov Ulu öndər Heydər Əliyevin hakimiyyətinin hər iki dövründə, eyni zamanda, Onun layiqli davamçısı Prezident İlham Əliyevin ölkəyə rəhbərlik etdiyi son on ildə gənclərə diqqət və qayğıdan, bu istiqamətdə təsdiqlənən Dövlət proqramlarından ətraflı bəhs ediblər. Bildirilib ki, gənclərə göstərilən bu etimad, diqqət və qayğı onların daha səylə çalışmalarına, müstəqil Azərbaycanın dünəni, bu günü və gələcəyi naminə sıx birləşməyə stimul verir.
Çıxışlarda vurğulanıb ki, bu gün nəinki ölkənin, regionun aparıcı siyasi təşkilatına çevrilən Yeni Azərbaycan Partiyasının sıralarında gənclərin böyük çoxluq təşkil etməsi də bu diqqət və qayğıdan irəli gəlir. Ulu öndər Heydər Əliyev Yeni Azərbaycan Partiyasının sıralarında gənclərin çoxluq təşkil etməsinin vacibliyini bildirməklə, bu istiqamətdə tövsiyələrini irəli sürüb. O da qeyd olunub ki, dövlət başçısı İlham Əliyev gənclərin böyük qüvvə olduğunu, Azərbaycanın gələcəyinin onlara məxsusluğunu vurğulayaraq, yüksək ixtisaslı gənclərin yetişdirilməsini qarşıya mühüm vəzifə kimi qoyur. Ölkə Prezidentinin Fərmanı əsasında Azərbaycan Respublikasının Gənclər və İdman Nazirliyi yanında Gənclər Fondunun yaradılması, eyni zamanda, Prezident Mükafatının təsis edilməsi də əhəmiyyətli addımlardandır. Məqsəd gənclərin hərtərəfli inkişafını, cəmiyyətin həyatında fəal iştirakını təmin etməkdir. Yeni Azərbaycan Partiyasının gənclərin ictimai-siyasi fəallığının artırılmasına, asudə vaxtlarının səmərəli təşkilinə, onlar arasında sıx əlaqələrin qurulmasına xidmət edən layihələri davamlılığı ilə diqqət çəkir.
Qeyd edək ki, “Qış məktəbi”nin ikinci günündə “Demokratik dövlətin əsas anlayışları” mövzusunda təlim keçirilib. Təlimdə demokratik cəmiyyətin əsas atributları olan söz, mətbuat azadlığından, insan hüquqlarının qorunmasından, demokratik seçkilərin keçirilməsindən, çoxpartiyalı sistemin yaradılmasından geniş bəhs olunub. YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə bildirib ki, ilk gündən demokratik dövlət quruculuğu yolunu tutan Azərbaycan bu istiqamətdə inamla irəliləyir. V.Rəhimzadə cəmiyyətin güzgüsü olan mətbuatın keçdiyi inkişaf yoluna da diqqəti yönəldərək bildirib ki, Ulu öndər Heydər Əliyevin atdığı bütün addımlarda KİV-lərin maddi-texniki bazasının möhkəmləndirilməsini, onlara dövlət qayğısının artırılmasını, söz, məlumat azadlığının qorunmasını, siyasi plüralizm prinsiplərinə dönmədən əməl edilməsini təmin edən tədbirlər proqramının həyata keçirilməsi xüsusi diqqət çəkirdi. Mətbuata dövlət nəzarəti olan senzuranın ləğvi, “Kütləvi informasiya vasitələri haqqında”, “Məlumat azadlığı haqqında” qanunların qəbulu, Mətbuat və İnformasiya Nazirliyinin ləğvi və s. kimi addımlar bu sahəyə diqqət və qayğıdan qaynaqlanırdı. “2003-cü ildən Ümummilli lider Heydər Əliyevin siyasi kursunu uğurla davam etdirən dövlət başçısı İlham Əliyevin azad mətbuatın inkişafına xidmət edən addımları da davamlılığı ilə diqqət çəkir. Məhz bu diqqət və qayğının nəticəsidir ki, möhtərəm Prezidentimiz İlham Əliyev 2010 və 2013-cü illərdə “RUH” Azərbaycan Jurnalistləri Müdafiə Komitəsinin keçirdiyi sorğuya əsasən “Jurnalistlərin dostu” mükafatına layiq görülüb” - deyə, baş redaktor vurğulayıb.
YAP Siyasi Şurasının üzvləri, partiyanın Gənclər Birliyinin sədr müavinləri Samirə Quliyeva və Ramin Məmmədov demokratik cəmiyyətin varlığını təsdiqləyən əsas amillərdən biri kimi ölkədə insan hüquq və azadlıqlarının yüksək səviyyədə qorunmasından bəhs ediblər. Bildiriblər ki, milli Konstitusiyamızda əksini tapan maddələrin üçdə iki hissəsi insan hüquq və azadlıqlarının qorunmasına xidmət edir. Konstitusiyamıza əlavə və dəyişikliklərin edilməsi məqsədilə iki dəfə referendumun keçirilməsi də bu sahəyə diqqətdən irəli gəlir.
YAP Mərkəzi Aparatında təlimatçı Emil Abasov ölkədə çoxpartiyalı sistemin yaradılmasından bəhs edərək bildirib ki, siyasi partiyaların normal fəaliyyəti üçün qanunvericilik bazası mövcuddur. “Siyasi partiyalar haqqında” qanunda əksini tapan müddəalar onların normal fəaliyyətinə tam zəmin yaradır.
Günün ikinci yarısında isə “Qış məktəbi” çərçivəsində müxtəlif növ idman yarışları təşkil olunub.
Sonra “Sosial şəbəkələrdə iş” mövzusunda təlim keçirilib. Qeyd edilib ki, müasir dövr informasiya-kommunikasiya texnologiyaları əsridir. Hər bir ölkənin inkişafında, tərəqqisində İKT-nin rolu böyükdür. Daim yeniliyə, müasirliyə can atan gənclər bu imkanlardan istifadə edərək ölkənin gələcəyinə dəstək olmalıdırlar.
Diskussiya şəklində davam edən təlimlərdə və debatlarda 3 qrup üzrə iştirak edən gənclər əldə etdikləri biliklərdən, məlumatlardan məmnunluqlarını ifadə edib, bir daha bu gerçəkliyi təsdiqləyiblər ki, “Qış məktəbi” biliklərin mübadiləsinə yardımçı olan layihələrdəndir.
Ceyhun PİRİYEV,
“İki sahil”, Oğuz

Paylaş:

Baxılıb: 1111 dəfə