Azərbaycan və Mərkəzi Asiya arasında strateji tərəfdaşlıq yeni mərhələdə

Bakı:

20 °C

88 %

0 m/s

Əlaqə

AZ RU EN

Ana səhifə / YAP xəbərləri / Azərbaycan və Mərkəzi Asiya arasında strateji tərəfdaşlıq yeni mərhələdə

Azərbaycan və Mərkəzi Asiya arasında strateji tərəfdaşlıq yeni mərhələdə

13.10.2026 [11:29]

Prezident İlham Əliyevin oktyabrın 8-də Türkmənistanın Türkmənbaşı şəhərində Azərbaycan Respublikası və Mərkəzi Asiya dövlət başçılarının 8-ci Məşvərət görüşündə çıxışı ölkəmizin region dövlətləri ilə əlaqələrinin inkişafına verdiyi önəmi bir daha nümayiş etdirir. Azərbaycan ilə Mərkəzi Asiya ölkələri arasında münasibətlər tarixi və mədəni bağlılıq, qarşılıqlı etimad, dostluq və ortaq strateji maraqlar əsasında inkişaf edir. Bu əməkdaşlıq siyasi dialoqun möhkəmləndirilməsi ilə yanaşı, iqtisadi, nəqliyyat, logistika və investisiya sahələrində də mühüm imkanlar yaradır.

Dövlətimizin başçısının diqqət çəkdiyi əsas məqamlardan biri Azərbaycanın Mərkəzi Asiya Dövlət Başçılarının Məşvərət formatında tamhüquqlu iştirakı ilə bağlıdır. Ötən ilin noyabrında Azərbaycanın bu formata tamhüquqlu üzv qəbul edilməsi ölkəmizin regionda artan nüfuzunun və Mərkəzi Asiya dövlətləri ilə münasibətlərinin yüksək səviyyəsinin göstəricisidir. Bu mühüm hadisə Xəzər dənizinin hər iki sahilində yerləşən ölkələr arasında əlaqələrin daha da dərinləşməsinə və regional əməkdaşlığın genişlənməsinə yeni imkanlar açıb.

Azərbaycanın Mərkəzi Asiya ölkələri ilə əməkdaşlığında nəqliyyat və logistika sahəsi xüsusi əhəmiyyət daşıyır. Orta Dəhlizin inkişafı, Şərq-Qərb nəqliyyat əlaqələrinin genişləndirilməsi və tranzit imkanlarından səmərəli istifadə regionun beynəlxalq ticarətdə mövqeyinin güclənməsinə xidmət edir. Azərbaycanın əlverişli coğrafi mövqeyi, müasir nəqliyyat infrastrukturu və enerji sahəsində təcrübəsi bu əməkdaşlığın inkişafına mühüm töhfə verir. Eyni zamanda, Mərkəzi Asiya dövlətlərinin iqtisadi potensialı və zəngin təbii ehtiyatları qarşılıqlı faydalı tərəfdaşlığın genişləndirilməsi üçün əlverişli şərait yaradır.

İqtisadi əlaqələrin möhkəmləndirilməsində birgə investisiya fondlarının yaradılması da mühüm yer tutur. Azərbaycan Qazaxıstan, Özbəkistan və Qırğızıstanla birgə investisiya fondları yaradaraq qarşılıqlı sərmayə qoyuluşunun təşviqi və perspektivli layihələrin həyata keçirilməsi istiqamətində əhəmiyyətli addımlar atıb. Bu fondlar iqtisadi əməkdaşlığın dərinləşdirilməsinə, yeni layihələrin maliyyələşdirilməsinə və ölkələr arasında uzunmüddətli tərəfdaşlığın gücləndirilməsinə xidmət edir. Belə təşəbbüslər Azərbaycanın regional iqtisadi inteqrasiyanın inkişafında fəal iştirakını təsdiqləyir.

Türkmənbaşı şəhərində keçirilən 8-ci Məşvərət görüşü regional əməkdaşlığın prioritetlərinin müzakirəsi və gələcək fəaliyyət istiqamətlərinin müəyyənləşdirilməsi baxımından mühüm əhəmiyyət daşıyır. Görüş çərçivəsində imzalanan sənədlər Azərbaycan və Mərkəzi Asiya dövlətləri arasında əlaqələrin möhkəmləndirilməsi, qarşılıqlı razılaşmaların həyata keçirilməsi və əməkdaşlığın yeni sahələr üzrə genişləndirilməsi baxımından əhəmiyyətlidir. Bu sənədlər tərəflərin ortaq maraqlara əsaslanan münasibətləri inkişaf etdirmək və regionun mövcud potensialından daha səmərəli istifadə etmək niyyətini əks etdirir.

Prezident İlham Əliyevin görüşdə iştirakı və çıxışı Azərbaycanın Mərkəzi Asiya ilə münasibətlərinin strateji əhəmiyyətini bir daha təsdiqləyir. Ölkəmiz regional sabitliyin möhkəmləndirilməsinə, iqtisadi əlaqələrin genişləndirilməsinə və qarşılıqlı faydalı tərəfdaşlığın inkişafına mühüm töhfə verir. Azərbaycanın bu formatda tamhüquqlu iştirakı gələcəkdə birgə layihələrin sayının artmasına, investisiya imkanlarının genişlənməsinə və nəqliyyat-logistika əlaqələrinin daha da güclənməsinə əlverişli zəmin yaradır.

Beləliklə, Türkmənbaşıda keçirilən 8-ci Məşvərət görüşü Azərbaycan ilə Mərkəzi Asiya dövlətləri arasında dostluq və strateji tərəfdaşlığın inkişafında mühüm mərhələdir. Qarşılıqlı etimada və ortaq maraqlara əsaslanan əməkdaşlıq regionun iqtisadi potensialının reallaşdırılmasına, beynəlxalq mövqeyinin gücləndirilməsinə və xalqlarımızın rifahının yüksəldilməsinə xidmət edir.

Elnur Əsədov

YAP Kəngərli rayon təşkilatının əməkdaşı

Paylaş:

Baxılıb: 5 dəfə

Xəbər lenti

Hamısına bax