25 Oktyabr – Qubadlı Şəhəri Günü: Tarixi Zəfərdən Böyük Qayıdışa Doğru

Bakı:

22 °C

64 %

5 m/s

Əlaqə

AZ RU EN

Ana səhifə / YAP xəbərləri / 25 Oktyabr – Qubadlı Şəhəri Günü: Tarixi Zəfərdən Böyük Qayıdışa Doğru

25 Oktyabr – Qubadlı Şəhəri Günü: Tarixi Zəfərdən Böyük Qayıdışa Doğru

22.10.2026 [18:13]

25 Oktyabr – Qubadlı Şəhəri Günü Azərbaycan xalqının tarixi yaddaşında mühüm yer tutan, milli qürur, qəhrəmanlıq və doğma torpaqlara qayıdış əzmini təcəssüm etdirən əlamətdar tarixlərdən biridir. Bu gün xalqımızın ərazi bütövlüyü uğrunda apardığı mübarizənin, Azərbaycan Ordusunun rəşadətinin və tarixi ədalətin bərpasının təntənəsidir.

Qubadlı rayonu 1993-cü il avqustun 31-də Ermənistan silahlı qüvvələri tərəfindən işğal edilmiş, rayonun əhalisi doğma yurd-yuvasından didərgin salınmış, yaşayış məntəqələri dağıntılara məruz qalmışdır. İşğal illərində Azərbaycanın digər ərazilərində olduğu kimi, Qubadlıda da tarixi və mədəni irsə ciddi ziyan dəymişdir. Ermənistanın işğal etdiyi ərazilərdə həyata keçirdiyi qanunsuz məskunlaşdırma siyasəti isə beynəlxalq hüququn norma və prinsiplərinə zidd addımlardan biri olmuşdur.

Azərbaycan Respublikasının Prezidenti İlham Əliyev müxtəlif çıxışlarında işğal dövründə Ermənistan tərəfindən Azərbaycan ərazilərində qanunsuz məskunlaşma aparıldığını, xüsusilə Qubadlı rayonunun Xanlıq kəndində xaricdən gətirilən ermənilər üçün yaşayış məntəqəsi salındığını vurğulamışdır. Dövlətimizin başçısı həmin ərazilərdə azərbaycanlılara məxsus evlərin söküldüyünü və onların yerində qanunsuz məskunlaşdırma məqsədilə yeni evlər tikildiyini diqqətə çatdırmışdır. Bu faktlar işğal dövründə yerli əhalinin öz doğma torpaqlarına qayıtmaq hüququnun pozulmasının və bölgənin demoqrafik mənzərəsinin dəyişdirilməsinə yönəlmiş siyasətin göstəriciləridir.

2020-ci il oktyabrın 25-də Azərbaycan Ordusu Prezident, Ali Baş Komandan İlham Əliyevin rəhbərliyi ilə Qubadlı şəhərini işğaldan azad etdi. Bu tarixi hadisə Vətən müharibəsinin gedişində mühüm hərbi-strateji əhəmiyyət daşımaqla yanaşı, xalqımızın tarixi Zəfərə aparan mübarizəsinin əlamətdar mərhələlərindən biri oldu. Qubadlının azad edilməsi Azərbaycan əsgərinin qəhrəmanlığını, xalqımızın birliyini və dövlətimizin öz ərazi bütövlüyünü bərpa etmək iradəsini bütün dünyaya nümayiş etdirdi.

Qubadlı uğrunda gedən döyüşlərdə hərbçilərimiz böyük şücaət və fədakarlıq göstərdilər. Vətən torpaqlarının azadlığı uğrunda canlarından keçən şəhidlərimizin əziz xatirəsi xalqımızın qəlbində daim yaşayır. Qazanılan Zəfər onların qanı və qəhrəmanlığı bahasına əldə edilmiş müqəddəs tarixi nailiyyətdir. Qubadlı Şəhəri Günü şəhidlərimizin xatirəsinə ehtiramın, qazilərimizin fədakarlığına minnətdarlığın və Vətənə sədaqətin ifadəsidir.

İşğaldan azad edilmiş ərazilərin yenidən qurulması və müasir infrastrukturun yaradılması dövlətimizin qarşıya qoyduğu əsas vəzifələrdəndir. Bu baxımdan Qubadlı və Laçın rayonlarını birləşdirən yeni avtomobil yolunun layihələndirilməsi və tikintisi xüsusi əhəmiyyət daşıyır. Prezident İlham Əliyev 2023-cü il sentyabrın 5-də “Yeni Qubadlı–Laçın avtomobil yolunun layihələndirilməsi və tikintisi ilə bağlı tədbirlər haqqında” Sərəncam imzalamışdır. Sərəncama əsasən, Xudafərin–Qubadlı–Laçın avtomobil yolunun 33-cü kilometrindən başlayan yeni yolun layihələndirilməsi və tikintisinin həyata keçirilməsi məqsədilə Azərbaycan Respublikasının 2023-cü il dövlət büdcəsində nəzərdə tutulmuş Prezidentin ehtiyat fondundan Azərbaycan Avtomobil Yolları Dövlət Agentliyinə 20 milyon manat vəsait ayrılmışdır.

Yeni Qubadlı–Laçın avtomobil yolunun inşası bölgədə nəqliyyat əlaqələrinin yaxşılaşdırılması, yaşayış məntəqələri arasında rahat və təhlükəsiz gediş-gəlişin təmin edilməsi, eləcə də işğaldan azad olunmuş ərazilərin sosial-iqtisadi inkişafı baxımından mühüm əhəmiyyət kəsb edir. Yol infrastrukturu layihələri Qubadlı və Laçının gələcək inkişafına, iqtisadi potensialının reallaşdırılmasına və Böyük Qayıdış prosesinin sürətləndirilməsinə xidmət edir. Bu istiqamətdə görülən işlər azad edilmiş torpaqlarda yeni həyatın qurulmasının, müasir şəhər və kənd mühitinin yaradılmasının mühüm tərkib hissəsidir.

Bu gün Qubadlıda həyata keçirilən bərpa və quruculuq işləri Azərbaycanın öz gücünə, iqtisadi imkanlarına və strateji inkişaf hədəflərinə əsaslanaraq azad edilmiş əraziləri yenidən dirçəltmək əzmini nümayiş etdirir. İnfrastrukturun yenilənməsi, yolların çəkilməsi, yaşayış məntəqələrinin bərpası və sosial şəraitin yaxşılaşdırılması doğma torpaqlarından didərgin düşmüş insanların öz yurdlarına qayıtması üçün zəmin yaradır.

Qubadlı Şəhəri Günü yalnız şəhərin işğaldan azad olunmasının ildönümü deyil, həm də xalqımızın tarixi yaddaşının, milli birliyinin və suverenliyimizin rəmzidir. Bu əlamətdar tarix bizə Vətən torpağının hər qarışının müqəddəs olduğunu, müstəqilliyin və ərazi bütövlüyünün qorunmasının hər bir vətəndaşın məsuliyyəti olduğunu xatırladır.

Qubadlının azadlığı uğrunda canından keçən şəhidlərimizin xatirəsini dərin ehtiramla yad edir, qazilərimizə minnətdarlığımızı bildiririk. Əminik ki, davam edən bərpa və quruculuq işləri nəticəsində Qubadlı daha da inkişaf edəcək, doğma yurdlarına qayıdan sakinlərin firavan yaşayacağı müasir şəhərə çevriləcəkdir. Qubadlı Azərbaycanın Zəfər tarixində özünəməxsus yerini qoruyaraq gələcək nəsillərə qəhrəmanlıq, vətənpərvərlik və doğma torpağa bağlılıq nümunəsi olacaqdır.

Elnur Əsədov

YAP Kəngərli rayon təşkilatının əməkdaşı

Paylaş:

Baxılıb: 1 dəfə

Xəbər lenti

Hamısına bax