Qobu qəsəbəsində YAP tərəfindən bələdiyyə üzvlüyünə namizədliyi irəli sürülmüş şəxslərin seçicilərlə görüşü keçirilib

Bakı:

24 °C

52 %

5 m/s

AZ RU EN

Ana səhifə / YAP xəbərləri / Qobu qəsəbəsində YAP tərəfindən bələdiyyə üzvlüyünə namizədliyi irəli sürülmüş şəxslərin seçicilərlə görüşü keçirilib

Qobu qəsəbəsində YAP tərəfindən bələdiyyə üzvlüyünə namizədliyi irəli sürülmüş şəxslərin seçicilərlə görüşü keçirilib

10.12.2019 [09:47]

Dünən Yeni Azərbaycan Partiyasının (YAP) bələdiyyə seçkiləri ilə bağlı təbliğat-təşviqat kampaniyası çərçivəsində Abşeron rayonunun Qobu qəsəbəsində seçicilərlə “Xalq üçün” şüarı ilə görüş keçirilib.
Çıxış edən YAP Mərkəzi Seçki Qərargahı Abşeron rayon şöbəsinin sədri Bilman Vəliyev bildirib ki, mahiyyət etibarilə 2019-cu il Azərbaycanda hərtərəfli islahatlar ili olub: “YAP-ın müasir Azərbaycan dövlətinin qurulmasında, xalqın rifahının ildən-ilə yüksəlməsində və ümummilli inkişafımızda əvəzolunmaz xidmətləri olub. YAP ötən dövr ərzində sübut edib ki, partiyamız ümumxalq dəstəyi və etimadı qazanan qələbələr partiyasıdır. Əminik ki, “Xalq üçün” devizi ilə getdiyimiz bu bələdiyyə seçkilərində də xalqımız YAP namizədlərini dəstəkləyəcək və partiyamız bu seçkilərdə də növbəti möhtəşəm uğurunu qazanacaqdır”.
Sonra çıxış edən YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə Azərbaycanda 1999-cu ildən fəaliyyət göstərən bələdiyyə institutunun inkişafı, başlıca məqsədləri və fəaliyyət mexanizmləri haqqında seçicilərə ətraflı məlumat verib: “Yerli idarəetmə institutu olan bələdiyyələrin ölkəmizdə formalaşması Ulu Öndər Heydər Əliyevin adı ilə bağlıdır. Məhz müstəqil dövlətimizin 1995-ci ildə qəbul olunmuş ilk Konstitusiyasında bələdiyyələrin fəaliyyəti üçün müvafiq qanunvericilik bazası formalaşdırılıb. Hazırda bələdiyyələrin cəmiyyətimizdə rolu ildən-ilə artır və onların səmərəli fəaliyyətinin təşkili üçün zəruri qanunvericilik bazası və müvafiq strukturlar tam formalaşıb”.
V.Rəhimzadə Qobu qəsəbə seçicilərini səsvermə günü seçki məntəqələrinə gəlməyə və seçkilərdə fəal iştirak etməyə dəvət edib: “Seçiciləri YAP-ın namizədlərinə səs verməyə çağırıram. Çünki Yeni Azərbaycan Partiyası dünənin və bu günün partiyası olduğu kimi, Azərbaycanın firavan gələcəyinin, ölkəmizin rifahının və inkişafının təminatçısı olan partiyadır”.
Sonra Qobu bələdiyyəsinin hazırda fəaliyyətdə olan sədri Araz Nəcəfov ötən dövr ərzində bu qurum tərəfindən görülmüş işlər haqqında məlumat verib.
Daha sonra Qobu bələdiyyəsinə seçkilərdə iştirak edən namizədlər - Araz Nəcəfov, Cavid Qafarov, Məmməd Hüseynzadə çıxış edərək seçicilərə seçki platformaları haqqında məlumat veriblər.
Görüşdə çıxış edən Qobu qəsəbəsinin sakinləri ölkəmizdə gedən dinamik inkişaf və tərəqqi, vətəndaşa göstərilən diqqət və qayğı üçün ölkə başçısına minnətdar olduqlarını, bu siyasəti ürəkdən dəstəklədiklərini və seçkilərdə iştirak edərək YAP-ın namizədlərinə səs verəcəklərini bildiriblər.

Paylaş:

Baxılıb: 735 dəfə