Namiq Əhmədov: Moskva görüşü Azərbaycanın tarixi qələbəsinin möhkəmlənməsində növbəti diplomatik mərhələ oldu

Bakı:

22 °C

64 %

4 m/s

AZ RU EN

Ana səhifə / YAP xəbərləri / Namiq Əhmədov: Moskva görüşü Azərbaycanın tarixi qələbəsinin möhkəmlənməsində növbəti diplomatik mərhələ oldu

Namiq Əhmədov: Moskva görüşü Azərbaycanın tarixi qələbəsinin möhkəmlənməsində növbəti diplomatik mərhələ oldu

14.01.2021 [09:28]

“Yanvar ayının 11-də Azərbaycan, Rusiya prezidentlərinin və Ermənistanın baş nazirinin iştirakı ilə keçirilmiş Moskva görüşü Azərbaycanın tarixi qələbəsinin daha da möhkəmlənməsində növbəti diplomatik mərhələ oldu. Görüşdə Azərbaycan Prezidenti qalib dövlətin Ali Baş Komandanı kimi iştirak etdi və bir daha ölkəmizin regional inkişaf, təhlükəsizlik baxımdan əhəmiyyətini nümayiş etdirmiş oldu”. Bu fikirləri qəzetimizə açıqlamasında Yeni Azərbaycan Partiyası (YAP) Xəzər rayon təşkilatının sədri, partiyanın Siyasi Şurasının üzvü Namiq Əhmədov deyib.
Namiq Əhmədov bildirib ki, görüşün yekunu olaraq bölgədəki vəziyyətin inkişafına dair birgə Bəyanat imzalandı və tərəflər 10 noyabr Bəyanatının regiondakı bütün iqtisadi və nəqliyyat kommunikasiyalarının açılmasını nəzərdə tutan 9-cu bəndinin həyata keçirilməsinə dair üçtərəfli İşçi Qrupun yaradılması barədə razılıq əldə etdilər. “Bu, faktiki olaraq “Mehri dəhlizi” - Naxçıvana, daha sonra Türkiyəyə dəmir yolunun açılması üzrə işlərin başlaması deməkdir. Açılacaq kommunikasiya xətləri “Şərq-Qərb” nəqliyyat dəhlizinin tərkib hissəsi olacaq. Ortaq bəyanatın mətni - humanitar və kommunikasiya məsələləri ilə bağlı üçtərəfli İşçi Qrupunun yaradılması Azərbaycan tərəfinin qapalı görüşdə istədiyinə nail olduğunu təsdiqləyir: Bakının şərtləri qəbul edilməsəydi, üçtərəfli əməkdaşlıq formatı da olmayacaqdı. İmzalanan bəyanatdan da görünür ki, görüş Azərbaycanın maraqları çərçivəsindən kənara çıxmayıb və Azərbaycan hərb meydanında olduğu kimi diplomatik arenada da, müzakirələrdə də üstün mövqedədir, qalibiyyəti güzəştə getmək niyyəti yoxdur. Beləliklə də, Moskva görüşü Azərbaycanın növbəti diplomatik qələbəsi kimi yadda qaldısa, Ermənistan üçün yeni fiasko etapı oldu”, - deyən rayon təşkilatının sədrinin sözlərinə görə, bu gün Azərbaycan hərb meydanında qazandığı zəfəri diplomatik masada, danışıqlar prosesində davam etdirir.
Onun sözlərinə görə, Moskva görüşünün nəticələri fonunda Azərbaycanın qələbəsinə kölgə salmağa, ləkə yaxmağa çalışan anti-Azərbaycan dairələrinin və ölkəmizdəki “beşinci kolon”un təmsilçiləri olan AXCP, antimilli şura və başqalarının da fiaskosu müşahidə edildi: “Radikal müxalifət iddia edirdi ki, Azərbaycana yeni güzəştlər qəbul etdiriləcək, Rusiya hərbi mövcudluğunu gücləndirəcək. Lakin görüşün yekunları bir qrup antimilli elementin qazanılmış qələbənin əhəmiyyətini kiçiltmək cəhdlərinin puçluğunu bir daha ortaya qoydu”.

Paylaş:

Baxılıb: 804 dəfə